ប្រទេស​ម្ចាស់បំណុល​បាន​ជូនដំណឹង​ទៅកាន់​ប្រទេស​ស្រីលង្កា​ ថា ពួកគេ​យល់ព្រម​លើ​កិច្ចព្រមព្រៀង​រៀបចំ​រចនាសម្ព័ន្ធ​បំណុល​ឡើងវិញ ​ប៉ុន្តែ​ស្រីលង្កា​ នៅ​មិនទាន់​ទទួលបាន​លិខិតបញ្ជាក់​ជា​ផ្លូវការ​ពី​គណៈកម្មាធិការ​ម្ចាស់បំ​ណុល​នៅឡើយ​ទេ។ នេះ​បើ​យោងតាម​ប្រភព​រដ្ឋាភិបាល​ស្រីលង្កា ​ដែល​បាន​ប្រាប់​ទៅកាន់​សារព័ត៌មាន​រ៉​យ​ទ័​រ (Reuters) នៅ​ថ្ងៃទី២៩ ខែវិច្ឆិកា។


ប្រទេស​ស្រីលង្កា​ បាន​ជាប់គាំង​ក្នុង​វិបត្តិ​ហិរញ្ញវត្ថុ​ដ៏​អាក្រក់​បំផុត​ក្នុង​ប៉ុន្មាន​ទសវត្សរ៍​ចុងក្រោយ​នេះហើយ​បាននិងកំពុង​ព្យាយាម​បង្កើត​កិច្ចព្រមព្រៀង​រៀបចំ​រចនាសម្ព័ន្ធ​បំណុល​ជាមួយ​ម្ចាស់បំណុល​ឡើងវិញ ពោលគឺ​ចាប់តាំងពី​ឆ្នាំមុន ដោយ​ត្រូវបាន​ប្រទេស​ម្ចាស់បំណុល​បង្ខំ​ឱ្យ​សងបំណុល​បរទេស​រប​ស់​ខ្លួន​កាលពី​ខែឧសភា​ឆ្នាំ២០២២បន្ទាប់ពី​ទុនបំរុង​ប្តូរប្រាក់​បរទេស​បាន​ធ្លាក់ចុះ​ដល់​កម្រិត​ទាប​បំផុត​មិន​ធ្លាប់មាន។


យោងតាម​មន្ត្រី​រដ្ឋាភិបាល​ស្រីលង្កា​ ដែល​សុំ​មិន​បង្ហាញ​អត្តសញ្ញាណ​ម្នាក់​បាន​និយាយថា «ប្រទេស​ស្រីលង្កា​ត្រូវបាន​គេ​ជូនដំណឹង​អំពី​កិច្ចព្រមព្រៀង​រៀបចំ​រចនាសម្ព័ន្ធ​បំណុល​ឡើងវិញ​ជាមួយ​អ្នកផ្តល់​ប្រាក់កម្ចី​ទ្វេភាគី ថា​ពួកគេ​បាន​យល់ព្រម​ហើយ ប៉ុន្តែ​យើង​នៅ​រង់ចាំ​លិខិតផ្លូវការ​សិន។ យើង​រំពឹងថា​នឹង​ទទួលបាន​លិខិត​ក្នុងពេលឆាប់ៗនេះ"»។ យ៉ាងណាក៏ដោយ ការិយាល័យ​ប្រធានាធិបតី​ស្រីលង្កា​និង​ក្រសួង​ហិរញ្ញវត្ថុ មិនបាន​ឆ្លើយតបភ្លាមៗចំពោះ​សំណើសុំ​ការអត្ថាធិប្បាយ​ជុំវិញ​បញ្ហា​នេះ​ទេ។


ប្រទេស​ជប៉ុន​ បារាំង​ និង​ឥណ្ឌា​ ជា​អ្នកដឹកនាំ​គណៈកម្មាធិការ​ម្ចាស់បំណុល រីឯ​ប្រទេស​ចិន ​ដែលជា​ប្រទេស​ផ្តល់​កម្ចី​ធំ​បំផុត​ដល់​ប្រទេស​ស្រីលង្កា ​គឺជា​អ្នកសង្កេតការណ៍​ពោលគឺ​មិនមែនជា​សមាជិក​ផ្លូវការ​ទេ។ដោយឡែក ម្ចាស់បំណុល​ទ្វេភាគី​ក៏​មិនបាន​ឆ្លើយតបភ្លាមៗទេ​ជុំវិញ​បញ្ហា​នេះ។


