![](https://pppkhmer.sgp1.digitaloceanspaces.com/image/main/20242/29_2_2024_29_2_2024_000_34ke687.jpg)
លោក គីម ជុងអ៊ុន ចូលរួមពិធីបញ្ចុះបឋមសិក្សាសាងសង់រោងចក្រនៅថ្ងៃទី២៨ខែកុម្ភៈ។ AFP
ប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃព្រហស្បតិ៍ទី២៩ ខែកុម្ភៈ ឆ្នាំ២០២៤ បាននិយាយថា មេដឹក នាំកូរ៉េខាងជើង លោក គីម ជុងអ៊ុន (Kim Jong Un) បានអំពាវនាវឱ្យមាន «បដិវត្តន៍ឧស្សាហកម្ម» នៅក្នុងតំបន់ជនបទដោយការសាងសង់រោងចក្រនៅទូទាំងប្រទេស។
ចូលរួមក្នុងពិធីបើកការដ្ឋានសាងសង់រោងចក្រនៅស្រុក Songchon ភាគខាងកើតនៃរដ្ឋធានីព្យុងយ៉ាងលោក គីម បានសន្យាថា នឹងជំរុញបន្ថែម «គោលនយោបាយអភិវឌ្ឍន៍តំបន់ ២០×១០» របស់ខ្លួន ដោយព្យាយាមក្នុងការបើករោងចក្រទំនើបៗ នៅក្នុងស្រុកដាច់ស្រយាល យ៉ាងហោចណាស់ ២០ ជារៀងរាល់ឆ្នាំសម្រាប់រយៈពេល ១០ ឆ្នាំ ខាងមុខ។
ថ្លែងក្នុងពិធីបើកការរដ្ឋានដដែលនេះលោក គីម បានគូសបញ្ជាក់ថា៖ «ការបង្កើតរោងចក្រឧស្សាហកម្មក្នុងតំបន់ដែលបំពាក់ដោយឧបករណ៍ទំនើបៗនិងខ្សែចង្វាក់ផលិតកម្មនៅគ្រប់ទីក្រុងនិងស្រុកនៃប្រទេសក្នុងរយៈពេល១០ឆ្នាំខាងមុខគឺពិតជាបដិវត្តន៍ដ៏អស្ចារ្យមួយដែលមានសារៈសំខាន់ដ៏ធំធេង»។
លោកគីមបានប្រគល់ទង់សញ្ញាមួយនៅក្នុងពិធីនេះទៅឱ្យអង្គភាពយោធាដែលទើបត្រូវបានបង្កើតឡើងដើម្បីអនុវត្តគំនិតផ្តួចផ្តើមនេះដោយនិយាយថាពួកគេនឹងបង្កើតយុគសម័យនៃការផ្លាស់ប្តូរដ៏អស្ចារ្យសម្រាប់តំបន់កំពុងអភិវឌ្ឍន៍ខ្លាំង។
លោក គីម បាននិងកំពុងជំរុញឱ្យមានទំនើបកម្មវិស័យកសិកម្មនិងសហគមន៍ជនបទខណៈដែលសេដ្ឋកិច្ចរបស់ប្រទេសកូរ៉េខាងជើងពឹងផ្អែកខ្លាំងលើវិស័យកសិកម្មដែលបានជួបប្រទះនឹងការខ្វះខាតស្បៀងអាហារជាយូរមកហើយ បន្ទាប់ពីមានទណ្ឌកម្មលើកម្មវិធីសព្វាវុធរបស់ខ្លួននិងផលប៉ះពាល់តាមរដូវកាលពីគ្រោះធម្មជាតិ។
ដោយឡែកបើតាមប្រជាជនដែលបានគេចខ្លួនរត់ចេញពីកូរ៉េខាងជើងបានរាយការណ៍ថា វិសមភាពសង្គមប្រទេសរបស់ខ្លួនមានទំហំធំណាស់រវាងឥស្សរជនភាគច្រើននៃទីក្រុងព្យុងយ៉ាងក៏ដូចជាទីក្រុងធំៗផ្សេងទៀតប្រៀបធៀបនឹងប្រជាជនធ្វើកសិកម្មនៅតំបន់ជនបទ។
ចំណែកឯក្រសួងបង្រួបបង្រួមរបស់ប្រទេសកូរ៉េខាងត្បូងវិញបាននិយាយកាលពីខែមុនថាគម្លាតសេដ្ឋកិច្ចរវាងពួកគេហាក់ដូចជាបានរីកបន្ថែមទៀតហើយបើគិតទៅលើអ្វីៗគ្រប់យ៉ាងរាប់ចាប់តាំងពីអាហារូបត្ថម្ភ លំនៅឋានរហូតដល់ការអប់រំនិងការទទួលបានការថែទាំសុខភាព៕