រដ្ឋមន្ត្រីការបរទេសអ៊ីរ៉ង់លោក Hossein Amirabdollahian ដែលគ្រោងធ្វើនៅថ្ងៃទី២៩ មករា ទៅកាន់ប្រទេសប៉ាគីស្ថានដើម្បីប្រឹងប្រែងស្តារទំនាក់ទំនងរបស់ពួកគេដែលកំពុងដុនដាបខ្លាំង។ AFP
ឃាតកម្មកើតឡើងលើកម្មករប៉ាគីស្ថាន ៩ នាក់នៅប្រទេសអ៊ីរ៉ង់ ខេត្តជាប់ព្រំដែនប៉ាគីស្ថាន មុនដំណើរទស្សនកិច្ចរបស់រដ្ឋមន្ត្រីការបរទេសអ៊ីរ៉ង់លោក Hossein Amirabdollahian ដែលគ្រោងធ្វើនៅថ្ងៃទី ២៩ មករា ទៅកាន់ប្រទេសប៉ាគីស្ថាន ដើម្បីប្រឹងប្រែងស្តារទំនាក់ទំនងរបស់ពួកគេដែលកំពុងដុនដាបខ្លាំង។
បន្ទាប់ពីជម្លោះបាញ់ប្រហារគ្នាទៅវិញទៅមករវាងប្រទសប៉ាគីស្ថាន និងអ៊ីរ៉ង់ប្រហែល១សប្តាហ៍ ខ្មាន់កាំភ្លើងមិនស្គាល់អត្តសញ្ញាណ១ក្រុមដែលត្រូវបានសង្ស័យមានគ្នា៣នាក់ បានបាញ់សម្លាប់កម្មករប៉ាគីស្ថាន៩នាក់ នៅតំបន់ព្រំដែនភាគអាគ្នេយ៍នៃប្រទេសអ៊ីរ៉ង់ កាលពីថ្ងៃទី ២៧ ខែមករា។
យោងតាមការដកស្រង់របស់ទីភ្នាក់ងារព័ត៌មានរ៉យទ័រ ឯកអគ្គរដ្ឋទូតប៉ាគីស្ថានប្រចាំប្រទេសអ៊ីរ៉ង់ លោក Muhammad MudassirTipuបានបញ្ជាក់ពីហេតុការណ៍នេះនៅលើបណ្តាញសង្គមX ដោយសរសេរថា៖«ពិតជារន្ធត់ចិត្តខ្លាំងណាស់ចំពោះការសម្លាប់ជនជាតិប៉ាគីស្ថាន៩នាក់នៅសារ៉ាវ៉ាន់។ ស្ថានទូតនឹងផ្តល់ការគាំទ្រពេញលេញទៅដល់គ្រួសារជនរងគ្រោះ»។
តាមខ្លឹមសារនោះ លោក Muhammad MudassirTipuបន្ថែមថា៖«យើងបានអំពាវនាវឱ្យអ៊ីរ៉ង់ពង្រីកកិច្ចសហប្រតិបត្តិការពេញលេញក្នុងបញ្ហានេះ»។
ប្រព័ន្ធផ្សព្វផ្សាយរដ្ឋអ៊ីរ៉ង់បាននិយាយថា ប៉ូលិសកំពុងស្វែងរកខ្មាន់កាំភ្លើងទាំង៣នាក់ដែលបានរត់គេចខ្លួនបន្ទាប់ពីការបាញ់ប្រហារ។
ក្រុមសិទ្ធិ Baluch Haalvashបាននិយាយនៅលើគេហទំព័ររបស់ខ្លួនថា ជនរងគ្រោះគឺជាកម្មករប៉ាគីស្ថាន ដែលរស់នៅហ្គារ៉ាសជួសជុលរថយន្តដែលពួកគេធ្វើការ។ វាបាននិយាយថា មនុស្ស៣នាក់ផ្សេងទៀតបានរងរបួស។
ប្រព័ន្ធផ្សព្វផ្សាយរដ្ឋបាននិយាយថា គ្មានបុគ្គល ឬក្រុមណាមួយចេញមុខទទួលខុសត្រូវចំពោះការបាញ់ប្រហារនៅសារ៉ាវ៉ាន់ ក្នុងខេត្តSistan-Baluchestan ដែលជាប់ព្រំដែនប្រទេសប៉ាគីស្ថាននោះឡើយ។
