លោក Gregorian Bivolaru វ័យ ៧១ ឆ្នាំ ត្រូវបានចាប់ខ្លួននៅប្រទេសបារាំង។ AFP
សេចក្តីរាយការណ៍របស់ទីភ្នាក់ងារព័ត៌មានបារាំង AFP បានផ្សាយថា អាជ្ញាធរបារាំងកាលពីថ្ងៃទី ២៨ វិច្ឆិកា បានចាប់ខ្លួនមនុស្ស ៤១ នាក់ ក្នុងការឆ្មក់ចូលចាប់ខ្លួន ក្រុមនិកាយយូហ្គាដ៏ចម្រូងចម្រាសមួយដែលរួមមានមេដឹកនាំរបស់ខ្លួនគឺលោក Gregorian Bivolaru វ័យ ៧១ ឆ្នាំនៅក្នុងទីក្រុងប៉ារីស ក្រោមបទចោទជាច្រើន និងនៅច្រើនប្រទេស។
AFP ដែលបានដកស្រង់សម្តីពីប្រភពជិតស្និទ្ធនឹងករណីនេះ បានផ្សាយថា ក្រុមនិកាយយូហ្គានេះត្រូវបានចោទប្រកាន់ពីបទរំលោភបំពានជាច្រើនក្រោមការដឹកនាំរបស់ លោក Bivolaru ដែលត្រូវបានធ្វើឡើងម្តងហើយម្តងទៀតនៅក្នុងជួរអាជ្ញាធរតុលាការច្រើនប្រទេស ដូចជានៅក្នុងប្រទេសរូម៉ានី ស៊ុយអែត និងបារាំងក្នុងប៉ុន្មានឆ្នាំថ្មីៗនេះ។
តាមសេចក្តីរាយការណ៍ដដែលបានបញ្ជាក់ថា លោក Bivolaru ជាជនជាតិរ៉ូម៉ានី និងស៊ុយអែត។ សមាជិកសំខាន់ៗនៃនិកាយយូហ្គា ដែលអប់រំផ្លូវចិត្ត បែបសាសនា ក៏ត្រូវបានចាប់ខ្លួននៅតំបន់ប៉ារីសនិងភាគខាងត្បូងប្រទេសបារំាង។
ប្រភពដដែលបានបន្តថា មន្ត្រីប៉ូលិសចំនួន ១៧៥ នាក់ ត្រូវបានដាក់ពង្រាយសម្រាប់ប្រតិបត្តិការនេះ ក្នុងនោះស្ត្រីចំនួន ២៦ នាក់ ដែលក្នុងនោះមានស្ត្រីជាច្រើននាក់ត្រូវបានគេឃុំខ្លួនមិនស្របតាមឆន្ទៈរបស់ពួកគេ និងត្រូវបានដោះលែងវិញ៕
