អ្នកនាំពាក្យរបស់ពួកតាលីបង់ លោក ហ្សាប៊ូឡា មូចាហ៊ីដ (Zabiullah Mujahid) បាននិយាយថា ក្រុមស៊ើបអង្កេតរបស់ពួកគេកំពុងស្វែងរកយ៉ាងសកម្ម។ AFP
មនុស្ស ៤ នាក់ ត្រូវបានគេរាយការណ៍ថាបានរួចរស់មានជីវិត បន្ទាប់ពីយន្តហោះឯកជនមួយគ្រឿង ដែលបានដឹកជម្លៀសអ្នកជំងឺម្នាក់ និងមនុស្សមួយចំនួនទៀតពីប្រទេសថៃទៅកាន់ប្រទេសរុស្ស៊ី បានបាត់ពីអេក្រង់រ៉ាដា ហើយបានធ្លាក់នៅតំបន់ដាច់ស្រយាលមួយកាលពីថ្ងៃសៅរ៍ ពោលគឺនៅតំបន់ភ្នំភាគឦសានប្រទេសអាហ្វហ្កានីស្ថាន។
អាជ្ញាធរអាកាសចរណ៍រុស្ស៊ីបានរាយការណ៍ថា មនុស្ស ៦ នាក់ រួមមានអ្នកដំណើរ ២ នាក់ និងសមាជិកនាវិក ៤ នាក់ បានជិះនៅលើយន្តហោះសង្គ្រោះបន្ទាន់នោះ ពីអាកាសយានដ្ឋានយូថាផាវ (Utapao) ក្បែរទីក្រុងប៉ាតាយ៉ា (Pattaya) ទៅកាន់ទីក្រុងម៉ូស្គូ ដោយត្រូវឆ្លងកាត់ប្រទេសឥណ្ឌា និងអ៊ូសបេគីស្ថាន។
ក្រុមអ្នកជួយសង្គ្រោះបានទៅដល់កន្លែងធ្លាក់យន្តហោះនៅក្នុងខេត្តបាដាកហ្សាន់ (Badakhshan) របស់ប្រទេសអាហ្វហ្កានីស្ថាន ដែលមានចម្ងាយប្រហែល ២៥០ គីឡូម៉ែត្រភាគឦសាននៃទីក្រុងកាប៊ុល ហើយបានរកឃើញអ្នកនៅរស់រានមានជីវិតចំនួន ៤ នាក់ កាលពីថ្ងៃអាទិត្យ។
យោងតាមទីភ្នាក់ងារដឹកជញ្ជូនផ្លូវអាកាសរបស់រុស្ស៊ី និងក្រសួងដឹកជញ្ជូនរបស់តាលីបង់ បានឱ្យដឹងថា អ្នកនៅរស់រានមានជីវិតចំនួន ៤ នាក់ ដែលមានរបួសពេញខ្លួន ត្រូវបានរកឃើញនៅក្បែរតំបន់ធ្លាក់យន្តហោះ។ រីឯជោគវាសនារបស់មនុស្ស ២ រូបទៀត នៅមិនទាន់ប្រាកដនៅឡើយទេ។
អ្នកនាំពាក្យរបស់ពួកតាលីបង់ លោក ហ្សាប៊ូឡា មូចាហ៊ីដ (Zabiullah Mujahid) បាននិយាយថា ក្រុមស៊ើបអង្កេតរបស់ពួកគេកំពុងស្វែងរកយ៉ាងសកម្ម ដើម្បីជួយសង្គ្រោះពួកគេ។ ទីភ្នាក់ងារសារព័ត៌មានរុស្ស៊ី RIA បានរាយការណ៍ថា យន្តហោះបានដឹកស្ត្រីជនជាតិរុស្ស៊ីម្នាក់ ដែលឈឺធ្ងន់ចេញពីមន្ទីរពេទ្យប៉ាតាយ៉ា ទៅកាន់ប្រទេសរុស្ស៊ី។