អ្នកនាំពាក្យក្រសួងការបរទេសប៉ាគីស្ថាន លោក Mumtaz Zahra Baloch បាននិយាយថា«វាគឺជាឧបទ្ទវហេតុដ៏រន្ធត់ និងគួរឱ្យស្អប់ខ្ពើម ហើយយើងថ្កោលទោសវាយ៉ាងឈឺចាប់»។
«យើងកំពុងទាក់ទងជាមួយអាជ្ញាធរអ៊ីរ៉ង់ ហើយបានគូសបញ្ជាក់អំពីតម្រូវការក្នុងការស៊ើបអង្កេតឧបទ្ទវហេតុនេះភ្លាមៗ ហើយរក្សាទុកដើម្បីទទួលខុសត្រូវចំពោះអ្នកដែលពាក់ព័ន្ធ»។
ការបាញ់ប្រហារនេះបានកើតឡើងមុនដំណើរទស្សនកិច្ចដែលបានគ្រោងទុកនៅថ្ងៃទី២៩ ខែមករាទៅកាន់ប្រទេសប៉ាគីស្ថានដោយរដ្ឋមន្ត្រីការបរទេសអ៊ីរ៉ង់លោក Hossein Amirabdollahian។
អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaaniបានថ្កោលទោសការបាញ់ប្រហារនេះ ដោយលោកបាននិយាយនៅក្នុងសេចក្តីថ្លែងការណ៍មួយថា៖«អ៊ីរ៉ង់ និងប៉ាគីស្ថាន នឹងមិនអនុញ្ញាតឱ្យសត្រូវបំផ្លាញចំណងមិត្តភាពរវាងប្រទេសទាំង២ឡើយ»។
ប្រព័ន្ធផ្សព្វផ្សាយរដ្ឋបាននិយាយថា ឯកអគ្គរដ្ឋទូតប៉ាគីស្ថាន និងអ៊ីរ៉ង់បានវិលត្រឡប់មកកាន់តំណែងរបស់ពួកគេវិញបន្ទាប់ពីត្រូវបានហៅត្រឡប់មកវិញនៅពេលដែលប្រទេសជិតខាងបានបាញ់ប្រហារដាក់គ្នាដោយមីស៊ីលកាលពីសប្តាហ៍មុន សំដៅទៅលើអ្វីដែលពួកគេបាននិយាយថាជាគោលដៅរបស់ក្រុមសកម្មប្រយុទ្ធ។
ក្នុងការបាញ់ប្រហារកាលពីសប្តាហ៍មុននោះ កងកម្លាំងសន្តិសុខអ៊ីរ៉ង់បានបាញ់ប្រហារលើក្រុមទាមទារបំបែកខ្លួន ហើយមីស៊ីលបានធ្លាក់ចូលទឹកដីប៉ាគីស្ថាន ក៏បណ្តាលឱ្យមានអ្នកស្លាប់ ហើយ ប៉ាគីស្ថានក៏បាញ់សងសឹកវិញនៅពេលក្រោយមក។
តំបន់ Sistan-Baluchestanដ៏ក្រីក្រក្នុងប្រទេសអ៊ីរ៉ង់ គឺជាកន្លែងនៃការប៉ះទង្គិចគ្នាជាបន្តបន្ទាប់រវាងកងកម្លាំងសន្តិសុខ និងពួកសកម្មប្រយុទ្ធបំបែកខ្លួន និងអ្នករត់ពន្ធអាភៀនពីប្រទេសអាហ្វហ្គានីស្ថាន ដែលជាអ្នកផលិតគ្រឿងញៀនកំពូលរបស់ពិភពលោក។
អ៊ីរ៉ង់មានតម្លៃប្រេងឥន្ធនៈទាបបំផុតក្នុងពិភពលោក ហើយនេះក៏នាំឱ្យមានការបង្កើនការរត់ពន្ធប្រេងទៅកាន់ប៉ាគីស្ថាន និងអាហ្វហ្គានីស្ថាន បើទោះបីជាមានការបង្ក្រាបដោយឆ្មាំព្រំដែនអ៊ីរ៉ង់ក៏ដោយ៕
