ក្រុមអ្នកតវ៉ាពាក់មុខរូបបេក្ខជនប្រធានាធិបតី សម្រាប់ការបោះឆ្នោតខាងមុខនេះ។ AFP
ក្រុមនិស្សិតឥណ្ឌូនេស៊ី រាប់រយនាក់ បានចេញធ្វើបាតុកម្មដ៏កម្រទាមទារឱ្យមេដឹកនាំប្រទេសលោក ចូកូ វីដូដូ រក្សាអព្យាក្រឹតភាពរបស់ខ្លួនមុនការបោះឆ្នោតជ្រើសរើសប្រធានាធិបតីថ្ងៃទី ១៤ ខែកុម្ភៈខាងមុខ។
សេចក្តីរាយការណ៍របស់ទីភ្នាក់ងារសារព័ត៌មានរ៉យទ័រ បានឱ្យដឹងថា សិស្ស-និស្សិតប្រមាណជិត ២ ០០០ នាក់ ដែលមកពីសាកលវិទ្យាល័យផ្សេងៗគ្នា ត្រូវគេដឹងថាចូលរួមការប្រមូលផ្ដុំគ្នាតវ៉ានៅកណ្ដាលរដ្ឋធានីហ្សាការតា ដោយទាមទារលោក ចូកូ ដែលជិតផុតអាណត្តិនោះ កុំឱ្យបង្ហាញនិន្នាការគាំទ្រទៅលើបក្ខពួកណាមួយ។
សកម្មជននិស្សិត និងជាអ្នករៀបចំការតវ៉ា លោក Tegar Afriansyah និយាយថា៖«យើងចង់ធ្វើឱ្យសាធារណជនដឹងថា លោក ចូកូ វីដូដូ គឺជាតួអង្គសំខាន់នៅពីក្រោយការបោះឆ្នោតដោយអយុត្តិធម៌»។ លោកបន្ថែមថា ការតវ៉ាស្រដៀងគ្នាបែបនេះអាចនឹងធ្វើឡើងនៅទូទាំងប្រទេសនៅពេលក្រោយ។
លោក ចូកូ មិនបានបង្ហាញការគាំទ្របេក្ខភាពណាមួយច្បាស់លាស់នោះទេ។ ប៉ុន្តែលោកបានបង្ហាញខ្លួនជាសាធារណៈ ជាមួយនឹងបេក្ខជនប្រធានាធិបតីជួរមុខ គឺរដ្ឋមន្ត្រីក្រសួងការពារជាតិលោក Prabowo Subianto ដែលឈរឈ្មោះបោះឆ្នោតក្នុងតំណែងជាប្រធានាធិបតី ជាមួយលោក Gibran Rakabuming Raka ដែលជាកូនប្រុសរបស់លោក ចូកូ ក្នុងតំណែងជាអនុប្រធានាធិបតី។
ក្រោមបញ្ហានេះ លោក ចូកូ បានប្រឈមមុខនឹងការចោទប្រកាន់កាន់តែច្រើនឡើង អំពីការបំពានក្រមសីលធម៌ និងការជ្រៀតជ្រែកក្នុងកិច្ចការបោះឆ្នោត ជាពិសេស បន្ទាប់ពីតុលាការកំពូលប្រទេសនេះ បានកែប្រែច្បាប់ស្តីពីសិទ្ធិឈរឈ្មោះសម្រាប់បេក្ខជនកាលពីខែតុលា ដែលអនុញ្ញាតឱ្យ លោក Gibran អាចឈរឈ្មោះជាមួយលោក Prabowo។
សកម្មជននិស្សិតដដែល លោក Tegar បានលើកឡើងថា៖«យើងឆ្អែតហើយនឹងការជ្រៀតជ្រែករបស់លោកប្រធានាធិបតីក្នុងការបោះឆ្នោតឆ្នាំ ២០២៤ ជាពិសេសដើម្បីជួយឧក្រិដ្ឋជនសិទ្ធិមនុស្ស ឈ្នះការបោះឆ្នោត»។ លោកនិយាយយ៉ាងដូច្នេះថា ដោយសំដៅលើ Prabowo ដែលរងការចោទប្រកាន់ថាបានរំលោភសិទ្ធិមនុស្សនាពេលកន្លងមក ជាអ្វីដែលលោក Prabowo បានច្រានចោល។
ទោះបីជាយ៉ាងណាក៏ដោយ លោក ចូកូ នៅតែទទូចពីភាពស្អាតស្អំរបស់ខ្លួន ដោយរំពឹងនឹងចេញការធានាថា លោកនឹងមិនចូលរួមក្នុងព្រឹត្តិការណ៍យុទ្ធនាការបោះឆ្នោតណាមួយឡើយ។លោក ចូកូ វីដូដូ បានកាន់តំណែងប្រធានាធិបតីឥណ្ឌូនេស៊ី ២ អាណត្តិ៕
