នាវាផ្ទុកយន្តហោះរបស់អាមេរិកឆ្លងកាត់ច្រកសមុទ្រតៃវ៉ាន់កន្លងមក។ AFP
កងទ័ពជើងទឹកសហរដ្ឋអាមេរិកកាលពីថ្ងៃទី ២៤ ខែមករាថ្មីៗនេះ បានបើកនាវាចម្បាំងដំបូងរបស់ខ្លួនឆ្លងកាត់ច្រកសមុទ្រតៃវ៉ាន់។ ការណ៍នេះ បានជំរុញឱ្យភាពតានតឹងផ្នែកនយោបាយកាន់តែកើនឡើង មួយកម្រិតទៀត ខណៈដែលការបោះឆ្នោតតៃវ៉ាន់ទើបតែបញ្ចប់បានជិត២សប្ដាហ៍។
យ៉ាងណាមិញ កងទ័ពជើងទឹកអាមេរិកបាននិយាយថា នាវាចម្បាំងរបស់ខ្លួនដែលមានឈ្មោះថា USS John Finn ពិតជាបានឆ្លងកាត់ច្រករបៀងមួយនៅក្នុងច្រកសមុទ្រតៃវ៉ាន់ក៏ពិតមែន ប៉ុន្តែតំបន់នោះគឺមិនស្ថិតក្នុងដែនកម្មសិទ្ធិរបស់រដ្ឋអំណាចណាមួយឡើយ។
កងទ័ពជើងទឹកអាមេរិកក៏បាននិយាយនៅក្នុងសេចក្តីថ្លែងការណ៍របស់ខ្លួនផងដែរថា៖« ការឆ្លងកាត់ ច្រកសមុទ្រតៃវ៉ាន់ របស់នាវា John Finn ជាការបង្ហាញពីការប្តេជ្ញាចិត្តរបស់សហរដ្ឋអាមេរិកក្នុងការរក្សាសេរីភាពនៃការធ្វើនាវាចរណ៍សម្រាប់ប្រជាជាតិទាំងអស់»។
សេចក្តីថ្លែងការណ៍បន្ត៖«ហើយគ្មានសមាជិកសហគមន៍អន្តរជាតិណាមួយ គួរត្រូវបានគេបំភិតបំភ័យ ឬបង្ខំឱ្យបោះបង់សិទ្ធិ និងសេរីភាពក្នុងការធ្វើដំណើររបស់ពួកគេឡើយ»។
ប៉ុន្តែយ៉ាងណា យោធាចិនបានចាត់ទុកថាសកម្មភាពរបស់អាមេរិកនាពេលនេះគឺជាការបំភាន់ភ្នែកសាធារណជន ហើយថាកងកម្លាំងជើងទឹករបស់ខ្លួនបានតាមដានយ៉ាងយកចិត្តទុកដាក់ជាមួយនាវានោះ ដើម្បីចៀសវាងនូវការបង្កទង្វើអសន្តិសុខណាមួយ។
យោធាចិនបាននិយាយទៀតថា៖«ថ្មីៗនេះ យោធាសហរដ្ឋអាមេរិកបានធ្វើសកម្មភាពញុះញង់ដើម្បីបំផ្លាញសន្តិភាព និងស្ថិរភាពក្នុងតំបន់»។
បើទោះបីជាយ៉ាងណាក៏ដោយ ចិននៅតែបន្តអះអាងថាតៃវ៉ាន់ជាផ្នែកមួយរបស់ខ្លួន និងថារាល់បញ្ហា របស់តៃវ៉ាន់ គឺជាបញ្ហារួមរបស់ចិនតែម្ដង។
តៃវ៉ាន់បានបោះឆ្នោតជ្រើសរើសប្រធានាធិបតីកាលពីថ្ងៃទី ១៣ ខែមករា ឆ្ន ២០២៤ ដែលជាលទ្ធផល គណបក្សប្រជាធិបតេយ្យនៅតែបន្តឈ្នះឆ្នោតជាថ្មី។ ការឈ្នះឆ្នោតរបស់គណបក្សប្រជាធិបតេយ្យនេះ បានធ្វើឱ្យចិនសង្កៀតធ្មេញកាន់តែខ្លាំងដាក់តៃវ៉ាន់។
ជាក់ស្ដែង កាលពីសប្ដាហ៍មុន តៃវ៉ាន់បានរាយការណ៍ពីការរកឃើញយន្ដហោះចម្បាំងរបស់ចិនចំនួន ១៨គ្រឿង ហោះក្រឡឹងជុំវិញដែនកោះរបស់ខ្លួន ដោយបានគំរាមកំហែងដល់សន្ដិសុខតៃវ៉ាន់ ក៏ដូចជារំខានដល់ការធ្វើចរាចរណ៍ផ្លូវអាកាសផងដែរ។
ការបើកនាវាចម្បាំងរបស់អាមេរិកឆ្លងកាត់ច្រកសមុទ្រតៃវ៉ាន់ចុងក្រោយបង្អស់ គឺធ្វើឡើងកាលពីដើមខែវិច្ឆិកា ដែលកាលណោះមានការចូលរួមពីនាវាចម្បាំងរបស់កាណាដាផង។ ជារឿយៗ អាមេរិកតែងតែធ្វើសកម្មភាពនេះ ដើម្បីបញ្ជាក់ពីការគាំទ្ររបស់ខ្លួនចំពោះរបប ប្រជាធិបតេយ្យនៅតៃវ៉ាន់៕
