ប្រធានាធិបតីអាមេរិក Joe Biden (ស្តាំ) និងប្រធានសភា លោក Mike Johnson។ AFP
ខណៈដែលអឺរ៉ុបបានធានាមូលនិធិជំនួយឥតសំណងរហូតដល់ ៥០ ពាន់លានអឺរ៉ូសម្រាប់ការចំណាយដល់រដ្ឋាភិបាលអ៊ុយក្រែនលើកិច្ចការរដ្ឋបាល ប្រាក់ខែមន្ត្រី ប្រាក់សោធន៍និវត្តន៍ និងសេវាមូលដ្ឋានដទៃទៀត រហូតដល់ ២០២៧ សហរដ្ឋអាមេរិកដែលជាអ្នកគាំទ្រធំបំផុតអ៊ុយក្រែនក្នុងសង្គ្រាមប្រឆាំងការឈ្លានពានរបស់រុស្ស៊ីនៅតែជាប់គាំងក្នុងការទម្លាក់ជំនួយដល់អ៊ុយក្រែនចាប់តាំងពីសង្គ្រាមនៅតំបន់ហ្គាហ្សាផ្ទុះឡើង។
ហេតុការណ៍កើតឡើងចុងក្រោយនៅសហរដ្ឋអាមេរិកបង្ហាញថា រដ្ឋបាលប្រធានាធិបតីរបស់លោក ចូ បៃដិន បានចេញជំទាស់ច្បាប់ថ្មីមួយដែលបង្កើតដោយរដ្ឋសភាគ្រប់គ្រងដោយគណបក្សសាធារណរដ្ឋដែលទទួលរងឥទ្ធិពលពីអតីតប្រធានាធិបតី ដូណាល់ ត្រាំ ចង្អុលឱ្យរដ្ឋបាលលោក បៃដិនគិតតែបញ្ហានៅអ៊ីស្រាអែល ដោយមើលរំលងអ៊ុយក្រែន និងបញ្ហាសន្តិសុខ។
ភាពមិនចុះសម្រុងគ្នារវាងស្ថាប័នកំពូលទាំង ២ គឺស្ថាប័នប្រធានាធិបតីដែលដឹកនាំដោយគណបក្សប្រជាធិបតេយ្យ និងសភាតំណាងរាស្ត្រ ឬហៅថា សភាជាន់ទាប ដឹកនាំដោយគណបក្សសាធារណរដ្ឋបានកើតឡើងជាថ្មីក្រោយសេតវិមានបានអះអាងពីលទ្ធភាពច្រានចោលច្បាប់ផ្តល់ជំនួយដល់អ៊ីស្រាអែលដែលតាក់តែងឡើងដោយសភាដែលដឹកនាំគណបក្សសាធារណរដ្ឋកាលពីចុងសប្តាហ៍កន្លង ហើយត្រូវសេតវិមានចោទថា «ជាឧបករណ៍នយោបាយដ៏សែនអាក្រក់»។
វិមានប្រធានាធិបតីសហរដ្ឋអាមេរិកបានចេញសេចក្តីប្រកាសមួយកាលពីថ្ងៃន្ទ ដោយអះអាងថា ប្រធានាធិបតីចូបៃដិន (Joe Biden) នឹងវេតូលើច្បាប់ផ្តល់ជំនួយតែមួយ ដែលបានស្នើឡើងសម្រាប់តែអ៊ីស្រាអែលដោយមិនបានខ្វល់ខ្វាយរឿងកញ្ចប់ជំនួយសម្រាប់អ៊ុយក្រែន។
ចាប់តាំងពីចុងឆ្នាំ ២០២៣ រដ្ឋបាលលោកប្រធានាធិបតី ចូ បៃដិន ធ្លាប់បានស្នើច្បាប់ចំណាយដែលនឹងត្រូវផ្តល់ជំនួយយោធាយ៉ាងច្រើនដល់អ៊ុយក្រែនដើម្បីប្រយុទ្ធប្រឆាំងនឹងការឈ្លានពានរបស់រុស្ស៊ីដែលរហូតដល់ពេលនេះអូសបន្លាយជិត ២ ឆ្នាំ ប៉ុន្តែសេចក្តីស្នើច្បាប់នោះត្រូវរារាំងដោយរដ្ឋសភាដែលជាអ្នកចង្អុលទិសឱ្យរដ្ឋាភិបាលចាយ។
ច្បាប់ចំណាយសម្រាប់ផ្តល់ជំនួយឱ្យអ៊ីស្រាអែលនេះរៀបចំឡើងដោយប្រធានសភាលោក Mike Johnson កាលពីសប្តាហ៍មុន កើតមានឡើងដោយមិនអើពើច្បាប់ដែលមានទឹកប្រាក់ចំនួន ១១៨,២ ពាន់លានដុល្លាររបស់ព្រឹទ្ធសភា ដែលនឹងផ្តល់អំណាចដល់ប្រធានាធិបតីក្នុងការរឹតបន្តឹងលើការឆ្លងដែនរបស់ជនចំណាកស្រុកខុសច្បាប់នៅព្រំដែនភាគខាងត្បូងព្រមទាំងផ្តល់ប្រាក់រាប់ពាន់លានដុល្លារដល់អ៊ីស្រាអែល និងអ៊ុយក្រែន។
សេចក្តីថ្លែងការណ៍នោះសរសេរថា៖ «រដ្ឋបាលបានចំណាយពេលជាច្រើនខែធ្វើការជាមួយក្រុមសមាជិកព្រឹទ្ធសភាទ្វេបក្ស (bipartisan) ដើម្បីសម្រេចបានកិច្ចព្រមព្រៀងសន្តិសុខជាតិដែលធានាព្រំដែន និងផ្តល់ការគាំទ្រដល់ប្រជាជនអ៊ុយក្រែន និងអ៊ីស្រាអែល ខណៈពេលដែលការផ្តល់ជំនួយមនុស្សធម៌ដែលត្រូវការច្រើនដល់ជនស៊ីវិលដែលរងផលប៉ះពាល់ដោយជម្លោះជុំវិញពិភពលោក»។
សេតវិមានបានសរសេរនៅក្នុងសេចក្តីថ្លែងការណ៍ចោទប្រកាន់ការរៀបចំតាក់តែងច្បាប់ថ្មី ថាជាឧបករណ៍នយោបាយដ៏សែនអាក្រក់បំផុត។
ប្រធានរដ្ឋសភាលោក Johnson គ្រោងនឹងជំរុញច្បាប់គាំទ្រដល់អ៊ីស្រាអែល ដែលមានទឹកប្រាក់ ១៧,៦ ពាន់លានដុល្លារដោយគ្មានខ្វល់រឿងផ្សេង ហើយបង្កើនសម្ពាធលើលោកបៃដិនដែលធ្លាក់ប្រជាប្រិយភាព៕
