សមត្ថកិច្ចត្រូវបានដាក់ពង្រាយក្រោយការកើតមានអំពើហិង្សានៅព្រលានយន្តហោះ។ AFP
ប៉ូលិសរុស្ស៊ីនៅថ្ងៃចន្ទនេះ បាននិយាយថា ពួកគេបានចាប់ខ្លួនមនុស្ស ៦០ នាក់ ដែលសង្ស័យថា បានវាយលុកអាកាសយានដ្ឋានមួយនៅក្នុងរដ្ឋ Dagestan ដែលភាគច្រើនមានជនមូស្លីម នៅតំបន់ Caucasus ជាប់ប្រទេសអាហ្សៃបៃហ្សង់។ ប្រជាជនក្នុងរដ្ឋនេះភាគច្រើនជាជនមូស្លីម ហើយពួកគេស្វែងរកការវាយប្រហារលើអ្នកដំណើរជនជាតិជ្វីហ្វដែលមកពីប្រទេសអ៊ីស្រាអែល។
យោងតាម AFP បាតុកររាប់សិបនាក់ ដែលពួកគេភាគច្រើនបានស្រែកថា «Allahu Akbar» ដែលមានន័យថា «ព្រះគឺអស្ចារ្យបំផុត» បានទម្លុះទ្វារ និងរបាំងនៅអាកាសយានដ្ឋានអន្តរជាតិ Makhachkala កាលពីថ្ងៃអាទិត្យ ដោយខ្លះបានសាកថ្មនៅលើផ្លូវរត់។
ក្រសួងមហាផ្ទៃបាននិយាយថា មន្ត្រីប៉ូលិស៩នាក់បានរងរបួសពេលព្យាយាមស្ដារសណ្តាប់ធ្នាប់ឱ្យមានភាពប្រក្រតីឡើងវិញ ហើយមន្ត្រីប៉ូលិស២នាក់ត្រូវបានបញ្ជូនទៅមន្ទីរពេទ្យ។
អំពើហឹង្សាបានជំរុញឱ្យអ៊ីស្រាអែលអំពាវនាវឱ្យរុស្ស៊ីការពារពលរដ្ឋរបស់ខ្លួន។
វិមានក្រឹមឡាំងបាននិយាយកាលពីថ្ងៃចន្ទថាឧប្បត្តិហេតុនេះគឺជាលទ្ធផលនៃ «ឥទ្ធិពលពីខាងក្រៅ»។
គេហទំព័រតាមដានជើងហោះហើរ Flightradar24 បានបង្ហាញថា ជើងហោះហើរ Red Wings ចេញពីទីក្រុង តែល អាវីវ (Tel Aviv) បានចុះចតនៅ Makhachkala នៅម៉ោង៧យប់ ម៉ោងក្នុងស្រុក កាលពីថ្ងៃអាទិត្យ។
ប្រព័ន្ធផ្សព្វផ្សាយឯករាជ្យ Sota របស់រុស្ស៊ីបាននិយាយថា វាជាជើងហោះហើរឆ្លងកាត់ដែលត្រូវហោះឡើងម្ដងទៀតសម្រាប់ទីក្រុងម៉ូស្គូពីរម៉ោងក្រោយមក។
អភិបាលក្រុង Dagestan លោក Sergei Melikov បានសន្យាថា អ្នកដែលទទួលខុសត្រូវនឹងត្រូវទទួលទោស ហើយក្រសួងមហាផ្ទៃនៃសាធារណរដ្ឋបាននិយាយថា មនុស្ស៦០នាក់ត្រូវបានចាប់ខ្លួន។
ក្រសួងបាននិយាយនៅក្នុងសេចក្តីថ្លែងការណ៍មួយកាលពីព្រឹកថ្ងៃចន្ទថា «អ្នកចូលរួមសកម្មជាងគេ១៥០នាក់នៅក្នុងភាពចលាចលត្រូវបានកំណត់អត្តសញ្ញាណហើយ ៦០នាក់ត្រូវបានចាប់ខ្លួន»។
វាបានបន្ថែមថា៖ «អាកាសយានដ្ឋានឥឡូវស្ថិតក្រោមការគ្រប់គ្រងរបស់កងកម្លាំងសន្តិសុខទាំងស្រុង។
ទីភ្នាក់ងារអាកាសចរណ៍រុស្ស៊ីដំបូងបាននិយាយថា អាកាសយានដ្ឋាននឹងនៅតែបិទរហូតដល់ថ្ងៃទី ៦ខែវិច្ឆិកា ប៉ុន្តែបន្ទាប់មកបានប្រកាសថាវានឹងបើកឡើងវិញនៅថ្ងៃអង្គារ។
