ប្រធានាធិបតី យូន ស៊ុកយ៉ុល (Yoon Suk Yeol) ដឹកនាំប្រជុំគណៈរដ្ឋមន្ត្រីរបស់លោក។ AFP
រដ្ឋាភិបាលកូរ៉េខាងត្បូង កាលពីថ្ងៃចន្ទ ទី ២៦ ខែកុម្ភៈ បានណែនាំឱ្យវេជ្ជបណ្ឌិតទាំងអស់ត្រឡប់ទៅធ្វើការវិញនៅចុងខែកុម្ភៈនេះ បើមិនដូច្នោះទេ ពួកគេនឹងត្រូវប្រឈមមុខនឹងការពិន័យចំពោះសកម្មភាពចេញតវ៉ារយៈពេល ១ សប្តាហ៍មកនេះ។ ការធ្វើកូដកម្មនេះបានបណ្តាលឱ្យមានការប៉ះពាល់ដល់សេវាថែទាំអ្នកជំងឺនៅតាមមន្ទីរពេទ្យធំៗជាច្រើន។
វេជ្ជបណ្ឌិតវ័យក្មេងរហូតដល់ទៅជាង ១ ម៉ឺននាក់ ស្មើនឹង ៨០,៥% នៃវេជ្ជបណ្ឌិតសិក្ខាកាមទាំងអស់បានធ្វើកូដកម្មដើម្បីប្រឆាំងនឹងគោលនយោបាយរបស់រដ្ឋាភិបាលដែលស្នើចង់បង្កើនចំនួននិស្សិតពេទ្យនៅសាលាវេជ្ជសាស្ត្រ។ គោនយោបាយនេះមានគោលបំណងដោះស្រាយបញ្ហាកង្វះវេជ្ជបណ្ឌិត ដោយសារតែគេបានព្យាករឃើញថា កូរ៉េខាងត្បូងនឹងក្លាយទៅជាប្រទេសមានប្រជាជនវ័យចំណាស់ច្រើននៅលើពិភពលោក។
ការចេញតវ៉ារបស់វេជ្ជបណ្ឌិតនោះ បានធ្វើឱ្យមន្ទីរពេទ្យជាច្រើនត្រូវបង្ខំចិត្តបដិសេធមិនទទួលអ្នកជំងឺបន្ថែមនិងខ្លះត្រូវពន្យារពេលការវះកាត់ព្យាបាលទៀតផង។ រដ្ឋមន្ត្រីក្រសួងសុវត្ថិភាពលោក លី សាងមិន (Lee Sang-min) បានសម្តែងការព្រួយបារម្ភអំពីភាពចលាចលដែលកំពុងកើតឡើងនៅក្នុងមន្ទីរពេទ្យ និងស្ថានភាពសេវាសង្គ្រោះបន្ទាន់កំពុងជួបបញ្ហាប្រឈមខ្លាំង។
លោកបាននិយាយថា៖«ប្រសិនបើអ្នកត្រឡប់មកមន្ទីរពេទ្យរបស់អ្នកវិញនៅថ្ងៃទី២៩ខែកុម្ភៈ នោះអ្នកនឹងមិនចាំបាច់ទទួលខុសត្រូវចំពោះព្រឹត្តិការណ៍ដែលបានកើតឡើងនោះទេ»។
លោកបានបន្ថែមថា៖ «យើងលើកទឹកចិត្តអ្នកឱ្យឈរក្បែរអ្នកជំងឺ ព្រោះសំឡេងរបស់អ្នកនឹងមានទម្ងន់ខ្លាំងបំផុតនៅពេលអ្នកយល់ព្រមនៅព្យាបាលអ្នកជំងឺ»។
គិតត្រឹមថ្ងៃចន្ទ គ្រូពេទ្យសិក្ខាកាមចំនួន ៩០០៦នាក់បានអវត្តមានពីកន្លែងការងាររបស់ពួកគេ។រដ្ឋាភិបាលកូរ៉េខាងត្បូងបានព្រមានថា គ្រូពេទ្យដែលបដិសេធមិនចូលធ្វើការអាចប្រឈមមុខនឹងផ្លូវច្បាប់ដូចជាការកាត់ទោស ការចាប់ខ្លួននិងការបាត់បង់អាជ្ញាប័ណ្ណពេទ្យផងដែរ។
