ប៉ូលិសឥណ្ឌាបាញ់ឧស្ម័នបង្ហូរទឹកភ្នែកលើក្រុមបាតុករ។ AFP
ក្រុមអាជ្ញាធររបស់ប្រទេសឥណ្ឌា កាលពីថ្ងៃទី១៤ កុម្ភៈ បានបាញ់ឧស្ម័នបង្ហូរទឹកភ្នែកដាក់ក្រុមកសិករ ដែលធ្វើបាតុកម្មទាមទារឱ្យរដ្ឋាភិបាលដំឡើងថ្លៃលើដំណាំកសិផលដែលពួកគេផលិតបាន។
ខណៈដែលការបាតុកម្មបានឈានចូលដល់ថ្ងៃទី២ ក្រុមកសិកររាប់ពាន់នាក់ បានប្រមូលផ្ដុំគ្នាធ្វើដំណើរទៅកាន់ទីក្រុងញូវដែលី ដើម្បីបន្តការតវ៉ាក្រោយបរាជ័យក្នុងការចរចាជាមួយរដ្ឋាភិបាល។ ធ្វើដំណើរដោយឡានដឹកទំនិញធំៗដោយមានទាំងរ៉ឺម៉កដឹកកសិផលរបស់ពួកគេផងនោះក្បួនបាតុកម្មត្រូវបានជាប់គាំងនៅតាមផ្លូវដោយសារតែការបង្ក្រាបរបស់អាជ្ញាធរ។
មិនត្រឹមតែបង្ក្រាបនៅទីតាំងក្បួនប៉ុណ្ណោះទេតែអាជ្ញាធរ ក៏បានរៀបចំសន្តិសុខយ៉ាងតឹងរ៉ឹងនៅតាមតំបន់ជាប់ព្រំដែនទីក្រុងញូវដែលីដោយដាក់ពង្រាយមន្ត្រីប៉ូលិសរាប់រយនាក់ពង្រាយបន្លាលួសនិងដាក់កុងតឺន័រសម្រាប់ធ្វើជារនាំងបាំងផ្លូវដែលក្បួននឹងត្រូវធ្វើដំណើរផងដែរ។
យ៉ាងណាមិញកងកម្លាំងសន្តិសុខបានបញ្ឈប់កសិករនៅត្រង់ចំណុចព្រំដែន Shambhu ជារដ្ឋភាគខាងជើងដែលមានប្រជាជនភាគច្រើនជាកសិករ ហើយដែលមានចម្ងាយប្រមាណជាង២០០គីឡូម៉ែត្រប៉ុណ្ណោះពីគោលដៅរបស់ក្រុមបាតុករគឺទីក្រុងញូវដែលី។
នៅក្នុងអំឡុងពេលនៃការបញ្ឈប់ក្រុមបាតុករទាំងនោះអគ្គស្នងការរដ្ឋ Haryana គឺលោកShatrujeetKapurបាននិយាយថាក្រុមបាតុករបានគប់ដុំថ្មនិងព្យាយាមទម្លុះរបាំងការពារ។
លោកបាននិយាយទៀតថា៖«ប៉ូលិសនិងកងកម្លាំងទាហានបានសម្រេចចិត្តក្នុងការតបតដោយប្រើប្រាស់ឧស្ម័នបង្ហូរទឹកភ្នែកនិងបាញ់ទឹកដាក់ក្រុមបាតុករដើម្បីរក្សាស្ថានភាពឱ្យស្ថិតក្រោមការគ្រប់គ្រង»។
កងកម្លាំងសន្តិសុខក៏ថែមទាំងបានប្រើប្រាស់ដ្រូន ដើម្បីទម្លាក់កំប៉ុងឧស្ម័នបង្ហូរទឹកភ្នែកទៅលើក្រុមកសិករដែលជាការឆ្លើយតបក្រុមកសិករនាំគ្នាគប់សម្ភារផ្សេងៗទៅកាន់ដ្រូនទាំងនោះវិញ។
បើទោះបីជាមានការបង្ក្រាបទប់ទល់យ៉ាងចាស់ដៃពីអាជ្ញាធរយ៉ាងនេះក្ដី ក្រុមកសិករនៅតែប្ដេជ្ញាក្នុងការធ្វើសកម្មភាពតវ៉ាបន្តទៀតប្រឆាំងនឹងក្រុមប៉ូលិស ដែលបិទផ្លូវនាំឱ្យរំខានដល់ក្បួនរបស់ពួកគេឆ្ពោះទៅកាន់ក្រុងញូវដែលី។នៅក្នុងក្បូនបាតុកម្មក្រុមកសិករបានស្រែកលឺៗថា៖«ពួកយើងមិនជឿសន្យាខ្យល់របស់រដ្ឋាភិបាលទៀតទេ»។
ការបាត់បង់ទំនុកចិត្តរបស់ក្រុមកសិករនាពេលនេះដែរកើតឡើងបន្ទាប់ពីបាតុកម្មស្រដៀងគ្នានេះបានផ្ទុះឡើងកាលពីឆ្នាំ២០២១ដែលកាលនោះលោកនាយករដ្ឋមន្ត្រី Narendra Modi បានសន្យាថានឹងដាក់ចេញនូវគោលនយោបាយថ្មីដើម្បីបន្ថែមតម្លៃលើកសិផល។
ប៉ុន្តែយ៉ាងណាក្រុមកសិករអះអាងថា រដ្ឋាភិបាលមានភាពយឺតយ៉ាវ ក្នុងការសម្រេចបានតាមអ្វីដែលធ្លាប់សន្យាជាមួយប្រជាកសិករ។ដូច្នេះហើយបាតុកម្មលើកនេះ ក្រុមកសិករទាំងនោះ បានសង្កត់ធ្ងន់ថា៖«កាលពីជាង ២ ឆ្នាំ មុនរដ្ឋាភិបាលបានបោកប្រាស់ទំនុកចិត្តពួកយើង ប៉ុន្តែលើកនេះ យើងនឹងមិនចាញ់កលរបស់ពួកគេទៀតទេហើយយើងនឹងមិនត្រឡប់ទៅផ្ទះដាច់ខាតលុះត្រាតែរដ្ឋាភិបាលទទួលយកសំណើរបស់ពួកយើង»។
បាតុកម្មនេះធ្វើឡើង ១ ខែមុន ការបោះឆ្នោតជាតិរបស់ឥណ្ឌា ខណៈដែលលោកនាយករដ្ឋមន្ត្រី Narendra Modi កំពុងព្យាយាមឃោសនា ដើម្បីបន្តតំណែងរបស់ខ្លួនក្នុងអាណត្តិទី៣បន្តទៀត។ ដូច្នេះហើយ បើដើម្បីសំឡេងឆ្នោតលោក Narendra Modi ទំនងជាអាចពិចារណាក្នុងការសម្រេចបំណងរបស់ក្រុមកសិករ៕
