ប្រធានគណបក្សឆ្ពោះទៅមុខ លោក ឆៃថាវ៉ាត់ ធូឡាថុន។ MFP
ខណៈពេលដែលតុលាការធម្មនុញ្ញថៃទើបរកឃើញកំហុសរបស់ថ្នាក់ដឹកនាំគណបក្សឆ្ពោះទៅមុខ (Move Forward Party MFP) បច្ចុប្បន្នដែលប៉ះពាល់ដល់ស្ថាប័នព្រះមហាក្សត្រថៃ មន្ត្រីជាន់ខ្ពស់របស់គណបក្សដែលមានប្រវត្តិចេញពីក្រុមយោធាជាន់ខ្ពស់ បានក្រើនរំឭកឱ្យថ្នាក់ដឹកនាំបក្សនេះប្រាប់ទៅអ្នកគាំទ្រឱ្យឈប់និយាយអ្វីប៉ះពាល់ព្រះមហាក្សត្រ។
លោក ថាណាខន វ៉ាងប៊ូនកុងឆាណា (Thanakorn Wangboon kongchana) អនុប្រធានគណបក្សរួបរួមជាតិថៃ (United Thai Nation Party) ដែលបង្កើតឡើងដោយអតីតនាយករដ្ឋមន្ត្រី ប្រាយុធ ចាន់អូចា បាននិយាយទៅកាន់មេដឹកនាំគណបក្សឆ្ពោះទៅមុខថា ពួកគេគួរតែប្រកាសប្រាប់អ្នកតវ៉ាថា ស្ថាប័នរាជវង្សមិនពាក់ព័ន្ធនឹងនយោបាយ ហើយក៏មិនមែនជាភាគីជម្លោះដែរ។
សារព័ត៌មានបាងកកប៉ុស្ដិ៍ (Bangkok Post) នៅថ្ងៃទី ១១ ខែកុម្ភៈ ឆ្នាំ ២០២៤ បានចុះផ្សាយថា ការលើកឡើងរបស់ លោក ថាណាខន គឺសំដៅទៅកាន់ប្រធានគណបក្សឆ្ពោះទៅមុខ លោក ឆៃថាវ៉ាត់ ធូឡាថុន (Chaithawat Tulaton) និងអតីតប្រធានគណបក្ស និងបច្ចុប្បន្នជាប្រធានទីប្រឹក្សាគណបក្ស លោក ភិថា លីមចារើនរ៉ាត់ (Pita Limjaroenrat) ផងដែរ។
លោក ថាណាខន បានសង្កត់ធ្ងន់ថា បទល្មើសប្រឆាំងនឹងស្ថាប័នព្រះមហាក្សត្រ គឺជាបទឧក្រិដ្ឋធ្ងន់ធ្ងរ ហើយមិនគួរចាត់ចូលក្នុងរឿងនយោបាយដែលត្រូវលើកលែងទោសនោះទេ។ លោកបានលើកឡើងសំដៅទៅកាន់ហេតុការណ៍ដែលបានកើតឡើងថ្មីៗកន្លងទៅនេះដែលសមាជិកក្រុមបាតុករបានចុចស៊ីហ្លេរថយន្តរបស់ពួកគេ ខណៈដែលរថយន្តរបស់ព្រះអង្គម្ចាស់ក្សត្រីមហាចក្រី ស៊ីរុីនថន (Maha Chakri Sirindhorn) កំពុងធ្វើដំណើរលើផ្លូវល្បឿនលឿននៅទីក្រុងបាងកកកាលពីថ្ងៃទី ៤ ខែកុម្ភៈ។
លោក ថាណាខន បានលើកឡើងថា៖ «លោក ភិថា និងលោក ឆៃថាវ៉ាត់ គួរតែណែនាំក្រុមទាំងនោះកុំឱ្យមានការមិនគោរពស្ថាប័នព្រះមហាក្សត្រ និងត្រូវធ្វើការបញ្ចេញមតិផ្នែកនយោបាយក្នុងន័យស្ថាបនា និងក្នុងដែនកំណត់នៃច្បាប់»។
ដោយសារប្រឈមផ្លូវច្បាប់ច្រើន និងស្មុគស្មាញរបស់ថ្នាក់ដឹកនាំគណបក្សឆ្ពោះទៅមុខដ៏មានប្រជាប្រិយ ដែលធ្លាប់ឈ្នះការបោះឆ្នោតច្រើនជាងគេកាលពីខែឧសភា ឆ្នាំមុន ប៉ុន្តែបរាជ័យក្នុងការបង្កើតរដ្ឋាភិបាលចម្រុះគណបក្សឆ្ពោះទៅមុខត្រូវបានគេមើលឃើញថា ប្រឈមការរំលាយចោល ដើម្បីបញ្ចៀសហេតុការណ៍នៃការកែទម្រង់ណាមួយ ពេលបក្សនេះឈ្នះឆ្នោតក្នុងអនាគត៕
