ប្រធានាធិបតីកូរ៉េខាងត្បូង Yoon Suk-yeol ឱនគោរពខួបនៃសោកនាដកម្មរត់ជាន់គ្នាក្នុងពិធីបុណ្យ ហាឡូវីន។ AFP
តុលាការកូរ៉េខាងត្បូង កាលពីថ្ងៃទី ១៤ ខែកុម្ភៈ ឆ្នាំ ២០២៤ បានកាត់ទោសអតីតមន្ត្រីប៉ូលិស ២ នាក់ ពីបទបំផ្លាញភ័ស្តុតាងទាក់ទងនឹងហេតុការណ៍ហ្វូងមនុស្សប្រមូលផ្ដុំគ្នាណែនណាន់តាន់តាប់ក្នុងពិធីបុណ្យហាឡូវីន កាលពីឆ្នាំ ២០២២ ដែលបានឆក់យកជីវិតមនុស្ស ១៥៩ នាក់ស្ថិតនៅក្នុងសង្កាត់អ៊ីថេវ៉ុន (Itaewon) ទីក្រុងសេអ៊ូល។
នេះគឺជាករណីដំបូងហើយដែលមន្ត្រីប៉ូលិសត្រូវបានកាត់ទោសពាក់ព័ន្ធនឹងហេតុការណ៍គ្រោះថ្នាក់នោះ។
នៅថ្ងៃទី ២៩ ខែតុលា ឆ្នាំ ២០២២ មនុស្សរាប់ម៉ឺននាក់ ភាគច្រើនក្នុងវ័យចន្លោះពី ២០ ទៅ ៣០ ឆ្នាំបានប្រមូលផ្តុំគ្នានៅក្នុងសង្កាត់អ៊ីថេវ៉ុនដែលជាតំបន់កម្សាន្ត នាពេលរាត្រីក្នុងឱកាសវិស្សមកាលក្រោយជំងឺរាតត្បាតកូវីដ ១៩ បានស្រាកស្រាន្តជាលើកដំបូង។ ផ្ទុយពីការរំពឹងទុកយប់នោះ បានប្រែក្លាយទៅជាសោកនាដកម្មមួយ ដោយសារតែហ្វូងមនុស្សយ៉ាងច្រើនបានប្រមូលផ្ដុំគ្នានៅក្នុងផ្លូវតូច ហើយមិនមានវិធានការគ្រប់គ្រងហ្វូងមនុស្សបានត្រឹមត្រូវ និងទាន់ពេលវេលាទើបបណ្ដាលឱ្យមនុស្សជិត ១៦០ នាក់ ត្រូវបានគេរត់ជាន់ស្លាប់បាត់បង់ជីវិត។
អតីតមន្ត្រីប៉ូលិសទាំង ២ រូប ត្រូវបានកាត់ទោសឱ្យជាប់ពន្ធនាគារពីបទណែនាំឱ្យលុបរបាយការណ៍ផ្ទៃក្នុងរបស់ប៉ូលិសចំនួន ៤ ដែលពាក់ព័ន្ធនឹងសោកនាដកម្មនោះ។ របាយការណ៍ទាំងនោះបានគូសបញ្ជាក់អំពីការព្រួយបារម្ភនៅមុនហេតុការណ៍បានកើតឡើង ដោយលើកឡើងអំពីសុវត្ថិភាព និងហានិភ័យនៃការកកកុញខ្លាំងនៅក្នុងតំបន់នោះ។
តុលាការក្រុងសេអ៊ូលប្រចាំតំបន់ខាងលិច បានកាត់ទោស លោកផាក ស៊ុងមិន (Park Sung-min) អតីតមន្ត្រីចារកម្មជាន់ខ្ពស់នៅទីភ្នាក់ងារប៉ូលិសក្រុងសេអ៊ូលឱ្យជាប់ពន្ធនាគាររយៈពេល ១,៥ ឆ្នាំ និងលោក គីម ជីនហូ (Kim Jin-ho) អតីតមន្ត្រីចារកម្មនៅស្នងការប៉ូលិសតំបន់យ៉ុងសាន (Yongsan) ឱ្យជាប់ពន្ធនាគាររយៈពេល ១ ឆ្នាំជាមួយនឹងការព្យួរទោសរយៈពេល ៣ ឆ្នាំ។
