ប្រមុខកងទ័ពមីយ៉ាន់ម៉ា លោក Min Aung Hlaing ដែលដឹកនាំរដ្ឋប្រហារ។ AFP
ក្នុងខួប ៣ ឆ្នាំ នៃការធ្វើរដ្ឋប្រហារនៅមីយ៉ាន់ម៉ា សហរដ្ឋអាមេរិកកាលពីថ្ងៃពុធ បានប្រកាសដាក់ទណ្ឌកម្មទៅលើអង្គភាពចំនួន ២ និងបុគ្គលជាច្រើននាក់ដែលមានទំនាក់ទំនងជិតស្និទ្ធជាមួយនឹងរបបយោធាមីយ៉ាន់ម៉ា ខណៈរដ្ឋប្រហារទម្លាក់រដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី រយៈពេល ៣ ឆ្នាំនេះ គ្មានរកឃើញដំណោះស្រាយនយោបាយណាមួយឡើយ។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
ការដាក់ទណ្ឌកម្មបន្ថែមកាលពីថ្ងៃពុធ គឺជាយន្តការចុងក្រោយបង្អស់ដែលសហរដ្ឋអាមេរិក កំណត់គោលដៅលើប្រភពធនធានផលិតអាវុធរបស់របបយោធា ក៏ដូចជាប្រភពធនធាន ដែលរបបយោធាយកទៅប្រើប្រាស់ក្នុងការវាយប្រហារក្រុមប្រដាប់អាវុធប្រឆាំង ដោយសម្លាប់ទាំងជនស៊ីវិលជាច្រើននាក់។
ក្រសួងរតនាគារសហរដ្ឋអាមេរិក បាននិយាយនៅក្នុងសេចក្ដីថ្លែងការណ៍ថា អង្គភាពរងទណ្ឌកម្មថ្មីរួមមាន ក្រុមហ៊ុន Shwe Byain Phyu Group និងម្ចាស់ក្រុមហ៊ុននេះ លោក Thein Win Zaw ប្រពន្ធរបស់លោក និងកូនៗ ២ នាក់ទៀត។
ក្រសួងរតនាគារបន្តថា ក្រុមហ៊ុននេះបាននាំចូល និងចែកចាយប្រេងសម្រាប់របបយោធា និងមានទំនាក់ទំនងចែករំលែកប្រាក់ចំណេញជាមួយគ្នា ជាមួយនឹងក្រុមហ៊ុនយោធា Myanmar Economic Holdings Ltd (MEHL) ដែលអាមេរិកបានដាក់ទណ្ឌកម្មក្នុងឆ្នាំ ២០២១។
ក្នុងកញ្ចប់ទណ្ឌកម្មថ្មីផងដែរ អាមេរិកបានកំណត់គោលដៅលើក្រុមហ៊ុនដឹកជញ្ជូនដែលគ្រប់គ្រងដោយ MEHL គឺក្រុមហ៊ុន Five Star Line ដោយចោទថា ក្រុមហ៊ុននេះបានដឹកជញ្ជូនវត្ថុធាតុដើមបម្រើឱ្យការផលិតអាវុធក្នុងស្រុករបស់របបយោធា។
ក្រសួងរតនាគារបាននិយាយថា ក្រុមហ៊ុន Shwe Byain Phyu Group និងក្រុមហ៊ុន Five Star Line បានបើកលទ្ធភាពទិញរូបិយប័ណ្ណបរទេស និងនាំចូលប្រេង និងវត្ថុធាតុផ្សេងទៀត ក្នុងនាមរដ្ឋាភិបាលយោធាមីយ៉ាន់ម៉ា។
អ្នកនាំពាក្យក្រសួងការបរទេសអាមេរិក លោក Matthew Miller បាននិយាយក្នុងសេចក្តីថ្លែងការណ៍ថា៖ «យើងកំពុងចាត់វិធានការនេះ ដើម្បីកំណត់គោលដៅប្រភពចំណូលរបស់របបនេះ ដែលគាំទ្រសកម្មភាពយោធាប្រឆាំងនឹងជនស៊ីវិល»។
ការដាក់ទណ្ឌកម្មរបស់អាមេរិកជាទូទៅ ធ្វើឡើងដោយយន្តការបង្កកទ្រព្យសកម្មនៅសហរដ្ឋអាមេរិករបស់ក្រុមហ៊ុន ឬបុគ្គលដែលជាគោលដៅក៏ដូចជារារាំងប្រជាជន ឬក្រុមហ៊ុនអាមេរិក ពីការមានទំនាក់ទំនងជាមួយគោលដៅទាំងនោះ។
ទណ្ឌកម្មថ្មី ធ្វើឡើងខណៈមេដឹកនាំរបបយោធា លោក Min Aung Hlaing ស្ថិតនៅក្រោមសម្ពាធ បន្ទាប់ពីការបរាជ័យក្នុងសមរភូមិជាមួយក្រុមឧទ្ទាមជាបន្តបន្ទាប់ ដោយក្រុមតស៊ូប្រដាប់អាវុធទាំងនោះ បានចូលកាន់កាប់លើទីក្រុងយ៉ាងហោចណាស់ចំនួន ៣៥ រាប់តាំងពីខែតុលា ឆ្នាំមុនមក។
ប្រទេសមីយ៉ាន់ម៉ាត្រូវបានជាប់គាំងនៅក្នុងជម្លោះ ចាប់តាំងពីយោធាបានដណ្តើមអំណាចនៅក្នុងរដ្ឋប្រហារថ្ងៃ ទី ១ ខែកុម្ភៈ ឆ្នាំ ២០២១៕