ថ្មីៗនេះ​ប្រទេស​ស្រីលង្កា​ ចុះ​កិច្ចព្រមព្រៀង​ជាមួយ​ធនាគារ​នាំចេញ​នាំចូល (Export-Import Bank) របស់​ប្រទេស​ចិន​ ដើម្បី​គ្រប់គ្រង​បំណុល​របស់ខ្លួន​ចំនួន ៤,២ ប៊ី​លាន​ដុល្លារ​សហរដ្ឋអាមេរិក។

កិច្ចព្រមព្រៀង​នេះ​គឺមាន​សារៈសំខាន់​សម្រាប់​ស្រីលង្កា​ក្នុងការ​ឆ្លងកាត់​ការត្រួតពិនិត្យ​ដំបូង​នៃ​កញ្ចប់​ជំនួយ​ហិរញ្ញវត្ថុ​ពី​មូលនិធិ​រូបិយវត្ថុ​អន្តរជាតិ​ឬ​ហៅ​កាត់​ថា IMF។ហើយ​វា​ក៏​ចាំបាច់​ផងដែរ​ក្នុង​ការទទួល​កម្ចី​ជា​លើក​ទី​ពីរ​ប្រហែល៣៣៤លាន​ដុល្លារ​សហរដ្ឋអាមេរិក​ពី​IMFនេះ​បើ​យោងតាម​ក្រសួង​ហិរញ្ញវត្ថុ។

ក្រោយពី​ការអនុម័ត​យល់ព្រម​ដោយ IMF ប្រទេស​ស្រីលង្កា អាចនឹងទទួល​បាន​មូលនិធិ​បន្ថែម​ពី​ធនាគារអភិវឌ្ឍន៍អាស៊ី (ADB) និង​ធនាគារពិភពលោក (WB) ដែល​សរុប​ជា​ទឹកប្រាក់​ប្រហែល៩០០លាន​ដុល្លារ​នេះ​បើ​យោងតាម​សេចក្តីថ្លែងការណ៍​របស់​ទេសាភិបាល​ធនាគារកណ្តាល លោក​ណាន​ដា​ឡា​ល់ វៀ​រ៉ាស៊ី​ង​ហេ (Nandalal Weerasinghe) កាលពី​សប្តាហ៍​មុន។

យោងតាម​អគ្គនាយក​ធនាគារអភិវឌ្ឍន៍អាស៊ី​ប្រចាំ​នៅ​ស្រីលង្កា ​បានឱ្យដឹងថា ADB ក៏​កំពុង​ពិចារណា​ផ្តល់ប្រាក់​ចំនួន ២០០ លាន​ដុល្លារ​ដល់​ស្រីលង្កា​ នៅ​ខែក្រោយ​ផងដែរ។ ចំនួន​ទឹកប្រាក់​នេះ ​គឺជា​ផ្នែក​មួយ​នៃ​ប្រាក់កម្ចី​ពិសេស​ចំនួន ៣៥០ លាន​ដុល្លារ​ដែល​ត្រូវបាន​អនុម័ត​នៅក្នុង​ខែឧសភា​ដើម្បី​ត្រៀម​ទុក​ជួយ​ដល់​ប្រទេស​ស្រីលង្កា។

យោងតាម​ក្រសួង​ហិរញ្ញវត្ថុ​ស្រីលង្កា បំណុល​បរទេស​សរុប​របស់​ប្រទេស​ស្រីលង្កា ​មាន​ចំនួន ៣៦,៦ ប៊ី​លាន​ដុល្លារ​សហរដ្ឋ អាមេរិក​ ដោយ​រាប់បញ្ចូល​ទាំង​បំណុល​ទ្វេភាគី​ចំនួន ១០,៩៤​ ពាន់​លាន​ដុល្លារ។ ប្រទេស​នេះ​ ក៏​ត្រូវធ្វើ​កិច្ចព្រមព្រៀង​ជាមួយ​ម្ចាស់​មូល​ប​ត្រ​បំណុល​អន្តរជាតិ​រហូត​ដល់​ទៅ ១២,៥ ប៊ី​លាន​ដុល្លារ។ម្យ៉ាងវិញទៀត មូល​ប​ត្រ​បំណុល​ប្រាក់​ដុល្លារ​ដែល​ត្រូវ​សង​ម្ចាស់បំណុល​វិញ​នៅ​ខែកក្កដា​ឆ្នាំ២០២៦ បាន​កើន​ឡើងដល់ ៥០,៥០ ដុល្លារ ដោយ​កើន​ចំនួន ០,៤៤ សេន​នេះ​បើ​យោងតាម​ទិន្នន័យ​របស់ ​Tradeweb ៕