នាយករដ្ឋមន្ត្រីជប៉ុនលោក Fumio Kishida
នាពេលថ្មីៗនេះ ក្រុមដ៏មានឥទ្ធិពលបំផុតរបស់គណបក្ស ដែលមានទំនាក់ទំនងជាមួយអតីតនាយករដ្ឋមន្ត្រីជប៉ុន លោក Shinzo Abe ត្រូវបានគេសង្ស័យថាបានខកខាន ក្នុងការរាយការណ៍អំពីមូលនិធិច្រើនជាង ១០០ លានយ៉េន (៦៩០០០០ ដុល្លារ) ដែលបានប្រើប្រាស់ក្នុងយុទ្ធនាការនិងច្បាប់បោះឆ្នោត។
រឿងអាស្រូវនេះបានបង្កឱ្យមានបញ្ហាប្រឈមផ្នែកនយោបាយដ៏ធំបំផុតចំពោះគណបក្សប្រជាធិបតេយ្យសេរី (LDP) ដែលបានឡើងកាន់អំណាចក្នុងឆ្នាំ២០១២ និងបានធ្វើឱ្យប៉ះពាល់ដល់មូលដ្ឋានគ្រឹះនៃរដ្ឋបាលបច្ចុប្បន្ន។
ដោយឡែក នាយករដ្ឋមន្ត្រីជប៉ុនលោក Fumio Kishida បាននិយាយនាថ្ងៃទី១១ ខែធ្នូថាលោកនឹងចាត់វិធានការដើម្បីស្ដារទំនុកចិត្តនៅក្នុងជួររដ្ឋាភិបាលរបស់លោកចំពេលមានរឿងអាស្រូវរៃអង្គាសប្រាក់ ប៉ុន្តែយ៉ាងណាលោកបដិសេធមិនបញ្ជាក់ពីព័ត៌មានដែលថាលោកបានជំនួសតំណែងរដ្ឋមន្ត្រីចំនួន៤រូបនៅក្នុងគណៈរដ្ឋមន្ត្រីរបស់លោកទេ។
លោក Kishida បានថ្លែងយ៉ាងដូច្នេះថា៖ «យើងនឹងពិចារណារកវិធានការសមស្របដើម្បីស្តារទំនុកចិត្តសាធារណៈឡើងវិញនិងការពារការពន្យារពេលក្នុងនយោបាយជាតិ»។
យ៉ាងណាមិញក្នុងអំឡុងសន្និសីទសារព័ត៌មាននៅថ្ងៃចន្ទនេះលោកMatsunoដែលជាអ្នកនាំពាក្យរដ្ឋាភិបាលកំពូលក៏មិនបានបញ្ជាក់លម្អិតជូនប្រព័ន្ធផ្សព្វផ្សាយដែរដោយលោកគ្រាន់តែបញ្ជាក់ថាការស៊ើបអង្កេតកំពុងដំណើរការហើយរដ្ឋាភិបាលនឹងចាត់វិធានការសមស្របឱ្យបានយ៉ាងឆាប់បំផុតតាមដែលអាចធ្វើទៅបាន។
ដោយឡែកកាសែត Asahi បានរាយការណ៍កាលពីល្ងាចថ្ងៃទី១០ ធ្នូ ថាលោក Kishida បានសម្រេចចិត្តជំនួសរដ្ឋមន្ត្រីចំនួន ៤ និងតំណែងរដ្ឋមន្ត្រីចំនួន ១១ រូប ផ្សេងទៀតនៅក្នុងគណៈរដ្ឋមន្ត្រីរបស់លោកដោយសាររឿងអាស្រូវលុយកាក់ដែលបង្កឱ្យមានការមិនពេញចិត្តជាសាធារណៈ។
កាសែត Asahi បានរាយការណ៍ទៀតថាប្រធានខុទ្ទកាល័យលោក HirokazuMatsuno, រដ្ឋមន្ត្រីពាណិជ្ជកម្ម Yasutoshi Nishimura រដ្ឋមន្ត្រីកិច្ចការផ្ទៃក្នុង Junji Suzuki និងរដ្ឋមន្ត្រីកសិកម្ម Ichiro Miyashita រួមមានទាំងសមាជិកសភានិងលេខាធិការសភាដែរនោះស្ថិតក្នុងចំណោមអ្នកដែលនឹងត្រូវជំនួសតំណែង។
គណបក្ស LDP ដែលកាន់អំណាចស្ទើរតែទាំងអស់នៃយុគសម័យក្រោយសង្គ្រាមរបស់ប្រទេសជប៉ុន នឹងត្រូវរៀបចំការបោះឆ្នោតជ្រើសរើសមេដឹកនាំថ្មីនៅខែកញ្ញានិងការបោះឆ្នោតសកលដែលកំណត់ត្រឹមខែតុលាឆ្នាំ២០២៥។
យ៉ាងណាមិញសម្ទុះអ្នកគាំទ្រលោក Kishida បានធ្លាក់ចុះតាំងតែពីមុនផ្ទុះរឿងអាស្រូវមកម្លេះហើយដែលការធ្លាក់នោះបានទៅដល់កម្រិតទាបបំផុតក្នុងតំណែងជានាយករដ្ឋមន្ត្រីរបស់លោក។ទាំងអស់នេះឆ្លុះបង្ហាញពីការព្រួយបារម្ភរបស់ប្រជាជនជាម្ចាស់ឆ្នោតចំពោះការកើនឡើងនៃតម្លៃទំនិញនិងការកើនឡើងនៃពន្ធជាដើម៕
