ក្រសួង​ស្ថិតិ​កូរ៉េខាងត្បូង​ បាន​ផ្សព្វផ្សាយ​​​​នៅ​ថ្ងៃទី ២៨ ខែកុម្ភៈ ឆ្នាំ ២០២៤​ ឱ្យ​ដឹង​ថា អត្រា​មានកូន​នៅ​ប្រទេស​កូរ៉េខាងត្បូង ​បាន​ធ្លាក់ចុះ​ទាប​បំផុត​នៅលើ​ពិភពលោក​ហើយ​បាន​បន្ត​ធ្លាក់ចុះ​បន្ថែមទៀត​ក្នុង​ឆ្នាំ ២០២៣ ដោយសារតែ​ស្ត្រី​មានការ​ព្រួយបារម្ភ​អំពី​ស្ថិរភាព​អាជីព​ការងារ ​និង​ការចំណាយ​លើ​ការចិញ្ចឹម​កូន ​ដូច្នេះ​ពួកគេ​ភាគច្រើន​ កំពុង​ជ្រើសរើស​មធ្យោបាយ​ពន្យារពេល​យក​កូន ​ឬ​មិន​យក​កូន​តែម្ដង។


​ការចេញផ្សាយ​របស់​ក្រសួង​ស្ថិតិ​កូរ៉េខាងត្បូង​​ឱ្យ​ដឹង​ថា អត្រា​មានកូន​របស់​ស្ត្រី​កូរ៉េខាងត្បូង​ម្នាក់មាន​ជា​មធ្យម ០,៧២ នាក់ ដែល​តួលេខ​នេះ​ទាប​ជាង​ឆ្នាំ ២០២២ ដែលមាន ០,៧៨ នាក់។​ តួលេខ​នេះ​ផងដែរ ទាប​ជាង​អត្រា​មានកូន​ជាទូទៅ​របស់​ស្ត្រី​ម្នាក់​ជា​មធ្យម​មាន​ ២,១ នាក់​ ដើម្បី​អាច​រក្សា​ស្ថិរភាព​ចំនួន​ប្រជាជន​បាន​ថេរ ហើយ​ថែមទាំង​ទាប​ជាង​អត្រា​នៅ​ឆ្នាំ ២០១៥ ដែលមាន ១,២៤ នាក់។


ចាប់តាំងពី​ឆ្នាំ ២០១៨ មក​ប្រទេស​កូរ៉េខាងត្បូង​ បាន​ក្លាយជា​សមាជិក​អង្គការ​ OECD តែ​មួយ​គត់​ដែលមាន​អត្រា​មានកូន​ក្រោម ១ នាក់​ បើទោះបីជា​រដ្ឋាភិបាល​កូរ៉េខាងត្បូង​បាន​វិនិយោគ​​យ៉ាងច្រើន​ទៅលើ​ការលើកទឹកចិត្ត​ប្រជាជន​ឱ្យ​យក​កូន ដើម្បីឱ្យ​មានការ​ផ្លាស់ប្តូ​រ​និន្នាការ​នេះ​ក៏ដោយ។គួរ​បញ្ជាក់ថា ចំនួន​ប្រជាជន​របស់​កូរ៉េខាងត្បូង​បាន​បន្ត​ធ្លាក់ចុះ​ជា​លើក​ទី​បួន​ជាប់​គ្នា​ចាប់តាំងពី​ឆ្នាំ ២០២០ រហូតដល់​ឆ្នាំ ២០២៣។


កូរ៉េខាងត្បូង​ជា​ប្រទេស​ដែលមាន​គម្លាត​ប្រាក់ខែ​ខ្ពស់បំផុត​ក្នុងចំណោម​ប្រទេស​នៅក្នុង​អង្គការ​ OECD ដោយ​ស្ត្រី​រកបាន​ប្រហែល ២/៣ នៃ​ចំណូល​ដែល​បុរស​រកបាន។


យោងតាម​លោក​ជុង ចែ​ហ៊ូ​ន (Jung Jae-hoon) សាស្ត្រាចារ្យ​នៅ​សាកលវិទ្យាល័យ​ស្ត្រី​សេ​អ៊ូ​ល (Seoul Women's University) បាន​លើកឡើងថា ​ស្ត្រី​តែងតែ​តស៊ូ​ នឹង​បញ្ហា​ប្រឈម​នៅក្នុង​អាជីព​ការងារ​របស់​ពួកគេ​ដោយ សារតែ​ពួកគេ​មាន​ទំនួល​ខុស​ត្រូវជា​ចម្បង​ទៅលើ​ការថែទាំកូនៗហើយជារឿយៗត្រូវការ​សម្រាក​ពី​ការងារ។


លោកស្រី ក្វាក តេ​ហ៊ី (Gwak Tae-hee) អាយុ ៣៤ ឆ្នាំ ​ជា​អ្នកគ្រប់គ្រង​ជាន់​ទាប​នៅ​ក្រុមហ៊ុន​ទឹកដោះគោ​កូរ៉េ​ដែល​លោកស្រី​បាន​រៀបការ​បី​ឆ្នាំ​មកហើយ។ លោកស្រី​បាន​និយាយថា៖«ខ្ញុំ​ចង់​មានកូន​ ប៉ុន្តែ ខ្ញុំ​ដូចជា​នឹងត្រូវ​ទទួលបាន​ការដំឡើង​តំណែង ដូច្នេះ​ខ្ញុំ​មិន​ចង់យក​កូន​នោះទេ»។

