លោក Sergei Shoigu រដ្ឋមន្ត្រីក្រសួងការពារជាតិរុស្ស៊ី។ រូបថត AFP
រដ្ឋមន្ត្រីក្រសួងការពារជាតិរុស្ស៊ី លោក Sergei Shoigu បាននិយាយក្នុងវេទិកាការពារជាតិនៅក្រុងប៉េកាំងកាលពីថ្ងៃចន្ទថា លោកខាងលិចចង់ពង្រាលជម្លោះនៅអ៊ុយក្រែន ឱ្យចូលទៅកាន់តំបន់អាស៊ីប៉ាស៊ីហ្វិក។ យោងទីភ្នាក់ងារសារព័ត៌មានរដ្ឋរុស្ស៊ី TASS។
ថ្លែងក្នុងវេទិកា Xiangshan ដែលជាព្រឹត្តិការណ៍ការទូតយោធាដ៏ធំបំផុតរបស់ចិន លោក Shoigu បាននិយាយថា អង្គការណាតូកំពុងគ្របដណ្តប់លើការបង្កើនកងកម្លាំងនៅក្នុងតំបន់អាស៊ីប៉ាស៊ីហ្វិក ជាមួយនឹងបំណងប្រាថ្នា «ដ៏ប៉ិនប្រសប់» លើការទំនាក់ទំនងគ្នា។
លោក Shoigu បាននិយាយថា បណ្តាប្រទេសណាតូកំពុងលើកកម្ពស់ការប្រណាំងប្រជែងសព្វាវុធក្នុងតំបន់ ដោយបង្កើនវត្តមានយោធារបស់ខ្លួន និងភាពញឹកញាប់ និងទំហំនៃសមយុទ្ធយោធានៅតំបន់នេះ។
រដ្ឋមន្ត្រីដដែលបានបន្តថា កងកម្លាំងសហរដ្ឋអាមេរិកនឹងប្រើប្រាស់ការផ្លាស់ប្តូរព័ត៌មានជាមួយទីក្រុងតូក្យូ និងទីក្រុងសេអ៊ូល លើការបាញ់មីស៊ីល ដើម្បីទប់ទល់ជាមួយរុស្ស៊ី ក៏ដូចជាចិន។
លោកបានចោទប្រកាន់ទីក្រុងវ៉ាស៊ីនតោន ពីការព្យាយាមប្រើប្រាស់ការប្រែប្រួលអាកាសធាតុ និងគ្រោះមហន្តរាយធម្មជាតិ ជាលេសសម្រាប់ «ការអន្តរាគមន៍ផ្នែកមនុស្សធម៌»។
លើសពីនេះថែមទៀត លោក Shoigu បាននិយាយថា ការលេចឡើងនៃប្លុកសន្តិសុខថ្មីដូចជាប្លុកប្រទេសយន្តការដៃគូសន្តិសុខចតុភាគី (QUAD) និងប្លុក AUKUS បានធ្វើឱ្យខូចតួនាទីរបស់សមាគមប្រជាជាតិអាស៊ីអាគ្នេយ៍ (អាស៊ាន) និងការខិតខំប្រឹងប្រែងមិនរីកសាយភាយនុយក្លេអ៊ែរនៅក្នុងតំបន់។
សង្គ្រាមនៅតំបន់មជ្ឈិមបូព៌ាកំពុងធ្វើឱ្យរុស្ស៊ីកាន់តែមានទំនាក់ទំនងខ្លាំងជាមួយបណ្តារដ្ឋអារ៉ាប់នានាក្នុងពេលនេះ៕
