នាយកដ្ឋានពន្ធនាគារថៃ អនុញ្ញាតឱ្យលោក ថាក់ស៊ីន បន្តសម្រាកនៅមន្ទីរពេទ្យ។ AFP
នៅថ្ងៃទី១១ ខែមករា ឆ្នាំ២០២៤ អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដែលបច្ចុប្បន្នកំពុងមានឈ្មោះជាប់ពន្ធនាគារ ត្រូវបានអនុញ្ញាតឱ្យស្នាក់នៅក្នុងមន្ទីរពេទ្យបន្តទៀត ដើម្បីថែទាំសុខភាព។ នេះបើយោងតាមនាយកដ្ឋានពន្ធនាគារបានលើកឡើងដោយផ្អែកលើភាពចាំបាច់ដើម្បីតាមដានសុខភាពរបស់លោក ថាក់ស៊ីន ឱ្យបានដិតដល់។
អតីតមេដឹកនាំគណបក្សភឿថៃដែលជាបក្សកំពុងកាន់អំណាច បានសម្រាកព្យាបាលនៅមន្ទីរពេទ្យប៉ូលិសចាប់តាំងពីខែសីហា បន្ទាប់ពីលោកបានវិលត្រឡប់ពីការនិរទេសខ្លួនអស់រយៈពេល ១៥ ឆ្នាំនៅបរទេស។ លោកបានត្អូញត្អែរពីអាការ តឹងទ្រូង និងសម្ពាធឈាមខ្ពស់ភ្លាមៗបន្ទាប់ពីចូលដល់ពន្ធនាគារនៅទីក្រុងបាងកក ដែលជាកន្លែងដែលលោកត្រូវអនុវត្តទោសពន្ធនាគាររយៈពេល ៨ ឆ្នាំពីបទរំលោភអំណាច។
ការកាត់ទោសរបស់លោក ថាក់ស៊ីន ត្រូវបានកាត់បន្ថយមកត្រឹម ១ ឆ្នាំដោយបានទទួលការលើកលែងទោសពីព្រះ មហាក្សត្រ ហើយគាត់អាចត្រូវបានពិចារណាដាក់ឱ្យនៅក្រៅឃុំនៅចុងខែក្រោយនេះ។ នាយកដ្ឋានពន្ធនាគារបានសង្កត់ធ្ងន់លើភាពចាំបាច់សម្រាប់រូបលោក ក្នុងការដែលត្រូវនៅថែរក្សាសុខភាពដោយគ្រូពេទ្យឯកទេស ដើម្បីអាចព្យាបាលភ្លាមៗក្នុងករណីស្ថានភាពសុខភាពធ្ងន់ធ្ងរឈានដល់ការគំរាមកំហែងដល់អាយុជីវិត។
លោក ថាក់ស៊ីន មានអាយុ ៧៤ ឆ្នាំ ហើយលោកជាតួអង្គសំខាន់នៅក្នុងវិស័យនយោបាយថៃ ជាពិសេសភាពចលាចលដែលកើតមាននៅក្នុងប្រទេសថៃអស់រយៈពេល ១៧ ឆ្នាំមកនេះ។ ទោះបីជាលោកត្រូវបានបណ្តេញចេញដោយពួកយោធានៅឆ្នាំ២០០៦ និងត្រូវបានកាត់ទោសកំបាំងមុខពីបទទំនាស់ផលប្រយោជន៍ក៏ដោយ ក៏លោកបានដើរតួនាទីយ៉ាងសំខាន់ពីខាងក្រៅស្រុក ជាពិសេសក្នុងដំណើរការបង្កើតរដ្ឋាភិបាលជាបន្តបន្ទាប់ដែលដឹកនាំដោយគ្រួសាររបស់លោក និងសម្ព័ន្ធមិត្តដែលជាអ្នកធ្លាប់រកស៊ីធ្វើអាជីវកម្មជាមួយគ្នា។