តុលាការបានលើកឡើងថា«ជនជាប់ចោទទាំង២រូបនេះ គួរតែបានជួយសហការក្នុងការស៊ើបអង្កេតដោយរក្សាទិន្នន័យដែលមានស្រាប់ប៉ុន្តែផ្ទុយទៅវិញ ពួកគេបានលុបនិងបំផ្លាញរបាយការណ៍ផ្ទៃក្នុងដែលបានសរសេរនៅមុនពេលហេតុការណ៍គ្រោះថ្នាក់កើតឡើងហើយបានបំផ្លាញភ័ស្តុតាងទាំងនោះចោល»។
តុលាការបានសង្កត់ធ្ងន់ថាការដាក់ទណ្ឌកម្មទៅលើពួកគេយ៉ាងធ្ងន់ធ្ងរនេះ គឺជារឿងចាំបាច់ ដោយសារតែលោកផាក និងលោក គីមបានព្យាយាមលាក់បាំងការទទួលខុសត្រូវរបស់ប៉ូលិសដែលធ្វើឱ្យវាពិបាកក្នុងការស្វែងរកការពិត។
អ្នកទាំង២គឺជាមន្ត្រីប៉ូលិសដំបូងគេដែលត្រូវបានកាត់ទោសពាក់ព័ន្ធនឹងករណីគ្រោះថ្នាក់ក្នុងសង្កាត់អ៊ីថេវ៉ុននេះ។
កាលពីខែមករាលោកគីម ក្វាងហូ (Kim Kwang-ho) ប្រធានទីភ្នាក់ងារប៉ូលិសក្រុងសេអ៊ូល ត្រូវបានចោទប្រកាន់ពីបទធ្វេសប្រហែសតាមវិជ្ជាជីវៈនៅយប់កើតហេតុ។គួរកត់សម្គាល់ថា ខណៈដែលមន្ត្រីប៉ូលិសថ្នាក់ស្រុកមួយចំនួនត្រូវបានកាត់ទោសពាក់ព័ន្ធនឹងហេតុការណ៍នេះ គ្មានសមាជិករដ្ឋាភិបាលជាន់ខ្ពស់ណាមួយ ដែលបានលាលែងពីតំណែងឬត្រូវបានចោទប្រកាន់នោះទេបើទោះបីជាមានការរិះគន់ពីបណ្ដាក្រុមគ្រួសារជនរងគ្រោះជុំវិញបញ្ហាគណនេយ្យភាពក៏ដោយ។
ការអភិវឌ្ឍប្រទេសយ៉ាងឆាប់រហ័សរបស់កូរ៉េខាងត្បូងពីប្រទេសដែលធ្លាប់តែមានសង្គ្រាមទៅជាប្រទេសដែលមានសេដ្ឋកិច្ចធំជាងគេទី៤ របស់អាស៊ី និងជាប្រទេសមានឥទ្ធិពលលើវប្បធម៌ពិភពលោកផងដែរនោះគឺជារឿងដ៏គួរឱ្យមានមោទនភាពសម្រាប់ជាតិបំផុត។
យ៉ាងណាក៏ដោយសោកនាដកម្មដែលអាចការពារបានជាមុន ប៉ុន្តែបានកើតឡើងដោយសារតែការធ្វេសប្រហែសដូចជាករណីរត់ជាន់គ្នានៅឆ្នាំ២០២២នេះ និងការលិចស្រឡាងសេវ៉ុល (Sewol) នៅឆ្នាំ២០១៤ ដែលបានឆក់យកជីវិតមនុស្ស ៣០៤ នាក់បានធ្វើឱ្យប៉ះពាល់ដល់ការជឿទុកចិត្តរបស់សាធារណជន ចំពោះអាជ្ញាធរកូរ៉េខាងត្បូង៕
