ជនភៀសខ្លួនរ៉ូហ៊ីងយ៉ា រាប់រយនាក់មកពីមីយ៉ាន់ម៉ា នៅទីក្រុង Banda Aceh ប្រទេសឥណ្ឌូនេស៊ី។ AFP
ក្រុមសិស្សនិស្សិតឥណ្ឌូនេស៊ីមួយក្រុម កាលពីថ្ងៃពុធទី២៧ ខែធ្នូ បាននាំគ្នាសម្រុកចូលកន្លែងស្នាក់នៅបណ្ដោះអាសន្នរបស់ជនភៀសខ្លួនរ៉ូហ៊ីងយ៉ា រាប់រយនាក់មកពីមីយ៉ាន់ម៉ា នៅទីក្រុង Banda Aceh ដោយទាមទារឱ្យអាជ្ញាធរឥណ្ឌូនេស៊ីនិរទេសពួកគេចេញ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ប៉ូលិសក្រុង Banda Aceh មិនបានឆ្លើយតបភ្លាមៗទេ លើបញ្ហានេះ។ ខ្សែអាត់វីដេអូ ដែលគេចែកចាយលើបណ្ដាញសង្គម បានបង្ហាញសិស្សនិស្សិតជាច្រើននាក់ ពាក់អាវពណ៌បៃតង រត់សម្រុកចូលទៅក្នុងបន្ទប់ក្រោមដីដ៏ធំរបស់អគារនៃកន្លែងដែលជនភៀសខ្លួនរ៉ូហ៊ីងយ៉ាទាំងបុរស ស្ត្រី និងកុមារ កំពុងអង្គុយលើឥដ្ឋ ដោយខ្លះយំ ខ្លះទៀតភ័យខ្លាច។
និស្សិតឈ្មោះ Wariza Anis Munandar អាយុ២៣ឆ្នាំ បានអំពាវនាវប្រាប់អ្នកសារព័ត៌មាននៅកន្លែងប្រមូលផ្ដុំតវ៉ា សុំឱ្យរដ្ឋាភិបាលនិរទេសជនជាតិរ៉ូហ៊ីងយ៉ាពីក្រុង Banda Aceh។
និស្សិតដែលជាបាតុករម្នាក់ទៀត ឈ្មោះ Della Masrida អាយុ ២០ឆ្នាំ បាននិយាយយ៉ាងដូច្នេះថា៖«ពួកគេធ្វើរឿងដែលមិនគួរឱ្យយល់ជាច្រើន រួមទាំងការទាមទារសុំឱ្យមានជម្រក និងអាហារឱ្យប្រសើរជាងអ្វីដែលពួកគេកំពុងទទួលបាន។ ពួកគេមកទីនេះដោយគ្មានអ្នកអញ្ជើញ។ ពួកគេធ្វើដូចជាទីនេះ ជាប្រទេសរបស់ពួកគេ»។
ជនភៀសខ្លួនរ៉ូហ៊ីងយ៉ាបានជួបប្រទះនឹងការមិនពេញចេញពីសំណាក់ប្រជាជនឥណ្ឌូនេស៊ីកាន់តែខ្លាំង ស្របពេលដែលចំនួនទូកជនភៀសខ្លួនរ៉ូហ៊ីងយ៉ាពីមីយ៉ាន់ម៉ា ក៏កាន់តែច្រើន។
ប្រធានាធិបតីឥណ្ឌូនេស៊ី លោក ចូកូ វីដូដូ បានស្តីបន្ទោសការកើនឡើងនៃការមកដល់ឥណ្ឌូនេស៊ីរបស់ជនភៀសខ្លួនរ៉ូហ៊ីងយ៉ានាពេលថ្មីៗនេះ ទៅលើការជួញដូរមនុស្ស ហើយបានសន្យាថានឹងធ្វើការជាមួយអង្គការអន្តរជាតិដើម្បីផ្តល់ជម្រកបណ្តោះអាសន្ន។
តាមធម្មតា ការមកដល់បែបនេះកើនឡើងនៅចន្លោះខែវិច្ឆិកា និងខែមេសា នៅពេលដែលទឹកសមុទ្រស្ងប់ស្ងាត់ ដោយជនជាតិរ៉ូហ៊ីងយ៉ានៅមីយ៉ាន់ម៉ាជិះទូកទៅកាន់ប្រទេសថៃនិងឥណ្ឌូណេស៊ី ក៏ដូចជាម៉ាឡេស៊ី។
ជុំវិញបាតុកម្មរបស់សិស្សនិស្សិត អ្នកនាំពាក្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនឥណ្ឌូនេស៊ី (UNHCR) មិនបាននិយាយយ៉ាងណាភ្លាមៗទេ ប៉ុន្តែធ្លាប់លើកឡើងថា ខ្លួនមានការតក់ស្លុតនឹងរបាយការណ៍ស្ដីពីការបដិសេធជនជាតិរ៉ូហ៊ីងយ៉ា ពីសំណាក់ប្រជាជនក្នុងស្រុកឥណ្ឌូនេស៊ី។
ឥណ្ឌូនេស៊ី មិនមែនជាហត្ថលេខីនៃអនុសញ្ញាអង្គការសហប្រជាជាតិស្តីពីជនភៀសខ្លួនឆ្នាំ១៩៥១ នោះទេ ប៉ុន្តែកន្លងមក ប្រទេសនេះបានទទួលយកជនភៀសខ្លួនប្រសិនបើពួកគេមកដល់ប្រទេសរបស់ខ្លួន៕