លោកស្រី ក្វាក បាន​បន្ថែមថា "នៅក្នុង​ក្រុមហ៊ុន​កូរ៉េ ការធ្វើការ​ត្រឹមតែ ២ ទៅ ៣ ថ្ងៃ​ក្នុង ១​ សប្ដាហ៍ នឹង​មិនអាច​នាំឱ្យមាន​ការរីកចម្រើន​ឡើយ"។ វិបត្តិ​ប្រជាសាស្ត្រ​របស់​ប្រទេស​កូរ៉េខាងត្បូង​គឺជា​ហានិភ័យ​ចម្បង​ចំពោះ​កំណើនសេដ្ឋកិច្ច​និង​សុខុមាលភាព​សង្គម​ទាំងមូល។

កូរ៉េខាងត្បូង​ បាន​ព្យាករណ៍​ថា អត្រាកំណើត​នឹងមាន​ការថយចុះ​បន្ថែមទៀត ពោលគឺ​នឹង​ធ្លាក់​ដល់ ០,៦៨ ក្នុង​ឆ្នាំ ២០២៤។

ទីក្រុង​សេ​អ៊ូ​ល​ដែល​កំពុង​ប្រឈម​នឹង​បញ្ហា​តម្លៃ​ផ្ទះ​កើនឡើង​ខ្ពស់​មាន​អត្រាកំណើត​ទាប​បំផុត​ត្រឹមតែ ០,៥៥ នាក់​ក្នុង​ឆ្នាំ ២០២៣។ នៅមុន​ការបោះឆ្នោត​ក្នុង​ខែមេសា​ ខាងមុខនេះ ​គណបក្សនយោបាយសំខាន់ៗបាន​សន្យា​ផ្តល់​លំនៅដ្ឋាន​សាធារណៈ​ និង​ប្រាក់កម្ចី​កាន់តែ​ងាយស្រួល ​ដើម្បី​ប្រយុទ្ធ​ប្រឆាំងនឹង​ការថយចុះ​អត្រា​មានកូន។

នៅ​ប្រទេស​កូរ៉េខាងត្បូង ​អាពាហ៍ពិពាហ៍​ ត្រូវបាន​ចាត់ទុកថា​ ចាំបាច់​មុនពេល​ចាប់ផ្តើម​គ្រួសារ​ប៉ុន្តែ​អត្រា​អាពាហ៍ពិពាហ៍​ក៏មាន​ការថយចុះ​ដូចគ្នា។ មន្ត្រី​មួយរូប​មកពី​ក្រសួង​ស្ថិតិ​បាន​អះអាងថា គូ​ស្វាមីភរិយា​មួយចំនួន​ជ្រើសរើស​មិន​ចង់​រៀបការ​នោះទេ។ ឥឡូវនេះ ក្រសួង​កំពុង​ផ្តោតលើ​ការសិក្សា​អំពី​មូល​ហេតុដែល​គូ​ស្វាមីភរិយា​ដែល​រៀបការ​ហើយ ប៉ុន្តែ​សម្រេចចិត្ត​មិនបង្កើត​កូន។

គណបក្សនយោបាយ​ភាគច្រើន​កំពុង​ផ្ដោតលើ​បញ្ហា​របស់​ប្រជាជន​ដែល​កំពុង​ជួបប្រទះ ដោយ​ប្រកាស​ពី​ការព្រួយបារម្ភ​របស់​ពួកគេរៀងៗខ្លួន។ បើទោះបីជា​បាន​ចំណាយ​លើសពី ២៧០ ពាន់​លាន​ដុល្លារ ​ទៅលើ​គំនិត​ផ្តួចផ្តើម​កម្មវិធី​មួយចំនួន​ដូចជា​ការឧបត្ថម្ភ​ធន​លើ​ការថែទាំ​កុមារ​តាំងពី​ឆ្នាំ២០០៦ ក៏ដោយ​អត្រា​មានកូន​នៅតែ​ធ្លាក់ចុះ​ទាប​ជា​បន្តបន្ទាប់។

មិនមែន​មានតែ​ប្រទេស​កូរ៉េខាងត្បូង​នោះទេ​ ដែល​ជួប​បញ្ហា​អត្រាកំណើត​ធ្លាក់ចុះ និង​វិបត្តិ​ប្រជាជនមាន​វ័យ​ចំណាស់ ជាក់ស្ដែង​នៅក្នុង​តំបន់ ប្រទេស​ជប៉ុន​ក៏​កំពុង​ជួបនឹង​បញ្ហា​នេះ​ដូចគ្នា។ប្រទេស​ជប៉ុន​បាន​រាយការណ៍​ពី​អត្រាកំណើត​ទាប​បំផុត​សម្រាប់​រយៈពេល ៨ ឆ្នាំជាប់ៗគ្នា ​គិត​រហូតដល់​ឆ្នាំ២០២៣។ ដោយឡែក សម្រាប់​ប្រទេស​ចិន ​ក៏បាន​ឈានដល់​អត្រា​មានកូន​កម្រិត​ទាប​បំផុត ពោលគឺ ១,០៩ នាក់​ក្នុង​ស្ត្រី​ម្នាក់​ផងដែរ៕