ប្រជាជនឥណ្ឌា កំពុងសាកល្បងទូរស័ព្ទដៃផលិតផលរបស់ក្រុមហ៊ុន Xiaomi របស់មហាយក្សចិន។ AFP
ក្រុមហ៊ុន Xiaomi របស់មហាយក្សចិន កាលពីថ្ងៃទី ១១ ខែកុម្ភៈ ឆ្នាំ ២០២៤ បានជូនដំណឹងដល់រដ្ឋាភិបាលក្រុងញូវដែលី (New Delhi) ថា ក្រុមហ៊ុនផ្គត់ផ្គង់គ្រឿងបន្លាស់ស្មាតហ្វូនរបស់ Xiaomi មានការស្ទាក់ស្ទើរក្នុងការបង្កើតប្រតិបត្តិការរបស់ពួកគេនៅក្នុងប្រទេសឥណ្ឌា ដោយសារតែរដ្ឋាភិបាលឥណ្ឌា បានចុះត្រួតពិនិត្យយ៉ាងតឹងរ៉ឹងទៅលើក្រុមហ៊ុនបច្ចេកវិទ្យាចិនយ៉ាងច្រើនមួយរយៈពេលចុងក្រោយនេះ។ នេះបើយោងតាមប្រភពសុំមិនបញ្ចេញអត្តសញ្ញាណមួយ។
ក្រុមហ៊ុនទូរស័ព្ទចល័ត Xiaomi បានជ្រៀតចូលទៅក្នុងទីផ្សាររបស់ឥណ្ឌារហូតដល់ទៅ ១៨ ភាគេយ នៃទីផ្សារស្មាតហ្វូនសរុប។ ក្រុមហ៊ុននេះធ្លាប់ស្នើសុំនៅក្នុងលិខិតមួយចុះថ្ងៃទី៦ ខែកុម្ភៈ ទៅកាន់រដ្ឋាភិបាលឥណ្ឌា ឱ្យពិចារណាផ្តល់ការលើកទឹកចិត្តដល់ការផលិត និងកាត់បន្ថយពន្ធនាំចូលសម្រាប់គ្រឿងបន្លាស់ស្មាតហ្វូនមួយចំនួន។
ក្រុមហ៊ុនទូរស័ព្ទដៃរបស់ចិនមួយនេះ បាននិងកំពុងផលិតទូរស័ព្ទដៃទំនើបក្នុងប្រទេសឥណ្ឌា ដោយប្រើប្រាស់គ្រឿងបន្លាស់ក្នុងស្រុកភាគច្រើន ហើយខ្លះនាំចូលពីប្រទេសចិន និងប្រទេសផ្សេងៗទៀត។ លិខិតខាងលើរបស់ក្រុមហ៊ុន Xiaomi ដែលបានដាក់ជូនទៅកាន់រដ្ឋាភិបាលឥណ្ឌា គឺជាការឆ្លើយតបទៅនឹងសំណួររបស់ក្រសួងព័ត៌មានឥណ្ឌា ជុំវិញការជំរុញវិស័យផលិតគ្រឿងបន្លាស់របស់ឥណ្ឌាឱ្យបានកាន់តែល្អប្រសើរ។
បន្ទាប់ពីការប៉ះទង្គិចនៅតាមព្រំដែនក្នុងឆ្នាំ ២០២០ ដែលបណ្តាលឱ្យមានអ្នកស្លាប់ និងរបួសទាំងសងខាង ឥណ្ឌាបានបង្កើនការត្រួតពិនិត្យកាន់តែលម្អិតទៅលើអាជីវកម្មរបស់ចិននៅឥណ្ឌា។ ការណ៍នេះបានបង្អាក់ផែនការវិនិយោគរបស់ក្រុមហ៊ុនចិនធំៗ ហើយនាំឱ្យមានការទាមទារតវ៉ាម្តងហើយម្តងទៀតពីរដ្ឋាភិបាលក្រុងប៉េកាំង។
បើទោះបីជាក្រុមហ៊ុនចិនក្នុងប្រទេសឥណ្ឌា ស្ទាក់ស្ទើរក្នុងការពិភាក្សាបញ្ហានេះដោយបើកចំហក៏ដោយ ក៏លិខិតរបស់ក្រុមហ៊ុន Xiaomi បានបង្ហាញពីបញ្ហាប្រឈមដែលក្រុមហ៊ុនកំពុងជួបប្រទះនៅក្នុងប្រទេសឥណ្ឌា ជាពិសេសនៅក្នុងវិស័យស្មាតហ្វូន ដោយសារតែសមាសធាតុតូចសំខាន់ៗជាច្រើន ត្រូវនាំចូលពីក្រុមហ៊ុនផ្គត់ផ្គង់របស់ចិន។
