អាជ្ញាធរកូរ៉េខាងត្បូង ដាក់បម្រាមនៅតាមតំបន់សមុទ្រ ដើម្បីបង្ការគ្រោះថ្នាក់កើតចេញពីឥទ្ធិពលរញ្ជួយដីនៅជប៉ុន។ AFP
ទីភ្នាក់ងារឧតុនិយមកូរ៉េខាងត្បូងកាលពីថ្ងៃទី១ ខែមករា ឆ្នាំ២០២៤ បានលើកឡើងថារលកយក្សស៊ូណាមិដែលមានកម្ពស់ក្រោម១ម៉ែត្រ (៣.៣ហ្វីត) បានឆ្ពោះទៅដល់តំបន់ឆ្នេរសមុទ្រភាគខាងកើតនៃប្រទេសកូរ៉េខាងត្បូង បន្ទាប់ពីមានការរញ្ជួយដីដ៏ធំមួយដែលបានវាយប្រហារប្រទេសជប៉ុននៅថ្ងៃដដែលនេះ ខណៈគេរំពឹងថារលកកាន់តែច្រើននិងធំៗជាងនេះអាចកើតឡើងនៅប៉ុន្មានម៉ោងបន្ទាប់។
ទីភ្នាក់ងារឧតុនិយមបានឱ្យដឹងដែរថារលកយក្សស៊ូណាមិដំបូងដែលបានទៅដល់ឆ្នេរសមុទ្រកូរ៉េខាងត្បូង គឺមានកម្ពស់៦៧សង់ទីម៉ែត្រ ក៏ប៉ុន្តែកម្ពស់រលកនឹងបន្តកើនឡើងបន្ទាប់ពីរលកដំបូងហើយអាចបន្តលើសពី២៤ម៉ោង។
ដោយឡែកកូរ៉េខាងជើងដែលជាប់ខាងនឹងកូរ៉េខាងត្បូងវិញបានចេញសេចក្តីព្រមានអំពីរលកយក្សស៊ូណាមិទៅដល់តំបន់ជាប់មាត់សមុទ្ររបស់ខ្លួនឱ្យប្រុងប្រយ័ត្ន ខណៈរលកត្រូវបានគេរំពឹងថានឹងអាចមានកម្ពស់លើសពី២ម៉ែត្រ។ នេះបើតាមទីភ្នាក់ងារសារព័ត៌មានយ៉ុនហាប់របស់កូរ៉េខាងត្បូងបានរាយការណ៍ដោយដកស្រង់វិទ្យុរដ្ឋកូរ៉េខាងជើង។
គិតត្រឹមពេលនេះខេត្ត Gangwon របស់កូរ៉េខាងត្បូង ចេញសេចក្តីប្រកាសឱ្យប្រជាពលរដ្ឋបង្កើនការប្រុងប្រយ័ត្ននិងជម្លៀសប្រជាជនទាំងនោះទៅកាន់ទីទួលសុវត្ថិភាពរួចរាល់ហើយនេះបើយោងតាមការឱ្យដឹងពីក្រសួងមហាផ្ទៃនិងសុវត្ថិភាពនៃប្រទេសកូរ៉េខាងត្បូង។
ខេត្តតំបន់សមុទ្រភាគខាងកើតកូរ៉េខាងត្បូងបានប្រកាសសារអាសន្នម្តងហើយម្តងទៀតឱ្យពលរដ្ឋនៅឱ្យឆ្ងាយពីឆ្នេរសមុទ្រហើយជម្លៀសទៅកាន់ទីទួលសុវត្ថិភាព។ក្រសួងបានឱ្យដឹងថាទីក្រុងSamcheokបានណែនាំប្រជាពលរដ្ឋឱ្យផ្លាស់ទីទៅកាន់តំបន់ខ្ពស់មួយដែលមានកម្ពស់ខ្ពស់ជាងអគារបីជាន់។
គ្រោះរញ្ជួយដីកម្រិត៧.៦រ៉ិចទ័របានវាយប្រហារប្រទេសជប៉ុននារសៀលថ្ងៃចន្ទដែលជាថ្ងៃដំបូងនៃឆ្នាំ២០២៤ដោយបានជំរុញឱ្យប្រជាពលរដ្ឋនៅតំបន់ឆ្នេរត្រូវភៀសខ្លួនទៅកាន់ទីទួលខ្ពស់ខណៈរលកយក្សស៊ូណាមិបានវាយប្រហារតំបន់ឆ្នេរសមុទ្រភាគខាងលិចប្រទេសជប៉ុនដោយបានបោកបក់រថយន្តនិងផ្ទះមួយចំនួនចូលទៅក្នុងសមុទ្រ។
បើតាមទីភ្នាក់ងារឧតុនិយមជប៉ុនបានឱ្យដឹងថាការរញ្ជួយដីច្រើនជាង១៤០ចំណុចផ្សេងៗគ្នាត្រូវបានគេរកឃើញចាប់តាំងពីការរញ្ជួយដីបានវាយប្រហារលើកដំបូងកាលពីថ្ងៃចន្ទ។ទីភ្នាក់ងារនេះបានព្រមានថាភាពតានតឹងខ្លាំងបន្ថែមទៀតអាចនឹងកើតមាននៅប៉ុន្មានថ្ងៃខាងមុខ។
បើយោងតាមសារព័ត៌មានជាច្រើនបានរាយការណ៍ដោយដកស្រង់សំដីអាជ្ញាធរមូលដ្ឋានបានឱ្យដឹងថាមនុស្សជាង២០នាក់ហើយបានស្លាប់បាត់បង់ជីវិត ខណៈមនុស្សជាច្រើននាក់ទៀតបានជាប់ក្នុងអគារបាក់រលំ៕
