ដំណាំកញ្ឆាត្រូវគេតាំងបង្ហាញក្នុងកម្មវិធីប្រកួតប្រជែងមួយនៅបាងកកក្នុងខែធ្នូ ឆ្នាំ២០២២។ AFP
ព្រះរាជាណាចក្រថៃកំពុងស្វែងរកធាតុចូលបន្ថែមពីសាធារណជនទៅលើសេចក្ដីព្រាងច្បាប់ដ៏ចម្រូងចម្រាសមួយដែលបានស្នើឡើងស្ដីពីការហាមឃាត់ការប្រើប្រាស់កញ្ឆាក្នុងគោលបំណងកម្សាន្ត បន្ទាប់ពីប្រទេសមួយនេះបានអនុញ្ញាតឱ្យមានការប្រើប្រាស់កញ្ឆាដោយស្របច្បាប់រយៈពេល ១ ឆ្នាំមកហើយ ដែលជាហេតុបង្កឱ្យមានអាជីវកម្មកញ្ឆារីកដុះដាលខ្លាំងដោយសារភាពធូររលុងនៃច្បាប់ និងបទប្បញ្ញត្តិពាក់ព័ន្ធ។
ប្រទេសថៃគឺជាប្រទេសនៅតំបន់អាស៊ីអាគ្នេយ៍ដំបូងគេ ដែលបានចាត់ទុកការប្រើប្រាស់កញ្ឆាថាជារឿងស្របច្បាប់នៅឆ្នាំ ២០២១។ ការណ៍នេះបានផ្តល់ឱកាសដល់ឧស្សាហកម្មក្នុងវិស័យនេះ រីកចម្រើនយ៉ាងឆាប់រហ័ស។ យោងតាមការប៉ាន់ស្មានជាបឋម ឧស្សាហកម្មប្រភេទនេះអាចនឹងកើនឡើងរហូតដល់ទៅ ១,២ ពាន់លានដុល្លារនៅប៉ុន្មានឆ្នាំខាងមុខនេះ។ជាក់ស្ដែង ការរីកចម្រើននេះគឺកើតមាននៅតាមកន្លែងលក់ថ្នាំ ស្ប៉ា ភោជនីយដ្ឋាន និងពិធីបុណ្យផ្សេងៗជាច្រើន។
សេចក្ដីព្រាងច្បាប់ខាងលើនេះ បង្កើតឡើងដោយប្រញាប់ប្រញាល់ និងមានលក្ខណៈមិនពេញលេញនៅឡើយទេ។ ជារួម ច្បាប់នេះបង្កើតឡើងដើម្បីហាមឃាត់ការប្រើប្រាស់កញ្ឆាច្រើនដោយសេរីហួសហេតុជ្រុលនៅក្នុងប្រទេសថៃ។ ម្យ៉ាងទៀត ច្បាប់ថ្មីនេះបានលេចរូបរាងឡើងបន្ទាប់ពីនាយករដ្ឋមន្ត្រីថៃ លោក សេដ្ឋា ថាវីស៊ីន បានអះអាងប្រឆាំងការប្រើប្រាស់កញ្ឆា ដោយសារតែការព្រួយបារម្ភអំពីការឈានទៅដល់ការប្រើប្រាស់គ្រឿងញៀន ហើយរដ្ឋាភិបាលរបស់លោកគ្រាន់តែចង់ឱ្យការប្រើប្រាស់កញ្ឆាសម្រាប់គោលបំណងវេជ្ជសាស្ត្រតែប៉ុណ្ណោះ។
រដ្ឋមន្ត្រីក្រសួងសុខាភិបាលថៃលោក ឆូលណាន ស្រ៊ីកែវ (Cholnan Srikaew) បាននិយាយនៅក្នុងសន្និសីទ សារព័ត៌មាននាពេលថ្មីៗនេះថា៖«យើងបានបង្កើតច្បាប់នេះដើម្បីការពារមិនឱ្យមានការប្រើប្រាស់កញ្ឆាដែលមិនត្រឹមត្រូវ។ ការប្រើប្រាស់កញ្ឆាដើម្បីកម្សាន្តណាមួយត្រូវបានចាត់ទុកថាជារឿងខុស»។
យោងតាមសេចក្តីព្រាងច្បាប់ចុងក្រោយបង្អស់ដែលបានចុះផ្សាយនៅក្នុងគេហទំព័ររបស់ក្រសួងសុខាភិបាលនៅថ្ងៃអង្គារទី ៩ ខែមករា ថៃនឹងអនុញ្ញាតឱ្យប្រើប្រាស់កញ្ឆាក្នុងគោលបំណងវេជ្ជសាស្ត្រ និងសុខភាពតែប៉ុណ្ណោះដោយឡែកការប្រើប្រាស់ក្នុងទម្រង់កម្សាន្ត គឺត្រូវបានហាមឃាត់។
ច្បាប់ថ្មីនេះក៏បានកំណត់ការផាកពិន័យរហូតដល់ ៦ម៉ឺនបាត ស្មើនឹង ១ ៧០០ ដុល្លារអាមេរិកសម្រាប់អ្នកប្រើប្រាស់កញ្ឆាដើម្បីកម្សាន្ត។ លើសពីនេះយុទ្ធនាការផ្សាយពាណិជ្ជកម្មឬការធ្វើទីផ្សារទាក់ទងនឹងការប្រើប្រាស់កញ្ឆាអាចនឹងត្រូវជាប់ពន្ធនាគាររហូតដល់ ១ ឆ្នាំ ឬពិន័យជាប្រាក់រហូតដល់ ១ សែនបាត។
ច្បាប់ថ្មីនេះទៀតសោត ក៏នឹងបង្កើនការផាកពិន័យចំពោះការដាំដំណាំកញ្ឆាដែលមិនមានការអនុញ្ញាតដោយដាក់ទោសជាប់ពន្ធនាគារពី ១ ឆ្នាំទៅ ៣ ឆ្នាំ និងពិន័យជាប្រាក់ពី ២ ម៉ឺនបាតទៅ ៣ សែនបាត។រដ្ឋាភិបាលថៃបើកទទួលមតិសាធារណៈរហូតដល់ថ្ងៃទី ២៣ ខែមករា៕
