កសិករឥណ្ឌា បន្តការតវ៉ាទាមទារឱ្យរដ្ឋាភិបាលដាក់កម្រិតតម្លៃកសិផលឱ្យបានប្រសើរជាងបច្ចុប្បន្ន។ AFP
កសិករនៅភាគខាងជើងនៃប្រទេសឥណ្ឌា បច្ចុប្បន្នកំពុងតែតវ៉ារដ្ឋាភិបាលឱ្យបង្កើនតម្លៃកសិផល ដែលពួកគេផលិតបាន។ មិនត្រឹមតែកសិករប៉ុណ្ណោះ ក្រុមសិស្សនិស្សិត ដែលមានឪពុកម្ដាយជាកសិករក៏បានចូលរួមក្នុងការតវ៉ានេះផងដែរ។ យោងការចេញផ្សាយរបស់រយទ័រ។
សារព័ត៌មានបានផ្សាយថា យុវជន Simranjeet Singh Mathada ជានិស្សិតម្នាក់ក្នុងចំណោមនិស្សិតរាប់ពាន់នាក់ដែលបានក្រោកតាំងពីម៉ោង៣ទៀបភ្លឺក្នុងរយៈពេលប្រមាណជិត ២ សប្ដាហ៍មកហើយ ដើម្បីជួយការងារក្នុងសហគមន៍មុននឹងធ្វើដំណើរចេញទៅកន្លែងតវ៉ាដែលនៅមិនឆ្ងាយប៉ុន្មានពីទីក្រុងញូវដែលី។
និស្សិតរូបនេះបានឱ្យដឹងថា៖«ការតវ៉ានាពេលនេះគឺដើម្បីការពារសេដ្ឋកិច្ចរបស់ប្រជាកសិករដែលភាគច្រើនមកពីរដ្ឋ Punjab ហើយពួកយើងប្ដេជ្ញានឹងនាំយកកំណែទម្រង់វិស័យកសិកម្មដែលជាផ្នែកមួយដ៏សំខាន់ក្នុងការលើកស្ទួយជីវភាពរបស់ពួកគេ»។
និយាយជារួមការតវ៉ានេះគឺដើម្បីស្វែងរកតម្លៃសម្រាប់ទីផ្សារកសិផលដែលថេរមួយដើម្បីឱ្យឪពុកម្ដាយរបស់ Simranjeet Singh Mathada ផ្ទាល់ព្រមទាំងកសិកររាប់លាននាក់ទៀតអាចលក់បន្លែផ្លែឈើរបស់ខ្លួនដោយគ្មានការព្រួយបារម្ភ។
ប៉ុន្តែយ៉ាងណាក្ដីការតវ៉ារវាងក្រុមសហជីពកសិករនិងរដ្ឋាភិបាលនាពេលកន្លងទៅមានពេលខ្លះក៏បានឈានដល់ការប្រើហិង្សាផងដែរ។
ជាច្រើនលើកច្រើនសាដែលកសិករព្យាយាមរុញទម្លុះរនាំងដែលឃាំងដោយរដ្ឋាភិបាលក្នុងគោលបំណងបង្អាក់ក្បូនបាតុកម្មចូលទៅកាន់រាជធានីញូវដែលី។ជាលទ្ធផលក្រុមកសិករតែងរងរបួសពីការបង្ក្រាបរបស់ប៉ូលិសនិងខ្លះទៀតរងរបួសដោយមុតបន្លាលួសដែលរាយបង្ខាំងផ្លូវជាដើម។
និស្សិតដដែលរូបនេះបានបន្តបញ្ជាក់ទៀតថានៅរាល់ការតវ៉ាគឺពួកគេតែងតែត្រូវប្រឈមមុខនឹងប៉ូលិសជានិច្ច។មានពេលខ្លះក្រុមនិស្សិតនិងក្រុមកសិករបាននាំគ្នាពាក់វែនតាហែលទឹកដើម្បីទម្លុះចូលក្នុងឧស្ម័នបង្ហូរទឹកភ្នែកដែលបាញ់ដោយមន្ត្រីអាជ្ញាធរទៀតផង។
បើទោះបីជាជួបនឹងឧបសគ្គយ៉ាងណាក្ដី Simranjeet Singh Mathada និងនិស្សិតផ្សេងទៀតបានប្ដេជ្ញាបន្តការតវ៉ាបែបនេះរហូតទទួលបានដំណោះស្រាយដែលស័ក្តិសមណាមួយ។សម្រាប់ក្រុមនិស្សិតមុខរបរកសិកម្មនេះហើយដែលបានជួយទំនុកបម្រុងពួកគេឱ្យទទួលបានការអប់រំមួយសមប្រកបក្នុងពេលបច្ចុប្បន្នហើយប្រសិនបើទីផ្សារកសិផលឪពុកម្ដាយរបស់ពួកគេជួបបញ្ហាវាក៏នឹងប៉ះពាល់ដល់ការសិក្សារបស់ពួកគេផងដែរ។
បាតុកម្មដែលកំពុងរីកសាយភាយធំឡើងៗនិងការបង្ក្រាបដែលឈានដល់ហិង្សាពីសំណាក់មន្ត្រីអាជ្ញាធរនាពេលនេះក៏ត្រូវបានសាធារណជនរិះគន់យ៉ាងចាស់ដៃផងដែរ។ដោយការឆ្លើយតបបែបនេះគឺជាការសបញ្ជាក់ឱ្យឃើញកាន់តែច្បាស់ពីការអនុវត្តលទ្ធិប្រជាធិបតេយ្យនៅក្នុងប្រទេសឥណ្ឌាទាំងមូល។
មិនត្រឹមតែប៉ុណ្ណោះវាក៏ទំនងនឹងក្លាយជាហេតុផលសំខាន់មួយក្នុងការសម្រេចចិត្តសម្រាប់ការបោះឆ្នោតជ្រើសរើសប្រធានាធិបតីអាណត្តថ្មីនាពេលឆាប់ៗខាងមុខ។
ការតវ៉ានេះកើតឡើងប៉ុន្មានខែនៅមុនការបោះឆ្នោតជ្រើសរើសប្រធានាធិបតីខណៈដែលគណបក្សរបស់លោកនាយករដ្ឋមន្ត្រី Narendra Modiកំពុងស្វែងរកសំឡេងសម្រាប់អាណត្តិទី៣របស់ខ្លួន។
កាលពីសប្តាហ៍មុន លោក Modi ក៏បាននិយាយដែរថារដ្ឋាភិបាលរបស់លោកកំពុងស្វែងរកដំណោះស្រាយជូនកសិករឱ្យប្រសើរជាងមុន។ប៉ុន្តែទំនុកចិត្តរបស់ប្រជាជនដែលជាម្ចាស់សំឡេងឆ្នោតហាក់ដូចជាធ្លាក់ចុះបន្តិចហើយក្រោយពេលដែលលោកModiមិនអាចរក្សាការសន្យារបស់ខ្លួនក្នុងការកែទម្រង់វិស័យកសិកម្មនេះតាំងតែពីឆ្នាំ២០១៤មកម្ល៉េះ៕