មួយរយៈចុងក្រោយនេះ នាយកដ្ឋានពន្ធនាគារថៃត្រូវប្រឈមមុខនឹងការរិះគន់ ជុំវិញការជួយសម្រួលដល់ការស្នាក់នៅក្រៅឃុំរបស់លោក ថាក់ស៊ីន ក្រោមហេតុផលបញ្ហាសុខភាព។ ម៉្យាងវិញទៀត គណបក្សជំទាស់ថៃបានអះអាងថា លោក ថាក់ស៊ីន កំពុងគេចពីការអនុវត្តទោសក្នុងពន្ធនាគារ ហើយពួកគេបានទាមទារឱ្យមានការបង្ហាញកំណត់ត្រាវេជ្ជសាស្រ្តស្ដីពីស្ថានភាពជំងឺរបស់គាត់ជាសាធារណៈ។
មិនត្រឹមតែប៉ុណ្ណោះ ពលរដ្ឋថៃមួយចំនួនគ្រោងនឹងធ្វើបាតុកម្មតវ៉ានៅថ្ងៃសុក្រនេះ ដើម្បីប្រឆាំងនឹងលោក ថាក់ស៊ីន ដែលគេចពីការជាប់ពន្ធនាគារ ហើយគណៈកម្មាធិការប៉ូលិសសភាថៃ ក៏កំពុងធ្វើការស៊ើបអង្កេតលើបញ្ហាមិនប្រក្រតីនេះផងដែរ។ យ៉ាងណាក៏ដោយ អ្នកនាំពាក្យមន្ទីរពេទ្យបានបញ្ជាក់ថា គណៈកម្មាធិការនេះនឹងមិនត្រូវបានអនុញ្ញាតឱ្យចូលទៅមើលទីតាំងដែលកំពុងព្យាបាលរបស់លោក ថាក់ស៊ីន នោះទេ។ ដោយឡែក គេមិនអាចទាក់ទងមេធាវីរបស់លោក ថាក់ស៊ីន ដើម្បីស្រាយបំភ្លឺជុំវិញបញ្ហានេះនៅឡើយទេ។
គួររំឭកថា លោក ថាក់ស៊ីន ដែលធ្លាប់ជាមហាសេដ្ឋីទូរគមនាគមន៍មួយរូប បានទទួលការស្វាគមន៍យ៉ាងកក់ក្ដៅ នៅពេលដែលគាត់ត្រឡប់ចូលប្រទេសថៃវិញនៅថ្ងៃទី២២ ខែសីហា ក្នុងនាមជាជនភៀសខ្លួន។ ពេលគាត់ចូលដល់ទឹកដីថៃតាមយន្តហោះឯកជនមួយភ្លាម ហ្វូងមនុស្សជាច្រើនបានស្រែកហ៊ោស្វាគមន៍ ហើយសូម្បីតែក្រុមប៉ូលិសក៏បានគោរពមុននឹងនាំខ្លួនគាត់ទៅកាន់តុលាការ និងពន្ធនាគារផងដែរ។
នៅថ្ងៃដដែលនោះ សម្ព័ន្ធមិត្តរបស់លោកគឺមហាសេដ្ឋីអចលនទ្រព្យ លោក ស្រេតថា ថាវីស៊ីន ត្រូវបានសភាថៃបោះឆ្នោតជ្រើសរើសជានាយករដ្ឋមន្ត្រីថៃក្នុងអាណត្តិថ្មី។ នាយករដ្ឋមន្ត្រីថ្មីរូបនេះក៏កំពុងដឹកនាំរដ្ឋាភិបាល តាមរបៀបវារៈប្រជានិយមដូចទៅនឹងរដ្ឋាភិបាលដឹកនាំដោយគ្រួសារស៊ីណាវ៉ាត្រាកន្លងមកដូចគ្នា។ រីឯលោក ថាក់ស៊ីន តែងតែបដិសេធថារូបលោកមិនជាប់ពាក់ព័ន្ធក្នុងរឿងនយោបាយ ដោយអះអាងថា លោកបានចូលនិវត្តន៍ហើយ៕
