ប្រធានាធិបតីចិន ស៊ី ជីនភីង និងនាយករដ្ឋមន្ត្រីវៀតណាម Pham Minh Chinh ក្នុងជំនួបទ្វេភាគីនៅហាណូយ។ AFP
ប្រធានាធិបតីចិនលោក ស៊ី ជីនពីង (Xi Jinping) បានទៅបំពេញទស្សនកិច្ចនៅវៀតណាមនៅក្បែរខាងខ្លួនដ៏កម្រកាលពីថ្ងៃទី ១២ ខែធ្នូឆ្នាំ ២០២៣ បានកោតសរសើរចំពោះទំនាក់ទំនងផ្នែកសន្តិសុខ និងពាណិជ្ជកម្មរវាងប្រទេសចិន និងវៀតណាម ខណៈពេលដែលវៀតណាមបានខិតទៅជិតមហាអំណាចអាមេរិកកាន់តែខ្លាំង។
វៀតណាមដែលជាភាគីជម្លោះជាមួយចិនលើការដណ្តើមកាន់កាប់កោះនៅសមុទ្រចិនខាងត្បូង បានក្លាយជាមជ្ឈមណ្ឌលផ្គត់ផ្គង់ពិភពលោកដ៏សំខាន់សម្រាប់បណ្ដាក្រុមហ៊ុនធំៗរបស់លោកខាងលិចដែលស្វែងរកទីតាំងថ្មីជំនួសឱ្យសង្វាក់ផលិតកម្មដែលពឹងផ្អែកលើប្រទេសចិន។
នេះគឺជាដំណើរទស្សនកិច្ចលើកទី៣ របស់ប្រធានាធិបតីចិនចាប់តាំងពីលោកចូលកាន់តំណែងជាង ១០ ឆ្នាំមកនេះ។ ដំណើរទស្សនកិច្ចនេះហាក់ដូចជាមានបំណងចង់បំបែកភាពស្និទ្ធស្នាលកាន់តែខ្លាំងឡើងរវាងអាមេរិកនិងវៀតណាម ជាពិសេសបន្ទាប់ពីដំណើរទស្សនកិច្ចរបស់ប្រធានាធិបតីអាមេរិក លោក ចូ បៃដិន (Joe Biden) នៅវៀតណាមកាលពីខែកញ្ញា។
លោក ស៊ី បានលើកឡើងនៅក្នុងអត្ថបទបោះពុម្ពផ្សាយមួយថា៖ «ចិនគឺជាដៃគូពាណិជ្ជកម្មដ៏ធំបំផុតរបស់វៀតណាមជាយូរមកហើយ រីឯវៀតណាមគឺជាដៃគូពាណិជ្ជកម្មដ៏ធំបំផុតរបស់ចិននៅក្នុងអាស៊ាន»។ យោងតាមទីភ្នាក់ងារព័ត៌មានចិនស៊ីនហួ (Xinhua)។
បើទោះបីជាចិនធ្លាប់មានជម្លោះជាមួយវៀតណាមកន្លងមកក៏ដោយ ប៉ុន្តែលោក ស៊ី បានលើកឡើងថា៖ «មានតែប្រទេសទាំងអស់យល់ព្រមអភិវឌ្ឍទៅមុខជាមួយគ្នា ទើបយើងអាចរួមគ្នាកសាងមាតុភូមិអាស៊ីដែលឱ្យមានសន្តិភាព ភាពស្ងប់ស្ងាត់ វិបុលភាព ភាពស្រស់ស្អាត និងការរួមរស់ជាមួយគ្នាប្រកបដោយមិត្តភាព»។
ដំណើរទស្សនកិច្ចនេះធ្វើឡើងចំពេលមានការខ្វែងគំនិតគ្នាជាពិសេសទាក់ទងនឹងការទាមទារចង់គ្រប់គ្រងតំបន់ដែនសមុទ្រចិនខាងត្បូង។
