លោក Richard Marles (ឆ្វេង) និងលោក Prabowo Subianto ក្នុងជំនួបទ្វេភាគី។ AFP
ប្រទេសឥណ្ឌូនេស៊ី និងអូស្ត្រាលី សង្ឃឹមថា នឹងចុះហត្ថលេខាលើកិច្ចព្រមព្រៀងកិច្ចសហប្រតិបត្តិការលើវិស័យការពារជាតិ «ដ៏សំខាន់បំផុត» ក្នុងរយៈពេលប៉ុន្មានខែខាងមុខនេះ ដែលជាផ្នែកមួយទប់ទល់ ឥទ្ធិពលយោធាចិន ដែលកើតឡើងនៅក្នុងតំបន់។ យោងសេចក្តីរាយការណ៍របស់សារព័ត៌មាន ក្នុងស្រុកនៃប្រទេសឥណ្ឌូនេស៊ី។
សារព័ត៌មាន The Jakarta Post ដែលជាសមាជិករបស់បណ្តាញសារព័ត៌មានអាស៊ី (ANN) បានរាយការណ៍ថា រដ្ឋមន្ត្រីការពារជាតិអូស្ត្រាលី លោក Richard Marles បានជួបពិភាក្សាជាមួយប្រធានាធិបតីជាប់ឆ្នោតរបស់ឥណ្ឌូនេស៊ី លោក Prabowo Subianto ដែលបច្ចុប្បន្នជារដ្ឋមន្ត្រីការពារជាតិកាលពីថ្ងៃសុក្រកន្លងទៅ ដោយរដ្ឋមន្ត្រីអូស្ត្រាលី លើកឡើងថា៖«អូស្ត្រាលី និងឥណ្ឌូនេស៊ីមានជោគវាសនារួម និងសន្តិសុខរួមគ្នា ហើយនោះគឺជាមូលដ្ឋានដែលយើងកំពុងឆ្ពោះទៅមុខ [រួមគ្នា]»។
តាមសេចក្តីរាយការណ៍នោះ រដ្ឋមន្ត្រីការពារជាតិអូស្ត្រាលី បានទៅទស្សនកិច្ចប្រទេសឥណ្ឌូនេស៊ី ២ លើកក្នុងរយៈពេលតិចជាង ១ ឆ្នាំ ដោយបានគូសបញ្ជាក់ពីចំណាប់អារម្មណ៍ដែលកំពុងកើនឡើងរបស់ប្រទេសរបស់គាត់ក្នុងការជំរុញកិច្ចសហប្រតិបត្តិការជាមួយប្រទេសជិតខាងភាគខាងជើង។
នៅក្នុងសេចក្តីថ្លែងការណ៍រួមមួយ រដ្ឋមន្ត្រីការពារជាតិឥណ្ឌូនេស៊ី លោក Prabowo ដែលទើបជាប់ឆ្នោតក្លាយជាប្រធានាធិបតីបន្ទាប់របស់ប្រទេសអាស៊ីអាគេ្នយ៍ដ៏ធំបំផុតនេះ បានសាទរចំពោះទំនាក់ទំនងរវាងប្រទេសទាំង ២ ដែលលោកបាននិយាយថា៖ «មានវាសនាជាអ្នកជិតខាងដ៏ល្អ»។
ទីភ្នាក់ងារព័ត៌មានរដ្ឋឥណ្ឌូនេស៊ី Antara បានដកស្រង់សេចក្តីថ្លែងការណ៍ ដូចសរសេរថា៖«យើងប្តេជ្ញារក្សា និងពង្រឹងទំនាក់ទំនងនេះ។ ដូច្នេះ ខ្ញុំមិនគិតថានឹងមានការភ្ញាក់ផ្អើលនោះទេ ប៉ុន្តែយើងមានបំណងបណ្តុះទំនាក់ទំនងល្អនេះក្នុងវិស័យជាច្រើនដូចជាវិស័យអប់រំ សេដ្ឋកិច្ច វប្បធម៌ និងយោធា»។
រដ្ឋមន្ត្រីទាំង ២ មិនបានផ្តល់ព័ត៌មានលម្អិតអំពីកិច្ចព្រមព្រៀងនេះទេ ប៉ុន្តែលោក Prabowo បាននិយាយថា លោករំពឹងថា វានឹងត្រូវបានចុះហត្ថលេខាក្នុងរយៈពេល២ ឬ ៣ ខែខាងមុខ។
លោកបានបន្តថា៖«យើងមានគម្រោងចុះហត្ថលេខាលើកិច្ចព្រមព្រៀងកិច្ចសហប្រតិបត្តិការលើវិស័យការពារជាតិជាមួយប្រទេសអូស្ត្រាលីក្នុងពេលអនាគតដ៏ខ្លីខាងមុខនេះ»។
តាមសេចក្ដីរាយការណ៍ ឥណ្ឌូនេស៊ី បានរក្សាការឃ្លាំមើលយ៉ាងដិតដល់លើគ្រប់ចលនារបស់ប្រទេសអូស្ត្រាលីក្នុងវិស័យការពារជាតិ និងសន្តិសុខ ចាប់តាំងពីទីក្រុងហ្សាការតាត្រូវបានធ្វើឱ្យមួម៉ៅនៅក្នុងការប្រកាសឆ្នាំ ២០២១ នៃកិច្ចព្រមព្រៀងការពារត្រីភាគីដែលគេស្គាល់ថា AUKUS ពាក់ព័ន្ធនឹងប្រទេសអូស្ត្រាលី ចក្រភពអង់គ្លេស និងសហរដ្ឋអាមេរិក ដោយផាត់ចោលឥណ្ឌូនេស៊ី ដែលអះអាងថា ខ្លួនត្រូវបានគេជូនដំណឹងតែប៉ុន្មានថ្ងៃប៉ុណ្ណោះ មុនកិច្ចព្រមព្រៀង AUKUS ត្រូវបានចុះហត្ថលេខា ដែលនាំឱ្យចិនមិនពេញចិត្តទាល់តែសោះ៕