ប្រធានក្រុមហ៊ុន Xiaomi ប្រចាំនៅប្រទេសឥណ្ឌា លោក មូរ៉ាលីគ្រីស្នាន (Muralikrishnan) បានសង្កត់ធ្ងន់ថា ឥណ្ឌាត្រូវដាក់ចេញវិធានការកសាងទំនុកចិត្ត ដូចជាការលើកទឹកចិត្តដល់ក្រុមហ៊ុនផ្គត់ផ្គង់គ្រឿងបន្លាស់ឱ្យបង្កើតប្រតិបត្តិការនៅក្នុងប្រទេសឥណ្ឌាផ្ទាល់។ លោកក៏បានលើកឡើងពីការព្រួយបារម្ភចំពោះក្រុមហ៊ុនផ្គត់ផ្គង់ ជាពិសេសក្រុមហ៊ុនដែលនៅប្រទេសចិន ប៉ុន្តែលោកមិនបញ្ចេញឈ្មោះក្រុមហ៊ុនណាមួយឱ្យជាក់លាក់នោះទេ។
ក្នុងលិខិតនោះផងដែរ ក៏បានលើកឡើងពីកង្វល់មួយចំនួនពាក់ព័ន្ធនឹងការអនុលោមតាមច្បាប់ បញ្ហាទិដ្ឋាការ និងកត្តាផ្សេងៗទៀតដោយមិនផ្តល់ព័ត៌មានលម្អិតបន្ថែមនោះទេ។ ក្រុមហ៊ុនបានជំរុញឱ្យរដ្ឋាភិបាលឥណ្ឌា ព្យាយាមដោះស្រាយកង្វល់ទាំងអស់នេះ និងកសាងទំនុកចិត្តដល់ក្រុមហ៊ុនផ្គត់ផ្គង់គ្រឿងបន្លាស់នៅបរទេស ដើម្បីអាចជំរុញឱ្យពួកគេបង្កើតរោងចក្រផលិតនៅក្នុងប្រទេសឥណ្ឌាដោយផ្ទាល់។
យ៉ាងណាក៏ដោយ ក្រុមហ៊ុន Xiaomi និងក្រសួងព័ត៌មានឥណ្ឌាមិនបានឆ្លើយតបនឹងការស្នើសុំផ្ដល់ការអត្ថាធិប្បាយបន្ថែមនោះទេ។
អាជ្ញាធរឥណ្ឌាធ្លាប់បានចោទប្រកាន់ក្រុមហ៊ុន Vivo ពីបទរំលោភបំពានទិដ្ឋាការ និងការផ្ទេរមូលនិធិចេញក្រៅប្រទេសចំនួន ១៣ ប៊ីលានដុល្លារសហរដ្ឋអាមេរិក។ ដោយឡែក ប្រទេសឥណ្ឌាបានបង្កកទ្រព្យសម្បត្តិរបស់ក្រុមហ៊ុន Xiaomi ជាង ៦០០ លានដុល្លារ ដោយសង្ស័យថា ក្រុមហ៊ុននេះបានបញ្ជូនប្រាក់ដោយខុសច្បាប់ទៅក្រៅប្រទេស ជាការទូទាត់ថ្លៃសួយសារអាករ។ ប៉ុន្តែ ក្រុមហ៊ុនចិនទាំងពីរបានបដិសេធថាចំពោះការចោទប្រកាន់របស់ឥណ្ឌា។
ចាប់តាំងពីឆ្នាំ ២០២០ មក ប្រទេសឥណ្ឌា បានបង្កើតបទប្បញ្ញត្តិត្រួតពិនិត្យលើក្រុមហ៊ុនចិនដូចជា Xiaomi និង Vivo ជាដើម ហើយថែមទាំងបានហាមឃាត់កម្មវិធីទូរស័ព្ទដៃរបស់ចិនជាង ៣០០ កម្មវិធី ក្នុងនោះក៏មាន TikTok ផងដែរ។
ក្នុងលិខិតនោះ ក្រុមហ៊ុន Xiaomi បានលើកឡើងថា ប្រសិនបើឥណ្ឌាផ្ដល់ការលើកទឹកចិត្តបន្ថែម នោះនឹងអាចជំរុញការប្រកួតប្រជែងក្នុងវិស័យផលិតកម្មរបស់ឥណ្ឌាកាន់តែប្រសើរ ជាពិសេសគឺការទាក់ទាញក្រុមហ៊ុនផលិតគ្រឿងបន្លាស់ឱ្យបង្កើតប្រតិបត្តិការនៅក្នុងប្រទេសឥណ្ឌាផ្ទាល់៕
