នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ AFP
នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នាថ្ងៃទី២៦ ខែធ្នូ បានបញ្ជាក់ពីជំហរក្នុងការបន្តប្រយុទ្ធជាមួយក្រុមឧទ្ទាមហាម៉ាស់ ប៉ុន្តែ ប្រធានក្រុមមនុស្សធម៌អង្គការសហប្រជាជាតិព្រួយបារម្ភចំពោះបញ្ហាសុវត្ថិភាពរបស់ប្រជាជនប៉ាឡេស្ទីន។
លោកនាយករដ្ឋមន្ត្រី បានបញ្ជាក់ទៀតថា ផែនការក្នុងការទាមទារការដោះលែងចំណាប់ខ្មាំងអ៊ីស្រាអែលច្បាស់ជាមិនអាចជោគជ័យនោះទេ ប្រសិនបើអ៊ីស្រាអែលមិនដាក់សម្ពាធយោធាលើក្រុមហាម៉ាស់។
បើទោះបីជាមានការអំពាវនាវពីអន្តរជាតិសម្រាប់បទឈប់បាញ់ក្ដីអ៊ីស្រាអែលនៅតែប្រកាន់ជំហររបស់ខ្លួនយ៉ាងខ្ជាប់ខ្ជួននិងថា ខ្លួនមិនឈប់នោះទេពោលគឺសង្គ្រាមនេះនឹងនៅតែបន្តរហូតដល់ទីបញ្ចប់សមស្របណាមួយ។
ជំហរដ៏រឹងទទឹងនាពេលនេះត្រូវបានអ៊ីស្រាអែលចាត់ទុកថាជាការសងសឹកប្រឆាំងនឹងក្រុមឧទ្ទាមហាម៉ាស់ដែលបានវាយលុកទឹកដីខ្លួនកាលពីថ្ងៃទី៧ ខែតុលាកន្លងទៅ។ប៉ុន្តែសម្រាប់អន្តរជាតិសកម្មភាពវាយតបតរបស់អ៊ីស្រាអែលជាសកម្មភាពជ្រុលហួសហេតុដោយបានសម្លាប់ជីវិតប្រជាជនប៉ាឡេស្ទីនស្លូតត្រង់ជាច្រើននាក់។
ការណ៍នេះបាននាំឱ្យអាមេរិកដែលជាសម្ព័ន្ធមិត្តដ៏ជិតស្និទ្ធបំផុតក៏សម្រេចចិត្តដាក់សម្ពាធលើអ៊ីស្រាអែលដើម្បីជួយសង្គ្រោះជីវិតប្រជាជនស៊ីវិលផងដែរ។
អ្នកស្រី Gemma Connell ប្រធានក្រុមរបស់អង្គការសហប្រជាជាតិដែលបានចុះទៅកាន់តំបន់ហ្គាហ្សាអស់រយៈពេលជាច្រើនសប្តាហ៍បានចាត់ទុកសកម្មភាពជម្លៀសប្រជាជនស៊ីវិលជាច្រើនដងនេះថាប្រៀបបានទៅនឹង «ល្បែងអុក» ដូច្នោះដែរ។
អ្នកស្រីបន្តថាប្រជាជនត្រូវផ្លាស់ទីចុះឡើងៗដោយមិនទាន់ដឹងថាតំបន់ណាជាតំបន់មានសុវត្ថិភាពពិតប្រាកដនោះទេ។
ប៉ុន្តែយ៉ាងណាអ្នកនាំពាក្យយោធាបាននិយាយថាក្រុមយោធាបានស្វះស្វែងជម្លៀសជនស៊ីវិលចេញពីតំបន់ក្ដៅដែរប៉ុន្តែក្រុមហាម៉ាស់ព្យាយាមរារាំងប្រតិបត្តិការនេះហើយពួកគេព្យាយាមប្រើប្រាស់ប្រជាជនស៊ីវិលជាខែលការពារខ្លួន។
ក្រុងវ៉ាស៊ីនតោនបានដាក់សម្ពាធជាច្រើនសប្តាហ៍មកលើអ៊ីស្រាអែលឱ្យចាត់វិធានការបន្ថែមទៀតដើម្បីកាត់បន្ថយការបង្កគ្រោះថ្នាក់ដល់ជនស៊ីវិលដោយកំណត់តំបន់សុវត្ថិភាពនិងបើកផ្លូវមនុស្សធម៌សម្រាប់ប្រជាជនក្នុងការរត់គេចខ្លួន។ប៉ុន្តែចំនួនអ្នកស្លាប់នៅតែបន្តកើនឡើងរីឯប្រតិបត្តិការរបស់អ៊ីស្រាអែលក៏កាន់តែខ្លាំងឡើង៕