ពាណិជ្ជកម្មរបស់មហាយក្សចិនជាមួយអាស៊ាន ដូចជា ឥណ្ឌូនេស៊ី សិង្ហបុរី និងថៃជាដើម បានវ៉ាដាច់សហរដ្ឋអាមេរិក និងសហភាពអឺរ៉ុប ដែលធ្វើឱ្យអាស៊ានបានក្លាយជាដៃគូពាណិជ្ជកម្មធំបំផុតរបស់ចិន។
កាលពីខែកញ្ញា លោក បៃដិន បានចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រគ្រប់ជ្រុងជ្រោយជាមួយវៀតណាម ដែលជាកិច្ចព្រមព្រៀងមួយដែលរដ្ឋាភិបាលក្រុងហាណូយ ធ្លាប់ចង់ធ្វើជាមួយតែប្រទេសចិន រុស្ស៊ី ឥណ្ឌា និងកូរ៉េខាងត្បូងប៉ុណ្ណោះ។
លោកស្រី ហួង ឡឺធូ (Huong Le Thu) នាយករងកម្មវិធីអាស៊ីសម្រាប់ក្រុមវិបត្តិអន្តរជាតិ (AICG) បានសរសើរភាពជាដៃគូកម្រិតខ្ពស់របស់វៀតណាមជាមួយអាមេរិកនិងចិន បើទោះបីជាពួកគេធ្លាប់មានជម្លោះកន្លងមកក៏ដោយ។
លោកស្រីបានហៅស្ថានភាពបែបនេះថាជាសមិទ្ធផលការទូត។ ប្រព័ន្ធផ្សព្វផ្សាយរដ្ឋរបស់វៀតណាមបានរាយការណ៍ថា ចិននិងវៀតណាមគ្រោងនឹងចុះហត្ថលេខាលើកិច្ចព្រមព្រៀងជាច្រើនដែលរួមមានវិស័យការពារជាតិ សន្តិសុខ កិច្ចសហប្រតិបត្តិការលើដែនសមុទ្រ ពាណិជ្ជកម្ម ការវិនិយោគ កសិកម្ម និងវិស័យជាច្រើនទៀត។
ក្នុងអំឡុងដំណើរទស្សនកិច្ចលោក ស៊ី ក៏បានលើកឡើងអំពីភាពជាដៃគូសេដ្ឋកិច្ចរបស់ប្រទេសចិនក្នុងវិស័យផ្សេងៗរួមមានវិស័យដឹកជញ្ជូន ថាមពល ការអភិវឌ្ឍហេដ្ឋារចនាសម្ព័ន្ធ និងការបង្ហាញគម្រោងមួយចំនួនដូចជា ផ្លូវរថភ្លើងធុនស្រាលហាណូយ ២ ព្រមទាំងកិច្ចសហប្រតិបត្តិការក្នុងវិស័យថាមពលពន្លឺព្រះអាទិត្យផងដែរ។
ដំណើរទស្សនកិច្ចរបស់លោក ស៊ី នៅប្រទេសវៀតណាម គឺដើម្បីទទួលបានការគាំទ្រគំនិតផ្តួចផ្តើមជាសកលរបស់ប្រទេសចិន នោះគឺគម្រោងខ្សែក្រវាត់ និងផ្លូវដែលជាការប្រកួតប្រជែងជាមួយសហរដ្ឋអាមេរិក ក្នុងការបង្កើតពិភពលោកមួយដែលមានប្រព័ន្ធដឹកនាំពហុប៉ូល។
ទន្ទឹមនេះ ចិនកំពុងព្យាយាមកែលម្អទំនាក់ទំនងជាមួយហ្វីលីពីន ដើម្បីធ្វើឱ្យតំបន់អាស៊ីអាគ្នេយ៍មើលទៅមានសាមគ្គីភាពជាងមុន។ ប្រទេសអាស៊ាន៥ធ្លាប់ប្រតិកម្មនឹងចិន ក្រោយបញ្ចេញផែនទីថ្មីមួយដែលក្រសោបតំបន់ជម្លោះ៕
