នាយករដ្ឋមន្ត្រីជប៉ុន ហ្វូមីអូ គីស៊ីដា ចាប់ដៃប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ក្នុងកិច្ចប្រជុំកំពូល G-7 កាលខែឧសភា២០២៣។ AFP
ប្រទេសជប៉ុន ដែលជាសម្ព័ន្ធមិត្តដ៏ជិតស្និទ្ធរបស់សហរដ្ឋអាមេរិក គ្រោងផ្តល់ឱ្យអ៊ុយក្រែននូវបច្ចេកវិទ្យាផលិតជីវឥន្ធនៈ ដើម្បីគាំទ្រដល់កិច្ចខិតខំប្រឹងប្រែងស្តារឡើងវិញរបស់ប្រទេសនៅអឺរ៉ុបខាងកើតមួយនេះ ដែលហែកហួរដោយសារសង្គ្រាមជាមួយប្រទេសរុស្សី។
ផែនការរបស់ជប៉ុននេះនឹងត្រូវបង្ហាញនៅឯកិច្ចប្រជុំក្នុងទីក្រុងតួក្យូនៅខែក្រោយ ដោយមានការចូលរួមពីមន្ត្រីនិងវិស័យឯកជននៃប្រទេសទាំង ២ ដើម្បីពិភាក្សាលើការគាំទ្រសម្រាប់ការស្តារប្រទេសអ៊ុយក្រែន ឡើងវិញ។
ទីក្រុងតូក្យូរំពឹងថា បច្ចេកវិទ្យាជីវឥន្ធនៈនឹងបង្កើតនៅឧស្សាហកម្មថ្មីក្នុងប្រទេសអ៊ុយក្រែនដែលជាប្រទេសកសិកម្មសម្បូរដោយធនធានដែលត្រូវបានគេមើលរំលង ហើយអាចត្រូវបានគេប្រើប្រាស់ជាឥន្ធនៈ។
មិនដូចសហរដ្ឋអាមេរិក និងសហភាពអឺរ៉ុបទេ ប្រទេសជប៉ុនដែលជ្រកក្រោមដំបូលរដ្ឋធម្មនុញ្ញសន្តិភាពនិយមបានដាក់បម្រាមលើខ្លួនឯងក្នុងការនាំចេញអាវុធ ហើយជំនួសមកវិញ ជប៉ុនផ្តោតលើមធ្យោបាយដើម្បីផ្តល់ជំនួយដល់ការងើបឡើងវិញ និងកសាងឡើងវិញក្រោយការឈ្លានពានរបស់រុស្ស៊ី។
មានការរំពឹងទុកថា ក្រុមហ៊ុនទាំងឡាយរបស់ជប៉ុននឹងយល់ព្រមផ្តល់បច្ចេកវិទ្យាផលិតថាមពលកកើតឡើងវិញ និងឧបករណ៍ពាក់ព័ន្ធផ្សេងទៀតនៅឯសន្និសីទលើកកម្ពស់ការស្ថាបនាសេដ្ឋកិច្ចឡើងវិញជប៉ុន-អ៊ុយក្រែន ដែលនឹងត្រូវប្រារព្ធឡើងនៅថ្ងៃទី១៩ខែកុម្ភៈ។
ជីវឥន្ធនៈដែលត្រូវបានផលិតចេញពីដំណាំកសិកម្មនិងកាកសំណល់បសុសត្វអាចត្រូវបានប្រើសម្រាប់ផលិតថាមពលហើយត្រូវបានទាក់ទាញការយកចិត្តទុកដាក់ជាបច្ចេកវិទ្យាមួយដែលអាចដឹកនាំទៅរកកិច្ចខិតខំប្រឹងប្រែងបន្ថយកាបូនទៅក្នុងបរិយាកាស (decarbonization)។
មន្ត្រីរដ្ឋាភិបាលជប៉ុនម្នាក់បាននិយាយថា៖«ប្រសិនបើអាជីវកម្មនេះដុះចេញពីដីវានឹងផ្តល់នូវផលិតផលនាំចេញដែលមានការសន្យា»សម្រាប់ប្រទេសអ៊ុយក្រែននិងអាចជួយបង្កើនប្រាក់ចំណូលរូបិយប័ណ្ណបរទេសរបស់ប្រទេសនេះ។
ប្រភពបាននិយាយថារដ្ឋាភិបាលជប៉ុនបាននិងកំពុងធ្វើការស្ទង់មតិតម្រូវការរបស់អ៊ុយក្រែននៅមុនកិច្ចប្រជុំដែលមានគោលបំណងផ្តល់ការគាំទ្ររយៈពេលមធ្យមនិងរយៈពេលវែងដោយមានជំនួយពីការវិនិយោគឯកជនក្នុងវិស័យថាមពលការថែទាំវេជ្ជសាស្រ្តនិងហេដ្ឋារចនាសម្ព័ន្ធ។
បន្ថែមពីលើជីវឥន្ធនៈប្រទេសជប៉ុនក៏កំពុងពិចារណាផ្តល់ជើងសិប្បនិម្មិតដែលផលិតដោយបច្ចេកវិទ្យាបោះពុម្ព 3D និងបច្ចេកវិទ្យាសម្រាប់ការព្យាបាលជំងឺស្ត្រេសក្រោយការប៉ះទង្គិចផ្លូវចិត្តផងដែរ។
យោងតាមប្រភពជាច្រើនបានឱ្យដឹងថាប្រទេសជប៉ុនក៏មានគម្រោងគាំទ្រដល់ការដាក់ឱ្យប្រើប្រាស់ការថែទាំវេជ្ជសាស្រ្តពីចម្ងាយនិងបច្ចេកវិទ្យាកសិកម្មឆ្លាតវៃនៅក្នុងប្រទេសអ៊ុយក្រែនដែរ៕
