AFP
ជនចំណាកស្រុករាប់ពាន់នាក់បានធ្វើដំណើរទៅដល់ទីក្រុង Alvaro Obregon នៅភាគខាងត្បូងនៃប្រទេសម៉ិកស៊ិកកាលពីថ្ងៃទី ២៤ ខែធ្នូ ហើយបានចំណាយពេលវេលាបុណ្យណូអែលរបស់ខ្លួននៅលើទីលានសាធារណៈដោយគ្មានទីជម្រកមុនពេលបន្តដំណើរដើម្បីឆ្លងប្រទេស និងឆ្ពោះទៅកាន់ព្រំដែនសហរដ្ឋអាមេរិក។
ក្រុមជនចំណាកស្រុកដែលភាគច្រើនមកពីអាមេរិកកណ្តាលនិងតំបន់ការ៉ាប៊ីនភាគច្រើនបានដើរចម្ងាយ១៥គីឡូម៉ែត្រពីទីក្រុង Tapachula ភាគខាងត្បូងព្រំដែនម៉ិកស៊ិកដើម្បីឆ្ពោះទៅទីក្រុង Alvaro Obregon ព្រមជាមួយនឹងគម្រោងចេញដំណើរម្តងទៀតនៅម៉ោង ៤ ភ្លឺនៅថ្ងៃបន្ទាប់។
សកម្មជនសិទ្ធិជនចំណាកស្រុកលោក Luis Garcia Villagran បានជំរុញថា ជនចំណាកស្រុកមិនគួរត្រូវបានក្លាយជាឧបករណ៍នយោបាយសម្រាប់ការបោះឆ្នោតប្រធានាធិបតីសហរដ្ឋអាមេរិកនាពេលខាងមុខនោះទេដោយលោកអះអាងថាក្រុមរបស់ខ្លួននឹងបន្តដើរដោយមិនឈប់ទេ។
បើតាមអាជ្ញាធរមូលដ្ឋានបានប៉ាន់ប្រមាណថា ទំហំនៃក្បួនដើរនេះមានមនុស្សជាមធ្យមប្រហែល ៨ ពាន់នាក់ក្នុង ១ ថ្ងៃ។ បើតាមសាក្សីម្នាក់ដែលធ្វើដំណើរជាមួយក្បួននេះបានថ្លែងប្រាប់សារព័ត៌មាន Reuters ថា ជនចំណាកស្រុកភាគច្រើនមកពីអាមេរិកកណ្តាលនិងខាងត្បូងហើយក៏មានតំបន់ការីប៊ីនផងដែរ។
ចំណែកជនចំណាកស្រុកជនជាតិហៃទីម្នាក់ឈ្មោះ Ysguel Jean ដែលកំពុងកាន់ឈើឆ្កាងពណ៌សជាមួយអក្សរសរសេរថា «ព្រះយេស៊ូគ្រីស្ទ» បាននិយាយថា លោកបានចាកចេញពីប្រទេសកំណើតដោយសារតែបញ្ហាឧក្រិដ្ឋកម្ម និងអំពើពុករលួយដ៏ច្រើនសន្ធឹកសន្ធាប់ហើយម្យ៉ាងដោយសារតែលោកចង់ឱ្យកូនស្រីទាំង ២ របស់ខ្លួនមានអនាគតប្រសើរជាងនេះ។
លោក Ysguel Jean បញ្ជាក់ថា៖ «៣ ខែនៅទីក្រុង Tapachula ខ្ញុំព្យាយាមស្នើសុំឯកសារហើយខ្ញុំនៅតែគ្មានលទ្ធផលអ្វីសោះ ខ្ញុំធុញទ្រាន់នឹងការរង់ចាំនៅ Tapachulaពួកយើងឃ្លានហើយមិនអាចរកប្រាក់ចំណូលបានសោះឡើយ។ ដូចអ្នកដទៃដែរខ្ញុំចង់ទៅដល់ទឹកដីសហរដ្ឋអាមេរិក»។
កាលពីឆ្នាំ ២០១៨ និង ២០១៩ ក្បួនដើរធំៗភាគច្រើនជាជនជាតិអាមេរិកកណ្តាល បានឆ្លងកាត់ម៉ិកស៊ិក ទៅដល់សហរដ្ឋអាមេរិកហើយប៉ុន្មានឆ្នាំថ្មីៗកន្លងទៅនេះសកម្មភាពទាំងនេះត្រូវបានបន្តធ្វើដោយក្រុមដើរក្បួនតូចៗជំនួសវិញ៕
