លោក Wissam Tawil គឺជាវរជនដ៏ឆ្នើមបំផុតរបស់ក្រុមហេសបូឡាហ៍ និងជាមេបញ្ជាការកងកម្លាំងពិសេសរបស់ក្រុមហេសបូឡាហ៍ ហៅកាត់ថា «Radwan»។
រយៈពេល ១ សប្តាហ៍ ក្រោយសម្លាប់មេដឹកនាំជាន់ខ្ពស់របស់ក្រុមហាម៉ាស់ក្នុងប្រទេសលីបង់ កងទ័ពអ៊ីស្រាអែល បានបន្តសម្លាប់មេទ័ពកំពូលរបស់ពួកសកម្មប្រយុទ្ធហេសបូឡាហ៍ ដែលគាំទ្រក្រុមហាម៉ាស់ក្នុងការវាយប្រហារមួយនៅភាគខាងត្បូងប្រទេសលីបង់ កាលពីថ្ងៃទី៨ ខែមករា។ យោងសេចក្តីរាយការណ៍របស់រ៉យទ័រ។
សារព័ត៌មាននេះបានដកស្រង់ប្រភពជាន់ខ្ពស់នៅប្រទេសលីបង់ដែលបាននិយាយថា លោក Wissam Tawil គឺជាវរជនដ៏ឆ្នើមបំផុតរបស់ក្រុម ហេសបូឡាហ៍ និងជាមេបញ្ជាការកងកម្លាំងពិសេសរបស់ក្រុមហេសបូឡាហ៍ ហៅកាត់ថា «Radwan» ត្រូវបានសម្លាប់ក្នុងជម្លោះប្រដាប់អាវុធជាមួយប្រទេសអ៊ីស្រាអែល។ លោក Tawil បានដើរតួនាទីនាំមុខគេក្នុងការដឹកនាំប្រតិបត្តិការរបស់ខ្លួននៅភាគខាងត្បូង។
អ្នកប្រយុទ្ធជាង១៣០នាក់របស់ក្រុមហេសបូឡាហ៍ រួមទាំងសមាជិក Radwan ត្រូវបានសម្លាប់នៅក្នុងការប្រយុទ្ធគ្នារយៈពេល៣ខែ ចាប់តាំងពីក្រុមហាម៉ាស់ដែលជាសម្ព័ន្ធមិត្តរបស់ហេសបូឡាហ៍បានវាយប្រហារអ៊ីស្រាអែលពីតំបន់ហ្គាហ្សាកាលពីថ្ងៃទី៧ខែតុលា។
មរណភាពរបស់លោក Wissam Tawil បានក្លាយជាការប្រឈមមុខដាក់គ្នាដ៏សាហាវបំផុតរវាងអ៊ីស្រាអែល និងក្រុមហេសបូឡាហ៍ដែលគាំទ្រដោយអ៊ីរ៉ង់ចាប់តាំងពីពួកគេបានធ្វើសង្គ្រាមក្នុងឆ្នាំ២០០៦មក។ នេះបើតាមព័ត៌មានរ៉យទ័រ។
មនុស្សរាប់ម៉ឺននាក់នៅសងខាងព្រំដែនបានភៀសខ្លួន ហើយការប្រយុទ្ធគ្នាបានបង្កើនក្តីបារម្ភអំពីជម្លោះដែលកាន់តែរីកធំឡើងរវាងប្រទេសលីបង់ និងអ៊ីស្រាអែល។
ប្រភព៣ នៅក្នុងប្រទេសលីបង់បាននិយាយថា លោក Tawil និងយុទ្ធជនក្រុមហេសបូឡាហ៍ម្នាក់ទៀតបានស្លាប់នៅពេលដែលរថយន្តដែលពួកគេជិះត្រូវបានវាយប្រហារនៅក្នុងភូមិ Majdal Selm មានចម្ងាយប្រហែល ៦គីឡូម៉ែត្រពីព្រំដែន។
កាលពីសប្តាហ៍មុនប្រទេសលីបង់និងអាជ្ញាធរប៉ាឡេស្ទីន បានអះអាងដូចគ្នាថា អ៊ីស្រាអែលបានសម្លាប់មេដឹកនាំនយោបាយជាន់ខ្ពស់របស់ក្រុមហាម៉ាស់ គឺលោក Saleh al-Arouri ក្នុងការវាយប្រហារតាមផ្លូវអាកាសដោយប្រើដ្រូន ប៉ុន្តែអ៊ីស្រាអែលមិនបានទាំងទទួលស្គាល់និងបដិសេធលើរឿងនេះទេ។
ទោះយ៉ាងណា សហរដ្ឋអាមេរិកដែលជាសម្ព័ន្ធមិត្តអ៊ីស្រាអែល បានចេញមុខបដិសេធថា អ៊ីស្រាអែលមិនបានធ្វើរឿងនោះទេ៕