ទីភ្នាក់ងារសារព័ត៌មានខាងលើបានបញ្ជាក់ថាស្ត្រីរូបនេះ និងប្តីរបស់លោកស្រី គឺជាជនជាតិរុស្ស៊ីទាំងពីរនាក់ហើយជាអ្នកដែលចេញថ្លៃចំណាយដល់ការហោះហើរនេះ។ យោងតាមរបាយការណ៍ប្រព័ន្ធផ្សព្វផ្សាយបានបង្ហាញថា ពួកគេជាប្ដីប្រពន្ធនឹងគ្នា មកពីភាគខាងត្បូងនៃប្រទេសរុស្ស៊ី។
យន្តហោះនេះមានឈ្មោះថា Dassault Aviation Falcon 10 ហើយបានចុះបញ្ជីនៅប្រទេសរុស្ស៊ី ឆ្នាំ១៩៧៨ ផលិតនៅប្រទេសបារាំង។ អ្នកបើកយន្តហោះនេះបានលើកឡើងពីការពីកម្រិតប្រេងនៅតិច ហើយបានបញ្ជាក់ពីផែនការចុះចតនៅអាកាសយានដ្ឋានមួយក្នុងប្រទេសតាជីគីស្ថាន។
អ្នកបើកយន្តហោះម៉ាស៊ីនភ្លោះនេះ បានរាយការណ៍ថា ម៉ាស៊ីនទាំងពីររបស់យន្តហោះបានរលត់ ហើយ ២៥ នាទី ក្រោយ មកយន្តហោះបានបាត់ពីអេក្រង់រ៉ាដា។ យោងតាមទិន្នន័យតាមដានជើងហោះហើរ Flight Radar 24 វិភាគដោយសារព័ត៌មាន Associated Press បានបង្ហាញទីតាំងចុងក្រោយរបស់យន្តហោះ គឺនៅភាគខាងត្បូងទីក្រុងប៉េហ្សាវ៉ា (Peshawar) ប្រទេសប៉ាគីស្ថាន ប្រហែលម៉ោង ១ កន្លះ រសៀលថ្ងៃសៅរ៍ ម៉ោងនៅទីក្រុងប៉េហ្សាវ៉ា។
ក្រសួងអាកាសចរណ៍អាហ្វហ្កានីស្ថាន ដឹកនាំដោយតាលីបង់ កំពុងស៊ើបអង្កេតឧប្បត្តិហេតុនេះ ដោយបានលើកឡើងថា ករណីនេះអាចបណ្តាលមកពីបញ្ហាបច្ចេកទេស។ ដោយឡែក គណៈកម្មាធិការស៊ើបអង្កេតរបស់ប្រទេសរុស្ស៊ី បានបើកសំណុំរឿងព្រហ្មទណ្ឌ ដើម្បីពិនិត្យមើលថាតើមានការរំលោភច្បាប់សុវត្ថិភាពឬក៏យ៉ាងណា។
ទន្ទឹមនឹងនេះ ក្រុមហ៊ុនយន្តហោះនេះឈ្មោះថា Athletic Group LLC ដែលជាក្រុមហ៊ុនតូចមួយនៅរុស្ស៊ី មិនបានឆ្លើយតបនឹងសំណើសុំការអត្ថាធិប្បាយជុំវិញបញ្ហានេះនោះទេ។
ក្រុមហ៊ុនអាកាសចរណ៍អន្តរជាតិភាគច្រើន បានហោះជៀសវាងពីដែនអាកាសប្រទេសអាហ្វហ្កានីស្ថាន ពោលគឺចាប់តាំងពីពួកតាលីបង់បានចូលដឹកនាំប្រទេសក្នុងឆ្នាំ ២០២។ ជាទូទៅ យន្តហោះដែលហោះឆ្លងកាត់ប្រទេសអាហ្វហ្កានីស្ថាន គឺហោះរំលងតែច្រករបៀងវ៉ាកាន (Wakhan) ត្រឹមតែពីរទៅបីនាទីប៉ុណ្ណោះ។
ជាធម្មតា យន្តហោះដែលធ្វើដំណើរឆ្ពោះទៅច្រករបៀងនេះ ត្រូវបត់ពីភាគខាងជើងជិតទីក្រុងប៉េហ្សាវ៉ាហើយចូលតាមព្រំដែនប៉ាគីស្ថាន មុនពេលបត់ចូលប្រទេសអាហ្វហ្កានីស្ថានត្រឹមតែប៉ុន្មាននាទីប៉ុណ្ណោះ៕
