រុស្ស៊ីថា ការធ្វើសមយុទ្ធរបស់ណាតូជាការវិលត្រឡប់នៃសង្គ្រាមត្រជាក់។ AFP
រុស្ស៊ីនិយាយថា សមយុទ្ធអ្នកការពារដ៏រឹងមាំរបស់អង្គការណាតូ (NATO's Steadfast Defender 2024) ដែលសហភាពអឺរ៉ុប និងសហរដ្ឋអាមេរិកនឹងធ្វើឡើងក្នុងឆមាសទី ១ ឆ្នាំនេះ បង្ហាញពីការវិលត្រឡប់ទៅកាន់គម្រោងសង្គ្រាមត្រជាក់វិញ។ សង្គ្រាមត្រជាក់ដែលរលាយបាត់បង់ក្រោយការដួលរលំនៃសហភាពសូវៀតនៅឆ្នាំ ១៩៩១។
អនុរដ្ឋមន្ត្រីការបរទេសរុស្ស៊ី លោក Alexander Grushko បានប្រាប់ទីភ្នាក់ងារសារព័ត៌មានរដ្ឋ RIA ក្នុងសុន្ទរកថាដែលបានចេញផ្សាយកាលពីថ្ងៃអាទិត្យថា ទំហំនៃសមយុទ្ធ Steadfast Defender 2024 របស់អង្គការណាតូ បង្ហាញពី «ការត្រឡប់មកវិញដែលមិនអាចដកហូតបាន» នៃសម្ព័ន្ធភាពទៅនឹងគ្រោងការណ៍សង្គ្រាមត្រជាក់។
អង្គការណាតូក្នុងសប្តាហ៍មុនប្រកាសពីការចាប់ផ្តើមសមយុទ្ធដ៏ធំបំផុតចាប់តាំងពីសង្គ្រាមត្រជាក់ដែលនឹងមានទាហានប្រហែល ៩ ម៉ឺននាក់ដោយហាត់សមពីរបៀបដែលទាហានអាមេរិកអាចពង្រឹងសម្ព័ន្ធមិត្តអឺរ៉ុបនៅក្នុងប្រទេសដែលជាប់ព្រំដែនជាមួយប្រទេសរុស្ស៊ី និងនៅតំបន់ខាងកើតរបស់សម្ព័ន្ធមិត្តរបស់អង្គការណាតូ ប្រសិនបើជម្លោះនឹងផ្ទុះឡើងជាមួយរុស្ស៊ី។
លោក Grushko បានប្រាប់ RIA ថា៖«សមយុទ្ធទាំងនេះគឺជាធាតុមួយផ្សេងទៀតនៃសង្គ្រាមកូនកាត់ដែលបានកើតឡើងដោយលោកខាងលិចប្រឆាំងនឹងប្រទេសរុស្ស៊ី»។
RIA បានស្រង់សម្តី ដូចបាននិយាយថា៖«សមយុទ្ធដល់កម្រិតទ្រង់ទ្រាយបែបនេះ បង្ហាញពីការវិលត្រឡប់ចុងក្រោយ និងមិនអាចដកវិញបានរបស់ណាតូចំពោះគម្រោងសង្គ្រាមត្រជាក់ នៅពេលដែលដំណើរការរៀបចំផែនការយោធា ធនធាន និងហេដ្ឋារចនាសម្ព័ន្ធកំពុងត្រូវបានរៀបចំសម្រាប់ការប្រឈមមុខជាមួយរុស្ស៊ី»។
អង្គការណាតូមិនបាននិយាយអំពីឈ្មោះរុស្ស៊ីក្នុងការប្រកាសរបស់ខ្លួននោះទេ។ ប៉ុន្តែឯកសារយុទ្ធសាស្ត្រកំពូលរបស់ខ្លួនកំណត់រុស្ស៊ីថាជាការគំរាមកំហែងដ៏ខ្លាំង និងផ្ទាល់បំផុតចំពោះសន្តិសុខរបស់សមាជិកណាតូ។
រុស្ស៊ីបានចាប់ផ្តើមការលុកលុយពេញលេញលើប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ឆ្នាំ ២០២២ នៅក្នុងអ្វីដែលទីក្រុងកៀវ និងសម្ព័ន្ធមិត្តលោកខាងលិចបាននិយាយថា ជាការដណ្តើមយកទឹកដីបែបចក្រពត្តិនិយមដែលមិនមានការបង្កហេតុ។
ទីក្រុងម៉ូស្គូ និងប្រមុខការទូតរបស់ខ្លួន លោក Sergei Lavrov តាំងពីពេលនោះមក ជារឿយៗបានចោទប្រកាន់«ក្រុមលោកខាងលិចរួម» ថា បានធ្វើ «សង្គ្រាមកូនកាត់» ប្រឆាំងនឹងរុស្ស៊ី»៕
