អ្នកនាំពាក្យក្រសួងការបរទេសចិន លោក វ៉ាង វឹនពិន (Wang Wenbin) ថ្លែងថ្កោលទោសអាមេរិកដែលគាំទ្រសកម្មជនហុងកុង។ AFP
អ្នកនាំពាក្យក្រសួងការបរទេសចិន កាលពីថ្ងៃទី៦ ខែកុម្ភៈ ឆ្មាំ២០២៤ បានសម្តែងការមិនពេញចិត្ត និងបង្ហាញពីគោលជំហរប្រឆាំងចំពោះក្រុមមន្ត្រីជាន់ខ្ពស់របស់សហរដ្ឋអាមេរិក ដែលបានចូលរួមគាំទ្រក្រុមសកម្មជន ដែលបានធ្វើកុបកម្មនៅទីក្រុងហុងកុង ដែលពួកគេបានភៀសខ្លួនចេញទៅសហរដ្ឋអាមេរិក។
ការថ្លែងរបស់អ្នកនាំពាក្យក្រសួងការបរទេសចិន លោកវ៉ាង វឹនពិន (Wang Wenbin) ជាការឆ្លើយតបទៅកាន់ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក ដានីញែល គ្រីតេនប្រ៊ីង (Daniel J. Kritenbrink) ដែលបានទទួលជួបប្រជុំជាមួយសមាជិកក្រុមអ្នកបះបោរហុងកុងចំនួន ៤ នាក់ ដែលបានចាកចេញពីហុងកុង។
លោក វ៉ាង បានថ្លែងនៅក្នុងសន្និសីទសារព័ត៌មានមួយថា៖ «បុគ្គលទាំងនេះ ត្រូវបានដាក់ក្រោមការសង្ស័យថា បានគំរាមកំហែងដល់សន្តិសុខជាតិ»។ លោកក៏បានជំរុញប៉ូលិសហុងកុង ឱ្យចេញដីកាចាប់ខ្លួនពួកគេ ដោយបញ្ជាក់ថា វិធានការចាប់ខ្លួននេះគឺស្របទៅនឹងច្បាប់អន្តរជាតិ និងច្បាប់ទំនៀមទម្លាប់។
លោក វ៉ាង បានបន្ថែមថា សហរដ្ឋអាមេរិក អនុវត្តច្បាប់សន្តិសុខជាតិរបស់ខ្លួនហួសពីព្រំដែនកំណត់ ពោលគឺអាមេរិកបានចេញមុខគាំទ្រក្រុមកុបកម្មនៅហុងកុង ហើយនេះមិនត្រឹមតែមិនគោរពនីតិរដ្ឋប៉ុណ្ណោះទេ ប៉ុន្តែថែមទាំងបង្ហាញពីការអនុវត្តច្បាប់ស្តង់ដា ២ ជុំវិញបញ្ហាសិទ្ធិមនុស្ស និងនីតិរដ្ឋ។
លោក វ៉ាងបានសង្កត់ធ្ងន់ថា បញ្ហានៅហុងកុងគឺជាកិច្ចការផ្ទៃក្នុងរបស់ចិនតែ ១គត់ មិនបើកចំហឱ្យមានការជ្រៀតជ្រែកពីខាងក្រៅឡើយ។ លោកបានជំរុញឱ្យសហរដ្ឋអាមេរិកពិចារណាចំពោះទង្វើរបស់ខ្លួន និងគោរពឱ្យបានពេញលេញនូវអធិបតេយ្យភាព និងសិទ្ធិអំណាចផ្លូវច្បាប់របស់ចិននៅក្នុងទីក្រុងហុងកុង។
លោក វ៉ាងបានថ្លែងថា ៖ «សហរដ្ឋអាមេរិកមិនគួរក្លាយជាប្រទេសដែលទទួលយកឧក្រិដ្ឋជនទៅរស់នៅឡើយ។ ប្រទេសចិនប្តេជ្ញាការពារអធិបតេយ្យភាព សន្តិសុខ និងផលប្រយោជន៍របស់ខ្លួន»។ លោកបានព្រមានថា រាល់ការជ្រៀតជ្រែកក្នុងកិច្ចការហុងកុង ឬធ្វើឱ្យខូចដល់នីតិរដ្ឋ នោះចិននឹងធ្វើការឆ្លើយតបយ៉ាងចាស់ដៃត្រឡប់ទៅវិញ៕
