ប្រជាជនអាហ្វហ្គានីស្ថានដើរតាមផ្លូវមានធ្លាក់ព្រិល នាពេលកន្លងទៅ។ AFP
ទីភ្នាក់ងារជនភៀសខ្លួនរបស់អង្គការសហប្រជាជាតិ បានព្រមានកាលពីពេលថ្មីនេះថា ជនជាតិអាហ្វហ្គានីស្ថានខ្លះ អាចនឹងស្លាប់ក្នុងលក្ខខណ្ឌដ៏អាក្រក់នៃរដូវរងានេះ ប្រសិនបើពួកគេគ្មានជម្រកនៅក្រោយរដ្ឋាភិបាលប៉ាគីស្ថានបណ្ដេញចេញពីប្រទេសទេនោះ។ យោងសេចក្តីរាយការណ៍នៃសារព័ត៌មាន AP។
ការព្រមាននេះធ្វើឡើងក្រោយប្រជាជនអាហ្វហ្គានីស្ថានជិតកន្លះលាននាក់ បានចាកចេញពីប្រទេសប៉ាគីស្ថានរាប់តាំងពីដើមខែតុលាមក ពោលគឺបន្ទាប់ពីរដ្ឋាភិបាលក្រុងអ៊ិស្លាម៉ាបាដ ចេញការប្រកាសចាប់ និងនិរទេសខ្លួនជនបរទេសណា ដែលរស់នៅក្នុងប្រទេសរបស់ខ្លួនដោយខុសច្បាប់។
ប៉ាគីស្ថាននិយាយការពារខ្លួនថា គោលនយោបាយរបស់រដ្ឋាភិបាលមិនកំណត់គោលដៅលើជនបរទេសណាមួយជាក់នោះទេ ទោះបីជាគេដឹងហើយថា ជនជាតិបរទេសខុសច្បាប់នៅប៉ាគីស្ថានភាគច្រើន គឺជាជនជាតិអាហ្វហ្គានីស្ថាន។
ការធ្វើមាតុភូមិនិវត្តន៍ដ៏ច្រើនសន្ធឹកបែបនេះ កំពុងដាក់សម្ពាធ លើប្រទេសអាហ្វហ្គានីស្ថាន និងភ្នាក់ងារជំនួយផ្សេងៗ ដែលកំពុងផ្ដល់សេវាកម្មសំខាន់ៗជាច្រើន រួមមានការថែទាំសុខភាពជាដើម ហើយការធ្លាក់ចុះនៃសីតុណ្ហភាពនារដូវរងា កំពុងតែដាក់បន្ទុកបន្ថែមទៀតដល់ស្ថានភាពតាមបណ្ដោយព្រំដែន ដែលអាក្រក់រួចស្រាប់ទៅហើយ។
ទីភ្នាក់ងារជនភៀសខ្លួនរបស់អង្គការសហប្រជាជាតិ បាននិយាយក្នុងរបាយការណ៍មួយដែលបានចេញផ្សាយកាលពីថ្ងៃសុក្រថា៖«ជនភៀសខ្លួនអាហ្វហ្គានីស្ថានជាច្រើន ដែលត្រឡប់មកប្រទេសវិញ គឺងាយរងគ្រោះ រួមទាំងស្ត្រី និងកុមារ ដែលអាចបាត់បង់ជីវិតរបស់ពួកគេក្នុងរដូវរងាដ៏អាក្រក់នេះ ប្រសិនបើគ្មានជម្រកគ្រប់គ្រាន់ទេនោះ»។
ទីភ្នាក់ងារបន្តថា៖«ប្រជាជនដែលមកដល់ព្រំដែនអស់កម្លាំង ហើយត្រូវការជំនួយជាបន្ទាន់ រួមទាំងការលើកទឹកចិត្ត»។
ក្រុមគ្រួសារខ្លះ បានប្រាប់ថា ពួកគេព្រួយបារម្ភថា សីតុណ្ហភាពរដូវរងាកាន់តែត្រជាក់នៅតំបន់ខ្លះជាពិសេសតំបន់ភ្នំដែលអាចរារាំងពួកគេមិនឱ្យត្រឡប់ទៅផ្ទះវិញភ្លាមៗ។
AP កាលពីថ្ងៃអាទិត្យដោយដកស្រង់ទីភ្នាក់ងាររបស់ UN ដែលថា៖«មនុស្សជាច្រើនមានជំងឺ ឧទាហរណ៍ដូចជាជំងឺរលាកទងសួត ដោយសារអាកាសធាតុត្រជាក់ និងការធ្វើដំណើរដ៏លំបាកពីប៉ាគីស្ថាន»។
ទីភ្នាក់ងារបន្តថា៖«ពួកគេខ្លះ អត់មានរបស់របរ រួមទាំងសម្លៀកបំពាក់ ដូច្នេះហើយ ពួកគេមិនអាចការពារខ្លួនពីបញ្ហាទាំងនោះបានទេ»។
លើសពីនេះទៅទៀត ជនជាតិអាហ្វហ្គានីស្ថានខ្លះដែលវិលចូលស្រុកនាពេលនេះ មិនធ្លាប់រស់នៅក្នុងប្រទេសអាហ្វហ្គានីស្ថានទេ បើគិតទៅតាមជំនាន់ៗ។ បែបនេះហើយ ពួកគេគ្មានផ្ទះសំបែងកន្លែងសម្រាប់រស់នៅ ឬបាត់បង់ក្រុមគ្រួសារសាច់ញាតិ ដែលពួកគេអាចពឹងពាក់អាស្រ័យបាន៕
