ប្រធានាធិបតី ហ្វីលីពីន បច្ចុប្បន្ន លោក Ferdinand Marcos Jr.។ AFP
អ្នកជំនាញសិទ្ធិមនុស្សរបស់អង្គការសហប្រជាជាតិ កាលពីថ្ងៃពុធ បានជំរុញប្រទេសហ្វីលីពីនរំលាយក្រុមកងកម្លាំងប្រឆាំងកុម្មុយនិស្តចោល ដោយចោទថា ក្រុមនេះកំណត់គោលដៅបៀតបៀនលើអ្នករិះគន់រដ្ឋាភិបាល។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
លោក Ian Fry អ្នករាយការណ៍ពិសេសរបស់អង្គការសហប្រជាជាតិស្តីពីការលើកកម្ពស់ និងការការពារសិទ្ធិមនុស្សក្នុងបរិបទនៃការប្រែប្រួលអាកាសធាតុ បាននិយាយថា រដ្ឋាភិបាលហ្វីលីពីនគួរតែរំលាយក្រុមកម្លាំងជាតិដើម្បីបញ្ចប់ជម្លោះប្រដាប់អាវុធកុម្មុយនិស្តក្នុងតំបន់ (NTF-ELCAC) ហើយលុបចោលច្បាប់ប្រឆាំងអំពើភេរវកម្ម។
អតីតប្រធានាធិបតីហ្វីលីពីន លោក រ៉ូឌ្រីហ្គូ ឌុយទែរតេ បានបង្កើតក្រុម NTF-ELCAC ក្នុងឆ្នាំ ២០១៨ ដើម្បីបំបាត់ការបះបោររាប់ទសវត្សរ៍។ កងកម្លាំងដែលរួមមានយោធា តែងតែហៅសកម្មជនសិទ្ធិមនុស្ស អ្នកការពារបរិស្ថាន មេធាវី និងអ្នកកាសែត ថាជាអ្នកអាណិតអាសូរពួកកុម្មុយនីស្ត ដោយមិនផ្តល់ភស្តុតាងណាមួយឡើយ។ ក្រោមការដឹកនាំរបស់លោក ឌុយទែរតេ អ្នកដែលរងការចោទប្រកាន់ត្រូវបានគេចាប់ខ្លួន ចាប់ឃុំខ្លួន ឬសម្លាប់ក៏មាន។
លោក Fry និយាយនៅចុងបញ្ចប់នៃដំណើរទស្សនកិច្ចរយៈពេល១០ ថ្ងៃទៅកាន់ប្រទេសហ្វីលីពីនថា ក្រុមNTF-ELCAC បានធ្វើប្រតិបត្តិការលើសពីតួនាទីរបស់ខ្លួន ហើយធ្វើការកំណត់គោលដៅលើមនុស្សពីសហគមន៍ និងជនជាតិដើមភាគតិចជាដើម។
លោកបានបន្តថា ការយាយីលើអ្នកការពារសិទ្ធិមនុស្សផ្នែកបរិស្ថាន គឺកើតមានជាទូទៅនិងអំពាវនាវឱ្យមានការស៊ើបអង្កេតឯករាជ្យលើសកម្មភាពកន្លងមករបស់ក្រុមកងកម្លាំងនេះ។ លោកបានប្រាប់អ្នកយកព័ត៌មានថា៖ «ខ្ញុំបានឮករណីនៃការធ្វើទារុណកម្ម ការបាត់ខ្លួន និងការសម្លាប់មនុស្សក្រៅប្រព័ន្ធតុលាការ ហើយនេះពិតជាមិនអាចទទួលយកបាន»។
អង្គការឃ្លាំមើល Global Witness បានដាក់ចំណាត់ថ្នាក់ហ្វីលីពីន ថាជាប្រទេសមួយក្នុងចំណោមប្រទេសគ្រោះថ្នាក់បំផុតនៅលើពិភពលោកសម្រាប់សកម្មជនការពារដីធ្លី និងបរិស្ថានក្នុងឆ្នាំ ២០២២។
យ៉ាងណាមិញ ទីប្រឹក្សាសន្តិសុខជាតិហ្វីលីពីន លោក Eduardo Ano ដែលធ្វើការផ្នែកមួយនៃក្រុម NTF-ELCAC បានរិះគន់លោកFry ចំពោះការមិនបានលើកឡើងពីកង្វល់របស់លោកជាមួយរដ្ឋាភិបាល។
លោក Ano បានថ្លែងយ៉ាងដូច្នេះថា៖ «យើងអាចជូនដំណឹងដល់លោកអំពីកម្មវិធីសំខាន់ៗ ការតស៊ូមតិ និងការជំរុញរបស់ NTF-ELCAC ដើម្បីសម្រេចបាននូវសន្តិភាព ឯកភាព និងការអភិវឌ្ឍន៍ពិតប្រាកដ ជាពិសេសនៅក្នុងតំបន់ដាច់ស្រយាល និងតំបន់ជួបការលំបាក ដែលធ្លាប់ជាកន្លែងស្នូលនៃភេរវកម្មកុម្មុយនិស្ត»។
ទោះបីជាយ៉ាងនេះក៏ដោយ លោក Fry បាននិយាយថា រដ្ឋាភិបាលហ្វីលីពីនមិនចាំបាច់ធ្វើតាមអនុសាសន៍របស់លោកទេ ប៉ុន្តែការមិនអើពើនឹងអាចប៉ះពាល់ដល់កេរ្តិ៍ឈ្មោះលើឆាកអន្តរជាតិរបស់ប្រទេស៕
