![](https://pppkhmer.sgp1.digitaloceanspaces.com/image/main/20242/8_2_2024_8_2_2024_photo_2024_02_08_15_50_25.jpg)
រដ្ឋបាលរបស់លោក ចូ បៃដិន កំពុងអនុវត្តការកំណត់ស្តង់ដា ដែលតឹងរ៉ឹងជាងមុន ចំពោះការបង្ហុយផ្សែងចេញតាមបំពង់ពីឧស្សាហកម្មនានា។ AFP
រដ្ឋបាលរបស់លោក ចូ បៃដិន កំពុងអនុវត្តការកំណត់ស្តង់ដា ដែលតឹងរ៉ឹងជាងមុន ចំពោះការបង្ហុយផ្សែងចេញតាមបំពង់ពីឧស្សាហកម្មនានា ដោយអះអាងថា ផ្សែងទាំងនោះបានប៉ះពាល់យ៉ាងខ្លាំង ដល់សុខភាពរបស់ប្រជាជន។
យ៉ាងណាមិញ គ្រាន់តែដាក់ចេញនូវច្បាប់រឹតបន្តឹងថ្មីនេះភ្លាម ក្រុមបរិស្ថាន និងក្រុមអ្នកការពារសុខភាពសាធារណៈបានសាទរ និងបង្ហាញការយល់ឃើញថា នេះជាជំហានដ៏សំខាន់មួយក្នុងការធ្វើឱ្យប្រសើរឡើងនូវសុខភាពរបស់ជនជាតិអាមេរិក រួមទាំងមនុស្សជំនាន់ក្រោយផងដែរ។
អគ្គនាយកទីភ្នាក់ងារការពារបរិស្ថានរបស់សហរដ្ឋអាមេរិកគឺលោក Michael Regan បានឱ្យដឹងថា ច្បាប់នេះនឹងផ្ដល់អត្ថប្រយោជន៍ដល់សុខភាពសាធារណៈ ដោយគិតជាទឹកប្រាក់ប្រមាណ ៤៦ ពាន់លានដុល្លារ នៅត្រឹមឆ្នាំ២០៣២។
ច្បាប់នេះក៏នឹងទប់ស្កាត់ការកើតជំងឺហឺតរហូតដល់ ៨០ម៉ឺនករណី និងបង្ការការស្លាប់មុនអាយុ បានចំនួន ៤៥០០ ករណី ដោយច្បាប់នេះនឹងផ្តល់អត្ថប្រយោជន៍ជាពិសេសដល់កុមារ មនុស្សចាស់ អ្នកមានជំងឺបេះដូង សួត ក៏ដូចជាប្រជាជននៅក្នុងសហគមន៍ដែលមានប្រាក់ចំណូលទាប និងជនជាតិភាគតិចដែលរងផលប៉ះពាល់យ៉ាងធ្ងន់ធ្ងរដោយការបំពុលឧស្សាហកម្មជាច្រើនទសវត្សរ៍មកនេះ។
លោក Michael Regan បានបន្តសង្កត់ធ្ងន់ទៀតថា៖ «ទាំងនេះជារឿងដែលរដ្ឋបាលលោក ចូ បៃដិន តែងតែផ្ដោតការយកចិត្តទុកដាក់។ សម្រាប់យើង នៅពេលដែលប្រជាជនមានសុខភាពល្អ ក៏ស្មើនឹង សេដ្ឋកិច្ចមានសុខភាពល្អដូចគ្នា។
ដោយឡែក ច្បាប់ថ្មីនេះបានកំណត់កម្រិតអតិបរមានៃការបំពុលភាគល្អិតចំនួន ៩ មីក្រូក្រាមក្នុង១ម៉ែត្រគុបនៃខ្យល់ ជាស្តង់ដាថ្មីដែលធ្លាក់ចុះពីចំនួន ១២មីក្រូក្រាម ដែលជាស្តង់ដាបង្កើតឡើង ក្រោមរដ្ឋបាលលោកអូបាម៉ា។
ក្រោមការរឹតបន្តឹងថ្មីនេះ ក្រុមម្ចាស់រោងចក្រឧស្សាហកម្មបានព្រមានថា ច្បាប់ថ្មីនេះអាចនាំឱ្យបាត់បង់ការងារនៅក្នុងរោងចក្រឧស្សាហកម្ម ដែលនាំឱ្យមានការថមថយនូវផលិតកម្ម និងអាចឈានទៅដល់ករណីបិទរោងចក្រថាមពល ឬរោងចក្រចម្រាញ់ប្រេងទៀតផង។
បើទោះបីជាយ៉ាងនេះក្ដី លោក ចូ បៃដិន ហាក់កំពុងយកច្បាប់នេះជាឧបករណ៍នយោបាយសម្រាប់ ការបោះឆ្នោតជ្រើសរើសប្រធានាធិបតីនាពេលខាងមុខ។
ពីក្នុងគណបក្សប្រជាធិបតេយ្យផ្ទាល់នោះវិញ ច្បាប់នេះក៏រងការរិះគន់មួយចំនួនដែរ ដោយគេបារម្ភថា វានឹងអាចធ្វើឱ្យសន្លឹកឆ្នោតរបស់លោក ចូ បៃដិន ធ្លាក់ចុះ នៅតាមរដ្ឋដែលមានរោងចក្រឧស្សាហកម្ម មួយចំនួន។
ប៉ុន្តែយ៉ាងណា លោក Regan បានអះអាងថា ការបំពុលដោយក្លិនស្អុយបានធ្លាក់ចុះយ៉ាងខ្លាំងក្នុងរយៈពេល២ទសវត្សរ៍ចុងក្រោយនេះ ទោះបីជាផលិតផលក្នុងស្រុកសរុបរបស់សហរដ្ឋអាមេរិកបានកើនឡើងច្រើនជាង ៥០% ក៏ដោយ។ ដូច្នេះហើយ ការរឹតបន្តឹងលើការបង្ហុយផ្សែងចេញពីរោងចក្រឧស្សាហកម្មនាពេលនេះ នឹងមិនមានអ្វីប៉ះពាល់ដល់ការលូតលាស់នៃសេដ្ឋកិច្ចនោះទេ៕