នាវាមុខទឹកតៃវ៉ាន់ដែលទទួលបានគ្រឿងផ្គត់ផ្គង់ពីក្រុមហ៊ុនអាមេរិក ចក្រភពអង់គ្លេសជាដើម។ AFP
ប្រទេសចិន បានបង្ហាញការប្តេជ្ញាកាលពីថ្ងៃទី១៨ ខែធ្នូ ថានឹងចាត់វិធានការប្រឆាំងចំពោះក្រុមហ៊ុនណាដែលជាប់ពាក់ព័ន្ធនឹងការលក់អាវុធទៅឱ្យតៃវ៉ាន់ បន្ទាប់ពីសហរដ្ឋអាមេរិកបានយល់ព្រមលើកិច្ចព្រមព្រៀងចំនួន ៣០០ លានដុល្លារអាមេរិក ដើម្បីពង្រឹងការការពារដែនកោះនេះ។
ប្រទេសចិនចាត់ទុកតៃវ៉ាន់ជាផ្នែកនៃទឹកដីរបស់ខ្លួន ហើយបានសន្យាថានឹងដណ្តើមយកវាមកនៅក្រោមការគ្រប់គ្រងរបស់ខ្លួននៅថ្ងៃណាមួយសូម្បីការប្រើប្រាស់កម្លាំងក៏ដោយ ខណៈពេលដែលសភាអាមេរិកទាមទារការផ្គត់ផ្គង់អាវុធដល់ដែនដីកោះដែលគ្រប់គ្រងខ្លួនឯងតាមបែបលទ្ធិប្រជាធិបតេយ្យសម្រាប់ការពារខ្លួន។
តាមទីភ្នាក់ងារព័ត៌មានបារាំង ក្រសួងការបរទេសសហរដ្ឋអាមេរិកកាលពីសប្តាហ៍មុនបានអនុម័តកញ្ចប់សព្វាវុធដែលភាគីទាំងពីរបាននិយាយថានឹងពង្រឹងប្រព័ន្ធបញ្ជា និងគ្រប់គ្រងសមរភូមិរួមគ្នារបស់តៃប៉ិ។
ក្រុងប៉េកាំងបានវាយបកវិញនៅថ្ងៃទី ១៨ខែធ្នូ ដោយនិយាយថា ខ្លួននឹងចាត់វិធានការឱ្យខ្លាំងក្លាដើម្បីការពារអធិបតេយ្យភាពជាតិ និងបូរណភាពទឹកដីរបស់ខ្លួន។
អ្នកនាំពាក្យក្រសួងការបរទេសចិនលោក Wang Wenbin បាននិយាយនៅក្នុងសន្និសីទសារព័ត៌មានជាទៀងទាត់ថា៖«យើងនឹងចាត់វិធានការប្រឆាំងនឹងក្រុមហ៊ុនណាមួយពាក់ព័ន្ធដែលចូលដៃនឹងការលក់អាវុធទៅឱ្យតៃវ៉ាន់»។
លោកបានបន្ថែមថា សហរដ្ឋអាមេរិកគួរតែបញ្ឈប់និន្នាការដ៏គ្រោះថ្នាក់នៃការបំពាក់អាវុធដល់តៃវ៉ាន់ បញ្ឈប់ការបង្កើតភាពតានតឹងនៅច្រកសមុទ្រតៃវ៉ាន់ និងបញ្ឈប់ការរំជួលចិត្ត និងគាំទ្រកងកម្លាំងផ្តាច់ខ្លួននៃឯករាជ្យភាពតៃវ៉ាន់ក្នុងដំណើរស្វែងរកឯករាជ្យរបស់ពួកគេដោយកម្លាំង។
លោក បានបន្តថា៖«នៅទីបំផុត ចិននឹងបង្រួបបង្រួមគ្នាឡើងវិញ ហើយពិតណាស់ត្រូវតែបង្រួបបង្រួមគ្នាឡើងវិញ»។
ទីក្រុងប៉េកាំងបានបង្កើនសម្ពាធម្តងហើយម្តងទៀតលើកោះតៃវ៉ាន់ ចាប់តាំងពីប្រធានាធិបតី Tsai Ing-wen ឡើងកាន់អំណាចក្នុងឆ្នាំ២០១៦ ហើយសម្ពាធកើនឡើងខ្លាំងពីមួយលើកទៅមួយលើក។ វាស្ទើរតែផ្ទុះសង្គ្រាមក្នុងឆ្នាំ២០២២ ពេលដែលប្រធានសភាអាមេរិកទៅទស្សនកិច្ចនៅតៃវ៉ាន់៕
