កុមារាកាន់ចំណីអាហារដើរកាត់ក្រុមប៉ូលិសដែលដាក់បង្រ្កាបការតវ៉ានៅទីក្រុងហុងកុង កាលពីឆ្នាំ ២០១៩។ AFP
អតីតមេដឹកនាំនិស្សិត ៤ នាក់មកពីសាកលវិទ្យាល័យហុងកុង រងការកាត់ទោសឱ្យជាប់ពន្ធនាគាររយៈពេល ២ ឆ្នាំ កាលពីថ្ងៃចន្ទ ពីបទញុះញង់មនុស្សឱ្យបង្ករបួសស្នាមលើអ្នកដទៃ ដោយអ្នកទាំង ៤ បានសរសើរបុរសម្នាក់ដែលចាក់សម្លាប់មន្ត្រីប៉ូលិសមុនពេលធ្វើអត្តឃាតនៅឆ្នាំ ២០២១។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។
និស្សិតឈ្មោះ Kinson Cheung ឈ្មោះ Charles Kwok ឈ្មោះ Chris Todorovski និងឈ្មោះ Anthony Yung រងការកាត់ទោសឱ្យទទួលខុសត្រូវចំពោះតួនាទីរបស់ខ្លួន ក្នុងការបណ្ដុះគំនិតលើក្រុមប្រឹក្សាសហជីពនិស្សិត។ ការបណ្ដុះគំនិតនោះ បានបង្ហាញពីការទុក្ខព្រួយជាអនេក និងការកើតសរសើរយ៉ាងជ្រាលជ្រៅចំពោះការលះបង់ជីវិតបុរស ដែលសម្លាប់មន្រ្តីប៉ូលិសម្នាក់ដោយកាំបិទនោះ។
សេចក្ដីសម្រេចដាក់គុកនិស្សិតទាំង ៤ នាពេលនេះ ធ្វើឡើងទោះបីជាមានកំហឹងសាធារណៈដែលរីករាលដាលប្រឆាំងនឹងប៉ូលីស ដែលគេថ្កោលទោសថា បានប្រើបាតដៃហិង្សាលើក្រុមបាតុករគាំទ្រលទ្ធិប្រជាធិបតេយ្យឆ្នាំ ២០១៩។
ទោះជាយ៉ាងណាក៏ដោយ លោកស្រី ចៅក្រម Adriana Noelle TseChingបាននិយាយថា ពាក្យដែលនិស្សិតទាំង៤ប្រើ ទំនងជាញុះញង់ឱ្យមានការស្អប់ខ្ពើមប្រឆាំងនឹងប៉ូលីស។លោកស្រីបាននិយាយថា អ្នកទាំង៤រងការចោទប្រកាន់ក្នុងបទល្មើសធ្ងន់ធ្ងរ ហើយការកាត់ទោសស្រាលៗនឹងផ្ញើសារខុសទៅសង្គម។
លោក Leung Kin-fai បានចាក់សម្លាប់មន្ត្រីប៉ូលិសម្នាក់ម្នាក់ មុនពេលសម្លាប់ខ្លួនឯងនៅថ្ងៃទី ១ ខែកក្កដា ឆ្នាំ ២០២១ដែលជាខួបនៃការប្រគល់ហុងកុងពីអាណានិគមអង់គ្លេសទៅឱ្យចិនវិញក្នុងឆ្នាំ ១៩៩៧។ អាជ្ញាធរទីក្រុងហុងកុង បានហៅលោក Leung ថាជាភេរវករក្នុងស្រុក ដែលក្លាយជាជ្រុលនិយមដោយការប្រកាន់និន្នាការនយោបាយ។
ការលើកសរសើរលោក Leung បានទាក់ទាញការរិះគន់ពីសាកលវិទ្យាល័យ និងការិយាល័យសន្តិសុខរបស់ទីក្រុងហុងកុង ដោយបានជំរុញឱ្យលោកKwok និងមិត្តភ័ក្តិសុំទោស និងដកពាក្យចេញ។ មេដឹកនាំនិស្សិតមួយចំនួន ក៏ចុះចេញពីមុខតំណែងផងដែរ។
ប៉ុន្តែការណ៍នេះ មិនបានបញ្ឈប់ប៉ូលិសក្រុងហុងកុងពីការចាប់ខ្លួននិស្សិតទាំង៤នោះទេ។ ពួកគេរងការចោទប្រកាន់ដំបូងពីបទគាំទ្រអំពើភេរវកម្មក្រោមច្បាប់សន្តិសុខជាតិ ដែលដាក់ចេញដោយទីក្រុងប៉េកាំងបន្ទាប់ពីការតវ៉ាឆ្នាំ ២០១៩។ ប៉ុន្តែការចោទប្រកាន់នោះ ត្រូវបានទម្លាក់ចោលវិញ បន្ទាប់ពីពួកគេបានសារភាពកំហុស ហើយជំនួសមកវិញនូវការចោទប្រកាន់ពីបទញុះញង់ដើម្បីបង្ករបួសដោយចេតនាកាលពីខែមុន៕
