យន្តហោះនៃក្រុមហ៊ុន Japan Airline ឆេះក្រោយបុគគ្នា។ AFP
ក្រោយកើតហេតុនៃការប៉ះទង្គិចគ្នារវាងយន្តហោះដឹកអ្នកដំណើររបស់ក្រុមហ៊ុន Japan Airlines និងយន្តហោះឆ្មាំឆ្នេរសមុទ្រជប៉ុនដែលដឹកជំនួយសម្រាប់កិច្ចការសង្គ្រោះបន្ទាន់ដោយសារគ្រោះរញ្ជួយដី នាយកដ្ឋានប៉ូលិសក្រុងតូក្យូ នឹងបង្កើតទីស្នាក់ការស៊ើបអង្កេតមួយនៅស្ថានីយប៉ូលិសអាកាសយានដ្ឋានតូក្យូ ដើម្បីស៊ើបអង្កេតការបុកគ្នាដែលបានកើតឡើងនៅលើផ្លូវរត់នៅឯអាកាសយានដ្ឋាន Haneda កាលពីថ្ងៃអង្គារ។
យោងតាមការផ្សាយរបស់ The Japan News នាយកដ្ឋានប៉ូលិសក្រុងតូក្យូ នឹងស៊ើបអង្កេតមូលហេតុនៃឧប្បត្តិហេតុនេះដោយការសម្ភាសអ្នកដែលពាក់ព័ន្ធក្នុងគោលបំណងដាក់ការចោទប្រកាន់ពីបទធ្វេសប្រហែសវិជ្ជាជីវៈដែលបណ្តាលឱ្យស្លាប់ឬរបួស។
យោងតាមនាយកដ្ឋានប៉ូលិសទីក្រុងតូក្យូ សមាជិកនាវិកចំនួន៥នាក់នៃយន្តហោះឆ្មាំឆ្នេរសមុទ្រជប៉ុនដែលបានបុកជាមួយយន្តហោះរបស់ក្រុមហ៊ុនអាកាសចរណ៍ជប៉ុននៅអាកាសយានដ្ឋាន Haneda ក្នុងទីក្រុងតូក្យូកាលពីថ្ងៃអង្គារត្រូវបានបញ្ជាក់ថាបានស្លាប់ ខណៈសេចក្តីរាយការណ៍ដំបូង អ្នកដំណើរនិងអ្នកបម្រើសេវាលើយន្តហោះJapan Airlines ចំនួន ៣៧៩នាក់ត្រូវបានជម្លៀសចេញដោយសុវត្ថិភាព។
ប្រធានក្រុមក្នុងយន្តហោះឆ្មាំសមុទ្រជប៉ុនអាចរត់គេចខ្លួនពីឧប្បត្តិហេតុ។
ទីភ្នាក់ងារនេះបានឱ្យដឹងថា យន្តហោះ JCG កំពុងធ្វើដំណើរចុះពីលើផ្លូវរត់នៅឯអាកាសយានដ្ឋាន Haneda ដើម្បីហោះឡើង និងឆ្ពោះទៅមូលដ្ឋានទ័ពអាកាសក្នុងទីក្រុង Niigata ជាកន្លែងដែលវាត្រូវដឹកជញ្ជូនគ្រឿងផ្គត់ផ្គង់ទៅកាន់តំបន់រងគ្រោះដោយគ្រោះមហន្តរាយបន្ទាប់ពីការរញ្ជួយដីដ៏ធំនៅកោះ Noto Peninsula កាលពីថ្ងៃចន្ទ៕
