ប្រជាជនជប៉ុនអង្គុយនៅក្រៅអគារក្នុងទីតាំងសង្គ្រោះក្នុងទីក្រុង Wajima ដែលរងគ្រោះខ្លាំងនៅជិតចំណុចកណ្តាលនៃការរញ្ជួយដីនេះ។
យោងសេចក្តីរាយការណ៍របស់ទីភ្នាក់ងារព័ត៌មានរ៉យទ័រនៅមុននេះបន្តិច មនុស្សយ៉ាងហោចណាស់៣០នាក់បានស្លាប់ បន្ទាប់ពីគ្រោះរញ្ជួយដីដ៏ខ្លាំងមួយបានវាយប្រហារប្រទេសជប៉ុននៅថ្ងៃចូលឆ្នាំសកល ដោយក្រុមជួយសង្គ្រោះកាលពីថ្ងៃទី២ខែមករា ព្យាយាមទៅដល់តំបន់ដាច់ស្រយាលដែលអគារត្រូវបានដួលរលំ ផ្លូវខូច និងដាច់ចរន្តអគ្គិសនីដល់ផ្ទះរាប់ម៉ឺនខ្នង។
អានុភាពនៃការរញ្ជួយដីកម្រិតបឋមកម្រិត ៧.៦ រ៉ិចទ័រ បានវាយប្រហារនៅពាក់កណ្តាលរសៀល ថ្ងៃទី១ខែមករា ដោយបានជំរុញឱ្យអ្នកស្រុកនៅតំបន់ឆ្នេរមួយចំនួនត្រូវភៀសខ្លួនទៅកាន់ទីទួលខ្ពស់ ខណៈដែលរលកយក្សស៊ូណាមិបានបោកបក់លើឆ្នេរភាគខាងលិចរបស់ប្រទេសជប៉ុន ដោយបានបោកបក់រថយន្ត និងផ្ទះសំបែងមួយចំនួនចូលទៅក្នុងសមុទ្រ។
បុគ្គលិកយោធា អ្នកពន្លត់អគ្គីភ័យ និងប៉ូលីសរាប់ពាន់នាក់មកពីទូទាំងប្រទេសត្រូវបានបញ្ជូនទៅកាន់តំបន់ដែលរងគ្រោះខ្លាំងបំផុតនៅក្នុងជ្រោយ Noto ក្នុងខេត្ត Ishikawa។
ទោះបីជាយ៉ាងណាក៏ដោយ កិច្ចខិតខំប្រឹងប្រែងជួយសង្គ្រោះត្រូវបានរារាំងដោយផ្លូវដែលរងការខូចខាតយ៉ាងធ្ងន់ធ្ងរ និងបានបិទផ្លូវ ហើយអាជ្ញាធរ បាននិយាយថា ពួកគេពិបាកនឹងវាយតម្លៃពីទំហំពេញលេញនៃការដួលរលំនេះ។
សេវាកម្មផ្លូវដែក សេវាសាឡាង និងជើងហោះហើរជាច្រើនទៅកាន់តំបន់នេះត្រូវបានផ្អាក។
អាកាសយានដ្ឋាន Noto បានបិទដោយសារតែការខូចខាតផ្លូវរត់ ស្ថានីយ និងផ្លូវចូល ដោយមានមនុស្ស ៥០០ នាក់ជាប់គាំងនៅខាងក្នុងរថយន្តនៅក្នុងចំណតរបស់វា។
នាយករដ្ឋមន្ត្រីជប៉ុន ហ្វូមីអូ គីស៊ីដា (Fumio Kishida) បាននិយាយនៅក្នុងកិច្ចប្រជុំគ្រោះមហន្តរាយមួយកាលពីថ្ងៃទី២ខែមករាថា៖«ការស្វែងរក និងជួយសង្គ្រោះអ្នកដែលរងផលប៉ះពាល់ដោយការរញ្ជួយដីគឺជាការប្រយុទ្ធនឹងពេលវេលា»។
លោក គីស៊ីដា បាននិយាយថា ក្រុមអ្នកជួយសង្គ្រោះកំពុងពិបាកទៅដល់ចុងភាគខាងជើងនៃជ្រោយ Noto ដោយសារ តែផ្លូវខូច ហើយការអង្កេតមើលដោយប្រើប្រាស់ឧទ្ធម្ភាគចក្របានរកឃើញភ្លើងជាច្រើន និងការខូចខាតយ៉ាងទូលំទូលាយដល់អគារ និងហេដ្ឋារចនាសម្ព័ន្ធ។
អាជ្ញាធរនៅខេត្ត Ishikawa បាននិយាយថា ពួកគេបានបញ្ជាក់ពីអ្នកស្លាប់ចំនួន៣០នាក់ពីការរញ្ជួយដីមកទល់ពេលនេះ ជាមួយនឹងពាក់កណ្តាលនៃអ្នកស្លាប់ទាំងនោះនៅក្នុងទីក្រុង Wajima ដែលរងគ្រោះខ្លាំងនៅជិតចំណុចកណ្តាលនៃការរញ្ជួយដីនេះ។
ទីភ្នាក់ងារគ្រប់គ្រងគ្រោះមហន្តរាយ និងអគ្គីភ័យរបស់ប្រទេសជប៉ុនបាននិយាយថា ក្រុមអ្នកពន្លត់អគ្គីភ័យបាននិងកំពុងពន្លត់ភ្លើងនៅក្នុងទីក្រុងជាច្រើន និងព្យាយាមរំដោះមនុស្សបន្ថែមទៀត ដែលជាប់នៅក្នុងអគារដែលដួលរលំ។
យោងតាមទីភ្នាក់ងារឧតុនិយមជប៉ុន បានឱ្យដឹងថា ការរញ្ជួយដីច្រើនជាង ១៤០ ត្រូវបានគេរកឃើញចាប់តាំងពីការរញ្ជួយដីបានវាយប្រហារលើកដំបូងកាលពីថ្ងៃទី១ ខែមករា។
ទីភ្នាក់ងារនោះបានព្រមានថាការរញ្ជួយខ្លាំងបន្ថែមទៀតអាចនឹងកើតមាននៅប៉ុន្មានថ្ងៃខាងមុខ៕
