ប៉ូលិសថៃចុះល្បាតទីតាំងកើតហេតុក្រោយការបាញ់ប្រហារនៅផ្សារទំនើប។ AFP AFP
ប្រទេសថៃ ដែលទើបរងគ្រោះដោយសារការបាញ់រះនៅផ្សារទំនើបបណ្តាលឱ្យភ្ញៀវទេសចរចិនស្លាប់ និងរងរបួស គ្រោងនឹងអនុញ្ញាតឱ្យប៉ូលិសចិនល្បាតក្នុងប្រទេសថៃ ដើម្បីបង្កើនទំនុកចិត្តភ្ញៀវទេសចរចិនដែលរដ្ឋាភិបាលថៃប្រឹងប្រែងលើកទឹកចិត្តតាមរយៈការលើកលែងទិដ្ឋាការ។
សារព័ត៌មាន The Nation មានមូលដ្ឋាននៅទីក្រុងបាងកក បានផ្សាយថា ក្នុងគោលបំណងជំរុញទំនុកចិត្តរបស់ភ្ញៀវទេសចរចិន អាជ្ញាធរថៃបានសម្រេចឱ្យមន្ត្រីប៉ូលិសចិនចូលរួមក្នុង ការល្បាតនៅតាមទីក្រុងទេសចរណ៍មួយចំនួនក្នុងប្រទេសថៃ។
ការសម្រេចបែបនេះបានធ្វើឡើងក្នុងកិច្ចប្រជុំមួយជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន មុនពេលលោកចេញដំណើរទៅកាន់សហរដ្ឋអាមេរិកដើម្បីចូលរួមប្រជុំកំពូល APEC នៅទីក្រុង សាន់ ហ្រ្វាន់ស៊ីស្កូក្នុងសប្តាហ៍នេះ។
លោកស្រី Thapanee Kiatphaibool នាយកអាជ្ញាធរទេសចរណ៍ថៃ (TAT) បានប្រកាសពីការផ្លាស់ប្តូរនេះកាលពីថ្ងៃអាទិត្យ បន្ទាប់ពីបានចូលរួមកិច្ចប្រជុំជាមួយនាយករដ្ឋមន្ត្រី សេដ្ឋា ថាវីស៊ីន (Srettha Thavisin) នៅអាកាសយានដ្ឋានសុវណ្ណភូមិ។
លោកស្រីបានលើកឡើងថា ការផ្តោតសំខាន់នៃកិច្ចប្រជុំគឺការដោះស្រាយបញ្ហាសន្តិសុខ និងការធានាគុណភាពនៃសេវាកម្មដែលផ្តល់ដល់ភ្ញៀវទេសចរក្នុងអំឡុងពេលស្នាក់នៅប្រទេសថៃ ហើយ ដើម្បីសម្រេចបាននូវគោលបំណងទាំងនេះ TAT និងក្រសួងទេសចរណ៍ និងកីឡាចាំបាច់ត្រូវសហការជាមួយការិយាល័យស៊ើបអង្កេតកណ្តាល និងប៉ូលិសទេសចរណ៍។
តាមការគ្រោងទុក ការពិភាក្សាស្តីពីការដាក់ពង្រាយប៉ូលិសចិនសម្រាប់ការល្បាតនៅក្នុងទីក្រុងទេសចរណ៍សំខាន់ៗរបស់ប្រទេសថៃនឹងធ្វើឡើងជាមួយស្ថានទូតចិននៅថ្ងៃទី ១៥ វិច្ឆិកា។
ការដាក់ពង្រាយប៉ូលិសចិននេះគឺយកគំរូជោគជ័យដែលអនុវត្តនៅក្នុងប្រទេសអ៊ីតាលី។
គេរំពឹងថា គំនិតផ្តួចផ្តើមនេះនឹងរួមចំណែកដល់គោលដៅនៃការទទួលភ្ញៀវទេសចរចិនប្រមាណ ៤,៤ លាននាក់ រយៈពេល ២ ខែចុងក្រោយនៃឆ្នាំនេះ។
លោកស្រី Thapanee និយាយថា៖ «វាចាំបាច់ត្រូវមានប៉ូលិសចិននៅក្នុងប្រទេសថៃ ព្រោះវានឹងជួយយើងបង្ហាញភ្ញៀវទេសចរចិនថា ប្រទេសថៃ កំពុងពង្រឹងវិធានការសន្តិសុខរបស់ខ្លួន។ ជាមួយគ្នានេះ ទំនុកចិត្តរបស់អ្នកធ្វើដំណើរនឹងត្រូវបានជំរុញ ប្រសិនបើមន្ត្រីប៉ូលិសរបស់ពួកគេអាចបញ្ជាក់ថាប្រទេសថៃមានសុវត្ថិភាព»។
ការមកដល់របស់ជនជាតិចិនបានថយចុះបន្ទាប់ពីក្មេងប្រុសអាយុ ១៤ ឆ្នាំម្នាក់ បានទៅបាញ់ប្រហារនៅក្នុងផ្សារទំនើបមួយក្នុងទីក្រុងបាងកក កាលពីដើមខែតុលា ហើយបានសម្លាប់អ្នកទេសចរចិនម្នាក់ និងម្នាក់ទៀតរងរបួស។ ចាប់ពីពេលនោះ ចំនួនភ្ញៀវទេសចរចិនរាប់ម៉ឺននាក់បានលុបចោលដំណើរកម្សាន្តទៅកាន់ប្រទេសថៃ៕
