![](https://pppkhmer.sgp1.digitaloceanspaces.com/image/main/202311/23_11_2023_000_344F98K.jpg)
ប្រធានាធិបតីកូរ៉េខាងត្បូង និងនាយករដ្ឋមន្ត្រីចក្រភពអង់គ្លេស ក្នុងជំនួបនាទីក្រុងឡុងដ៍។ AFP
ប្រធានាធិបតីកូរ៉េខាងត្បូងលោក Yoon Suk Yeol នឹងជួបជាមួយនាយករដ្ឋមន្ត្រីនៃប្រទេសអង់គ្លេស គឺលោក Rishi Sunak ដើម្បីចុះកិច្ចព្រមព្រៀងមួយសំដៅបង្កើនកិច្ចសហប្រតិបត្តិការលើវិស័យការពារជាតិសន្តិសុខនិងបច្ចេកវិទ្យា។
ក្នុងដំណើរទស្សនកិច្ចទៅកាន់ប្រទេសអង់គ្លេសនេះដែរ នឹងមានការចុះកិច្ចព្រមព្រៀងសហការគ្នាដើម្បីពង្រឹងទណ្ឌកម្មរបស់អង្គការសហប្រជាជាតិទៅលើប្រទេសកូរ៉េខាងជើង។
ដោយឡែករហូតមកដល់ពេលនេះ រដ្ឋមន្ត្រីនៃប្រទេសទាំង២ ក៏បានចាប់ផ្តើមកិច្ចពិភាក្សាលើកិច្ចព្រមព្រៀងពាណិជ្ជកម្មសេរីថ្មី (FTA) និងយល់ព្រមលើភាពជាដៃគូលើថាមពលស្អាត ខណៈដែលការវិនិយោគជាច្រើនត្រូវបានប្រកាសជាបន្តបន្ទាប់ក្នុងនោះ ក៏មានគម្រោងថាមពលខ្យល់នៅក្នុងប្រទេសកូរ៉េខាងត្បូងក្នុងទឹកប្រាក់សរុប ១,១៦ ពាន់ លានដុល្លារផងដែរ។
លោកប្រធានាធិបតីកូរ៉េខាងត្បូងដែលជាអ្នកអភិរក្សនិយមនោះបានលើកឡើងពីបញ្ហាប្រឈមជាសាកលដែលជាហេតុផលមួយសម្រាប់បង្កើនទំនាក់ទំនងឱ្យកាន់តែជិតស្និទ្ធជាមួយដៃគូដែលមានគោលការណ៍ដូចគ្នានិងបានស្វាគមន៍ជាពិសេសទៅលើការពិភាក្សាដើម្បីធ្វើបច្ចុប្បន្នភាពកិច្ចព្រមព្រៀងពាណិជ្ជកម្មសេរីកូរ៉េ-អង់គ្លេស។
លោក Yoon បាននិយាយនៅក្នុងសុន្ទរកថាទៅកាន់វេទិកាធុរកិច្ចថា៖ «ក្នុងអំឡុងពេលនៃការចរចាយើងនឹងបើកទូលាយក្នុងការទទួលយកទស្សនៈរបស់អ្នកធុរកិច្ចនៃប្រទេសទាំង២ សំដៅឈានទៅកំណត់បទដ្ឋានថ្មីស្តីពីឌីជីថលខ្សែច្រវាក់ផ្គត់ផ្គង់»។
លោកបានបន្ថែមថាប្រទេសកូរ៉េ ដែលបច្ចុប្បន្នជាអ្នកផលិតបន្ទះឈីបដ៏សំខាន់មួយដែរនោះកាន់តែត្រូវការកិច្ចសហប្រតិបត្តិការជាមួយចក្រភពអង់គ្លេស បន្ថែមទៀតលើរឿងនេះ ដើម្បីអាចជួយកាត់បន្ថយវិបត្តិចង្វាក់ផ្គត់ផ្គង់នាពេលអនាគត។
ប្រធានាធិបតីកូរ៉េខាងត្បូង បានធ្វើដំណើរទៅដល់ប្រទេសអង់គ្លេស កាលពីថ្ងៃចន្ទទី២០ វិច្ឆិកាដែលនេះជាដំណើរទស្សនកិច្ចលើកដំបូងក្នុងរយៈពេល ១ ទសវត្សរ៍កន្លងទៅនេះ។ លោកត្រូវបានទទួលស្វាគមន៍ដោយកម្រាលព្រំក្រហមពីសំណាក់ព្រះអង្គម្ចាស់ Charles ដែលនេះជាលើកដំបូងដូចគ្នា ក្នុងរាជ្យរបស់ទ្រង់ក្រោយបានឡើងគ្រងរាជ្យកាលពីឧសភាកន្លងទៅ។
យ៉ាងណាមិញទំហំពាណិជ្ជកម្មសរុបរវាងចក្រភពអង់គ្លេស និងកូរ៉េខាងត្បូង មានចំនួន ១៦,១ ពាន់លានផោន (២០,១ ពាន់លានដុល្លារ) គិតត្រឹមចុងខែមិថុនា នៃឆ្នាំ២០២៣ នេះ។
ប្រទេសទាំង២ ក៏គ្រោងនឹងប្រកាសគម្រោងវិនិយោគបន្ថែមទៀតនៅក្នុងទឹកដីចក្រភពអង់គ្លេសតែម្ដងក្នុងទំហំទឹកប្រាក់ចំនួន២១ពាន់លានផោនដែលគម្រោងទាំងនោះស្ថិតក្នុងវិស័យថាមពលបៃតងនិងហេដ្ឋារចនាសម្ព័ន្ធ៕