វេជ្ជបណ្ឌិតសិក្ខាកាម ដែលបានចេញធ្វើកូដកម្មទាំងនោះបានអះអាងថា រដ្ឋាភិបាលគួរតែផ្ដោតទៅលើការដោះស្រាយបញ្ហាប្រាក់ខែ និងលក្ខខណ្ឌការងារមុននឹងផ្ដោតទៅលើការបង្កើនចំនួនគ្រូពេទ្យ។
ដោយឡែកអនុរដ្ឋមន្ត្រីក្រសួងសុខាភិបាលលោក ផាក មិនស៊ូ (Park Min-soo) បាននិយាយថា អ្នកដែលមិនបានត្រឡប់មកវិញត្រឹមថ្ងៃទី១ ខែមីនា នឹងទទួលរងពិន័យព្យួរអាជ្ញាប័ណ្ណពេទ្យរបស់ពួកគេយ៉ាងហោចណាស់ ៣ខែ រួមនឹងផលវិបាកផ្នែកច្បាប់ផ្សេងទៀត។
វេជ្ជបណ្ឌិតជាន់ខ្ពស់ និងពេទ្យឯកជនមិនបានចូលរួមក្នុងការដើរបាតុកម្មនោះទេ ប៉ុន្តែក៏បានប្រមូលផ្តុំគ្នាដើម្បីជំរុញឱ្យរដ្ឋាភិបាលលុបចោលផែនការរបស់ខ្លួនក្នុងការបង្កើនកូតាសាលាវេជ្ជសាស្ត្រផងដែរ។ លោកប្រធានាធិបតី យូន ស៊ុកយ៉ុល (Yoon Suk Yeol) គឺជាអ្នកដែលបានដឹកនាំគំនិតផ្តួចផ្តើមនេះ និងបានទទួលការគាំទ្រច្រើនពីប្រជាជនកូរ៉េខាងត្បូងទៀតផង។
យោងតាមការស្ទង់មតិរបស់ Gallup Korea កាលពីពេលថ្មីៗនេះបានរកឃើញថាប្រហែលជា៧៦% នៃអ្នកឆ្លើយតប បានគាំទ្រគោលនយោបាយនេះ។ ដោយឡែក ការស្ទង់មតិមួយផ្សេងទៀតដោយក្រុមហ៊ុន Realmeterចេញផ្សាយកាលពីថ្ងៃចន្ទបានបង្ហាញថា សំឡេងគាំទ្រលោកប្រធានាធិបតី យូន បានកើនឡើងដល់ ៤១,៩% ដែលជាតួលេខមួយខ្ពស់បំផុតមិនធ្លាប់មានក្នុងរយៈពេល ៨ខែ មកនេះ។
គោលនយោបាយបង្កើនចំនួននិស្សិតពេទ្យថ្មី គឺជាផ្នែកមួយនៃកិច្ចខិតខំប្រឹងប្រែងដើម្បីបង្កើនគុណភាពសេវាវេជ្ជសាស្ត្រ។ លើសពីនេះ រដ្ឋាភិបាលគ្រោងនឹងផ្តល់ការលើកទឹកចិត្តដល់វេជ្ជបណ្ឌិតឱ្យចូលធ្វើការក្នុងវិស័យសំខាន់ៗដូចជា ពេទ្យកុមារ និងការវះកាត់ទូទៅ ក៏ដូចជានៅក្នុងតំបន់ដែលប្រឈមនឹងការខ្វះខាតគ្រូពេទ្យធ្ងន់ធ្ងរជាដើម។
វេជ្ជបណ្ឌិតខ្លះជឿថាផែនការរបស់រដ្ឋាភិបាលត្រូវបានរៀបចំឡើងដើម្បីប្រមូលសន្លឹកឆ្នោតគាំទ្របន្ថែមទៀតនៅក្នុងរដូវកាលបោះឆ្នោតសកលនៅខែមេសាខាងមុខនេះ។ សាស្ត្រាចារ្យវេជ្ជសាស្ត្រមកពីសាកលវិទ្យាល័យជាតិសេអ៊ូល ដែលជាសាលាវេជ្ជសាស្ត្រឈានមុខគេបានជំរុញឱ្យអាជ្ញាធរពន្យារពេលពិភាក្សាអំពីផែនការនេះរហូតដល់ក្រោយការបោះឆ្នោត៕
