តារាកំប្លែង និងជាពិធីករទូរទស្សន៍ Hitoshi Matsumoto ដែលរងការចោទប្រកាន់។ Instagram
យោងតាមការផ្សាយរបស់ទីភ្នាក់ងារព័ត៌មានបារាំង AFP ភ្នាក់ងារតំណាងតារាកំប្លែងដ៏មានប្រជាប្រិយ បាននិយាយថា តារាកំប្លែងដ៏មានទេពកោសល្យនិងប្រជាប្រិយភាពម្នាក់របស់ប្រទេសជប៉ុនបានបដិសេធការចោទប្រកាន់ពីបទរំលោភផ្លូវភេទដែលត្រូវបានបោះពុម្ពផ្សាយនៅក្នុងទស្សនាវដ្តីដ៏ល្បីល្បាញមួយកាលពីថ្ងៃទី២៧ខែធ្នូ ដោយបន្ថែមថា ខ្លួនកំពុងពិចារណាលើចំណាត់ការតាមផ្លូវច្បាប់។
ភ្នាក់ងាររបស់អ្នកកំប្លែងរូបនោះ បាននិយាយនៅក្នុងសេចក្តីថ្លែងការណ៍មួយថា៖«មិនមានការពិតអ្វីទាំងអស់» នៅក្នុងការចោទប្រកាន់ដែលចេញផ្សាយដោយ Shukan Bunshun ប្រចាំសប្តាហ៍ប្រឆាំងនឹងតារាកំប្លែង និងជាពិធីករទូរទស្សន៍ Hitoshi Matsumoto។
សេចក្តីរាយការណ៍របស់ទស្សនាវដ្តី Bunshun បានដកស្រង់សម្តីស្ត្រីពីរនាក់ដែលចោទប្រកាន់លោក Matsumoto ដែលបច្ចុប្បន្នមានអាយុ៦០ឆ្នាំបានបង្ខំពួកគេឱ្យធ្វើសកម្មភាពផ្លូវភេទនៅឯពិធីជប់លៀងឯកជននៅឯសណ្ឋាគារលំដាប់ខ្ពស់នៃទីក្រុងតូក្យូក្នុងឆ្នាំ២០១៥។
ក្នុងចំណោមការអះអាងនោះ មានស្ត្រីម្នាក់បានចោទប្រកាន់ថាបានបង្ខំឱ្យរួមភេទតាមមាត់ និងម្នាក់ទៀតថានាងត្រូវបានគេថើបដោយបង្ខំ។
ទីភ្នាក់ងារ Yoshimoto Kogyo បាននិយាយថាអត្ថបទ «ធ្វើឱ្យខូចកេរ្តិ៍ឈ្មោះរបស់ (Matsumoto) នៅក្នុងសង្គមយ៉ាងធ្ងន់ធ្ងរ»។
ក្រុមហ៊ុនភ្នាក់ងារនេះនឹង «ធ្វើការតវ៉ាយ៉ាងម៉ឺងម៉ាត់» ប្រឆាំងនឹងទស្សនាវដ្តី Bunshun រួមទាំងវិធីដែលខ្លួន «សួរដេញដោល និងថត»តារាកំប្លែងដែលនាំមុខគេក្នុងការបោះពុម្ពរបាយការណ៍នេះ។
សេចក្តីថ្លែងការណ៍បាននិយាយថា៖«យើងកំពុងពិចារណាលើវិធានការផ្លូវច្បាប់»។
នៅពេលត្រូវបានទាក់ទងដោយ AFP ការិយាល័យទំនាក់ទំនងសាធារណៈរបស់ Yoshimoto Kogyo បានបដិសេធមិនធ្វើអត្ថាធិប្បាយបន្ថែមទេ។
លោក Matsumoto គឺជាពាក់កណ្តាលនៃក្រុមកំប្លែងដែលគេស្គាល់ថាជា Downtown ដែលជាឈ្មោះគ្រួសារនៅក្នុងប្រទេសជប៉ុន។ ចំណែកទស្សនាវដ្តី Bunshun គឺជាការបោះពុម្ភផ្សាយដំបូងបង្អស់ដែលរាយការណ៍តាំងពីឆ្នាំ ១៩៩៩ មកលើរឿងអាស្រូវរំលោភបំពានផ្លូវភេទ ដែលបានអង្រួនឧស្សាហកម្មកម្សាន្តរបស់ប្រទេសជប៉ុនកាលពីដើមឆ្នាំនេះ៕
