ប្រធានាធិបតីឥណ្ឌូនេស៊ី ចូកូ វីដូដូ បានជួបពិភាក្សាទ្វេភាគីជាមួយប្រធានាធិបតីអាមេរិក ចូ បៃដិននៅទីក្រុងសាន់ហ្រ្វាន់ស៊ីស្កូសហរដ្ឋអាមេរិក។ AFP
ក្នុងជំនួបទ្វេភាគីស្របដំណើរទៅកាន់សហរដ្ឋអាមេរិក ដើម្បីចូលរួមកិច្ចប្រជុំកំពូល «កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)» ប្រធានាធិបតីឥណ្ឌូនេស៊ី លោក ចូកូ វីដូដូ ដែលមានប្រជាជនមូស្លីមច្រើនបំផុតក្នុងពិភពលោក បានសង្កត់ប្រធានាធិបតីអាមេរិក លោក ចូ បៃដិន ដែលជាអ្នកផ្តល់ការគាំទ្រអ៊ីស្រាអែល ដោយជំរុញឱ្យអាមេរិកធ្វើសកម្មភាពបន្ថែមទៀតដើម្បីបញ្ចប់ «ភាពឃោរឃៅ» នៅក្នុងតំបន់ហ្គាហ្សា និងជួយនាំមកនូវបទឈប់បាញ់មួយ។
សង្គ្រាមអ៊ីស្រាអែល និងក្រុមហាម៉ាស់បានឡេស្ទីន បានគ្របដណ្ដប់លើកិច្ចចរចារបស់ភាគីទាំងពីរ ដែលមានបំណងបង្ហាញពីការធ្វើឱ្យប្រសើរឡើងនូវទំនាក់ទំនងរវាងឥណ្ឌូនេស៊ី និងសហរដ្ឋអាមេរិក មុនពេលកិច្ចប្រជុំរបស់លោក បៃដិន ជាមួយប្រធានាធិបតីចិន ស៊ី ជីនភីង (Xi Jinping) នៅសប្តាហ៍នេះ។
ទីភ្នាក់ងារព័ត៌មានបារាំង AFP បានរាយការណ៍ថា លោក ប្រធានាធិបតីឥណ្ឌូនេស៊ី ចូកូ វីដូដូ មេដឹកនាំនៃប្រជាជាតិដែលមានប្រជាជនមូស្លីមភាគច្រើនបំផុតនៅលើពិភពលោកបាននិយាយថា «ឥណ្ឌូនេស៊ីអំពាវនាវដល់សហរដ្ឋអាមេរិកឱ្យធ្វើបន្ថែមទៀតដើម្បីបញ្ឈប់អំពើឃោរឃៅនៅហ្គាហ្សា។ បទឈប់បាញ់ គឺជាកត្តាចាំបាច់សម្រាប់មនុស្សជាតិ»។
ប្រធានាធិបតីឥណ្ឌូណេស៊ី បាននិយាយកាលពីថ្ងៃអាទិត្យថា លោកនឹងនាំសារដ៏សំខាន់មួយទៅកាន់ ប្រធានាធិបតីសហរដ្ឋអាមេរិក ពីកិច្ចប្រជុំកំពូលរួមនៃមេដឹកនាំអារ៉ាប់ និងមូស្លីមនៅទីក្រុង រីយ៉ាដ (Riyadh) ប្រទេសអារ៉ាប៊ីសាអូឌីតនៅចុងសប្តាហ៍នេះ ដែលបានថ្កោលទោសអ៊ីស្រាអែល និងបានអំពាវនាវឱ្យមានបទឈប់បាញ់។
លោក Widodo ក៏បាននិយាយផងដែរថា លោកនឹង «បញ្ជូនសារជាក់លាក់មួយពីប្រធានាធិបតី Mahmoud Abbas នៃប៉ាឡេស្ទីន ដែលបានសុំឱ្យខ្ញុំបញ្ជូនវាទៅប្រធានាធិបតី បៃដិន» ទាក់ទងនឹងសង្គ្រាម។
ក្នុងបរិបទសង្គ្រាមអ៊ីស្រាអែល និងក្រុមហាម៉ាស់ ប៉ាឡេស្ទីន ដែលកំពុងវិឌ្ឍនទៅមុខអស់រយៈពេលជាង ១ ខែ នេះ អ៊ីស្រាអែលធ្លាប់បដិសេធបទឈប់បាញ់ណាមួយជាមួយក្រុមហាម៉ាស់ រហូតដល់ខ្លួនអាចគ្រប់គ្រងតំបន់ហ្គាហ្សា បានទាំងស្រុង។ ជំហររបស់អ៊ីស្រាអែល ក៏ធ្លាប់ទាត់ចោលសំណើររបស់អាមេរិក ដែលជាអ្នកគាំទ្រខ្លួនជុំវិញការគ្រប់គ្រងតំបន់ហ្គាហ្សាក្រោយអ៊ីស្រាអែល វាយកម្ទេសក្រុមហាម៉ាស់៕
