លោក នាយករដ្ឋមន្ត្រីជប៉ុន ហ្វូមីអូ គីស៊ីដា។ AFP
ប្រទេសជប៉ុន រហូតដល់ពេលនេះ បានក្លាយជាប្រទេសចុងក្រោយមួយទៀតនៅអាស៊ី ដើម្បីចេញទិដ្ឋាការដល់អ្នកធ្វើការងារពឹងផ្អែកឌីជីថល (digital nomads) ដែលជាផ្នែកមួយរំពឹងបង្កើនទេសចរណ៍អន្តរជាតិនិងម្ចាស់អាជីវកម្មអន្តរជាតិចូលទៅកាន់ប្រទេសដែលមានការអភិវឌ្ឍន៍សេដ្ឋកិច្ចសកលលោកលំដាប់លេខ៤ ប៉ុន្តែ អ្នកក្នុងវិស័យឌីជីថលយល់ថាមានការ«រឹតត្បិត»ខ្លាំងណាស់។
គម្រោងរបស់ប្រទេសជប៉ុនគ្រោងនឹងចាប់ផ្តើមនៅចុងខែមីនា ជាមួយនឹងទិដ្ឋាការដែលមានសុពលភាពរយៈពេលប្រាំមួយខែ។ យោងតាមកាសែត Japan Times បុគ្គលមកពី ៤៩ ប្រទេស និងដែនដីអាចដាក់ពាក្យបាន រួមទាំងមកពីប្រទេសសិង្ហបុរី សហរដ្ឋអាមេរិក និងអូស្ត្រាលី។
អ្នកដាក់ពាក្យត្រូវតែទទួលបានប្រាក់ចំណូលប្រចាំឆ្នាំអប្បបរមាចំនួន ១០ លានយ៉េន ឬជាង ៦,៦ម៉ឺនដុល្លារ។ពួកគេក៏ត្រូវតែមានការធានារ៉ាប់រងឯកជនផងដែរ។ បុគ្គលដែលធ្វើការដោយខ្លួនឯងមានសិទ្ធិដាក់ពាក្យស្នើសុំ ក៏ដូចជាមនុស្សដែលមានប្តីប្រពន្ធ និងកូន។
អ្នកកាន់ទិដ្ឋាការនឹងត្រូវបានអនុញ្ញាតឱ្យរស់នៅ និងធ្វើការពីចម្ងាយពីគ្រប់ទិសទីក្នុងប្រទេសជប៉ុន។ ទោះយ៉ាងណាក៏ដោយ ពួកគេមិនមានលក្ខណៈគ្រប់គ្រាន់ក្នុងការទទួលបានប័ណ្ណស្នាក់នៅ ដោយសារមានទិដ្ឋាការឌីជីថលនោះទេ។
ការពន្យារទិដ្ឋាការឌីជីថលភ្លាមៗនឹងមិនមានដោយស្វ័យប្រវត្តិនៅពេលផុតកំណត់នោះទេ ប៉ុន្តែអ្នកស្នើស្នើអាចស្នើសុំវាជាថ្មីសម្រាប់រយៈពេលប្រាំមួយខែបន្ទាប់ពីចាកចេញពីប្រទេសជប៉ុន។នេះបើយោងតាមគេហទំព័រទេសចរណ៍ និងបដិសណ្ឋារកិច្ច Travel Daily Media ។
ជប៉ុនបានចូលរួមក្នុងបញ្ជីប្រទេស និងដែនដីដែលកំពុងរីកចម្រើនឡើង ដែលផ្តល់នូវគម្រោងបែបនេះ។ កន្លែងផ្សេងទៀតដែលផ្តល់ទិដ្ឋាការឌីជីថលមានដូចជា អេស្តូនី ម៉ិកស៊ិក ព័រទុយហ្គាល់ និងតៃវ៉ាន់។
គំនិតផ្តួចផ្តើមរបស់ជប៉ុនគឺជាផ្នែកមួយនៃយុទ្ធសាស្ត្រទូលំទូលាយរបស់ប្រទេសក្នុងការទាក់ទាញជនបរទេសដែលធ្វើការងារពឹងអាស្រ័យឌីជីថល ឱ្យចូលទៅស្នាក់នៅកាន់តែច្រើន និងជំរុញសេដ្ឋកិច្ចទេសចរណ៍របស់ខ្លួន។
រដ្ឋាភិបាលជប៉ុនសង្ឃឹមថាអ្នកធ្វើការឌីជីថលនឹងជំរុញការបង្កើតថ្មីនិងនាំមកនូវថាមពលដល់កម្លាំងការងារដែលមានវ័យចំណាស់យ៉ាងឆាប់រហ័សរបស់ប្រទេសនេះ។
ទោះជាយ៉ាងណាក៏ដោយ សហគមន៍ធ្វើការងារឌីជីថលនិយាយថាលក្ខខណ្ឌនៃទិដ្ឋាការរបស់ប្រទេសជប៉ុន គឺមានការរឹតបន្តឹង។ នេះបើយោងតាមរបាយការណ៍ថ្ងៃទី ១៧ ខែកុម្ភៈដោយ ABC News របស់ប្រទេសអូស្ត្រាលី។
ពួកគេនិយាយថា ដែនកំណត់រយៈពេលប្រាំមួយខែគឺខ្លីពេកសម្រាប់អ្នកធ្វើដំណើររយៈពេលវែង ហើយតម្រូវការប្រាក់បៀវត្សរ៍ប្រចាំឆ្នាំអប្បបរមាគឺខ្ពស់ពេកសម្រាប់អ្នកដែលធ្វើការនៅក្នុងការចាប់ផ្តើមអាជីវកម្ម។
ទឹកដីផ្សេងទៀតភាគច្រើនផ្តល់ទិដ្ឋាការសម្រាប់រយៈពេលអប្បបរមាមួយឆ្នាំ។ ទិដ្ឋាការរយៈពេលប្រាំមួយខែរបស់ប្រទេសជប៉ុនគឺស្រដៀងគ្នាទៅនឹងប្រទេសអ៊ីស្លង់ដែលមានសុពលភាព ១៨០ ថ្ងៃ។
នៅក្នុងប្រទេសអេស្បាញ ដែលជាគោលដៅកំពូលមួយសម្រាប់ក្រុមអ្នកធ្វើការឌីជីថល ដោយសាររបាំងនៃ ការចូលទៅកាន់ប្រទេសនេះមានតិច អ្នកដាក់ពាក្យសុំត្រូវមានប្រាក់ចំណូលប្រចាំខែ ២៦០០ អឺរ៉ូ ក្នុងមួយខែ។ នេះបើយោងតាមរបាយការណ៍របស់ BBC ។ ទិដ្ឋាការរបស់ប្រទេសអេស្ប៉ាញមានសុពលភាពក្នុងរយៈពេលអប្បបរមាមួយឆ្នាំ និងរហូតដល់ប្រាំឆ្នាំជាមួយនឹងលទ្ធភាពនៃការបន្ត៕
