ប្រធានាធិបតីរុស្ស៊ី លោក វ៉្លាឌីមៀរ ពូទីន ទៅទស្សនកិច្ចទ័ពអាកាសរបស់ខ្លួន។ AFP
.jpg)
រុស្ស៊ីបានព្រមានបាញ់ទម្លាក់យន្តហោះចម្បាំងដ៏មានឥទ្ធិពលរបស់សហរដ្ឋអាមេរិក F-16 ក្នុងករណីប្រទេសណាមួយប្រគល់ឱ្យអ៊ុយក្រែនសម្រាប់ការធ្វើសង្គ្រាមប្រឆាំងខ្លួននោះ ប៉ុន្តែមហាអំណាចនុយក្លេអ៊ែររុស្ស៊ីបានបដិសេធថា ខ្លួនមិនបានគូសវាសសម្រាប់ការវាទីចូលប្រទេសណាតូណាមួយដែលជាអតីតរដ្ឋក្នុងសហភាពសូវៀតនោះទេ។
ទីភ្នាក់ងារព័ត៌មានរ៉យទ័រ បានផ្សាយថា រុស្ស៊ីគ្មានគំនិតលើប្រទេសណាតូណាមួយឡើយ ហើយនឹងមិនវាយប្រហារប្រទេសប៉ូឡូញ រដ្ឋបាល់ទិក ឬសាធារណរដ្ឋឆេកឡើយ ប៉ុន្តែប្រសិនបើលោកខាងលិចផ្គត់ផ្គង់យន្តហោះចម្បាំង F-16 ដល់ប្រទេសអ៊ុយក្រែន នោះពួកគេនឹងត្រូវបាញ់ទម្លាក់ដោយកងកម្លាំងរុស្ស៊ី។
រុស្ស៊ីបានចាប់ផ្តើមឈ្លានពានចូលទឹកដីអ៊ុយក្រែនដែលជារដ្ឋឯករាជ្យពេញលេញ និងជារដ្ឋសមាជិកពេញសិទ្ធិរបស់អង្គការសហប្រជាជាតិកាលពីថ្ងៃទី ២៤ ខែកុម្ភៈ ឆ្នាំ ២០២២ ដោយប្តេជ្ញាប្រើពេលតែប៉ុន្មានថ្ងៃដើម្បីផ្តួលរំលំរដ្ឋាភិបាលរបស់ ប្រធានាធិបតី វ៉ូឡូឌីមៀរ ហ្សេឡេនស្គី ដែលមានទំនោរទៅរកបស្ចឹមប្រទេសឬប្លុកសេរីដឹកនាំដោយសហរដ្ឋអាមេរិក។
ក្រោយការលើកទ័ពចូលអ៊ុយក្រែន វិបត្តសង្គ្រាមមិនឈ្នះមិនចាញ់មួយនេះបានបង្កឱ្យមានវិបត្តិដ៏ជ្រៅបំផុតនៅក្នុងទំនាក់ទំនងរបស់រុស្ស៊ីជាមួយលោកខាងលិចចាប់តាំងពីវិបត្តិមីស៊ីលគុយបាកាលឆ្នាំ ១៩៦២។
ថ្លែងទៅកាន់អាកាសយានិករបស់កងទ័ពអាកាសរុស្ស៊ី ប្រធានាធិបតីរុស្ស៊ី លោក វ៉្លាឌីមៀរ ពូទីន បាននិយាយថា សម្ព័ន្ធមិត្តយោធាដឹកនាំដោយសហរដ្ឋអាមេរិក បានពង្រីកឆ្ពោះទៅទិសខាងកើតឆ្ពោះទៅកាន់ប្រទេសរុស្ស៊ី ចាប់តាំងពីការដួលរលំនៃសហភាពសូវៀតឆ្នាំ ១៩៩១ ប៉ុន្តែថា ទីក្រុងម៉ូស្គូមិនមានគម្រោងវាយប្រហាររដ្ឋណាតូនោះទេ។
យោងតាមការចេញសេចក្តីប្រកាសរបស់វិមានក្រឹមឡាំងដែលបានចេញផ្សាយកាលពីថ្ងៃព្រហស្បតិ៍ លោក ពូទីន បាននិយាយថា៖ «យើងមិនមានចេតនាឈ្លានពានចំពោះរដ្ឋទាំងនេះទេ។ គំនិតដែលថាយើងនឹងវាយប្រហារប្រទេសមួយចំនួនទៀត ដូចជា ប៉ូឡូញ រដ្ឋបាល់ទិក និងឆេកក៏កំពុងភ័យខ្លាចផងដែរ គឺគ្មានហេតុផលទល់តែសោះ។ វាគ្រាន់តែជាលេសប៉ុណ្ណោះ»។
កន្លងមក មេដឹកនាំប្រទេសលោកខាងលិច រដ្ឋនានានៅអឺរ៉ុបខាងកើតសុទ្ធតែបានសន្និដ្ឋានស្រដៀងៗគ្នាថា លោក ពូទីន នឹងពង្រីកសង្គ្រាមឆ្ពោះទៅប្រទេសរបស់ពួកគេ នៅពេលដែល លោក ពូទីន ឈ្នះសង្គ្រាមនៅអ៊ុយក្រែន ម្ល៉ោះហើយទើបពួកគេ ខិតខំឧបត្ថម្ភ និងផ្គត់ផ្គង់ឱ្យអ៊ុយក្រែននូវសព្វាវុធ ហិរញ្ញវត្ថុ និងការទូតតាមការអំពាវនាវរបស់អ៊ុយក្រែន។
វិមានក្រឹមឡាំង ដែលចោទប្រកាន់សហរដ្ឋអាមេរិកថា ប្រយុទ្ធប្រឆាំងនឹងរុស្ស៊ី ដោយគាំទ្រអ៊ុយក្រែន ទាំងលុយ អាវុធ និងចារកម្ម និយាយថា ទំនាក់ទំនងជាមួយក្រុងវ៉ាស៊ីនតោន ប្រហែលជាមិនដែលអាក្រក់ជាងនេះទេ។ នេះបើតាមរ៉យទ័រ។
នៅពេលសួរអំពីយន្តហោះចម្បាំង F-16 ដែលលោកខាងលិចបានសន្យាថានឹងបញ្ជូនទៅកាន់អ៊ុយក្រែន លោក ពូទីន បាននិយាយថា យន្តហោះបែបនេះនឹងមិនផ្លាស់ប្តូរស្ថានភាពនៅអ៊ុយក្រែនឡើយ។
លោកពូទីនបាននិយាយថា៖ «ប្រសិនបើពួកគេផ្គត់ផ្គង់យន្តហោះ F-16 ហើយពួកគេកំពុងនិយាយអំពីរឿងនេះ ហើយទំនងជាហ្វឹកហាត់អ្នកបើកយន្តហោះ វានឹងមិនផ្លាស់ប្តូរស្ថានភាពនៅលើសមរភូមិទេ។ យើងនឹងបំផ្លាញយន្តហោះ ដូចដែលយើងបំផ្លាញរថក្រោះ រថពាសដែក និងឧបករណ៍ផ្សេងទៀត រួមទាំងឧបករណ៍បាញ់គ្រាប់រ៉ុក្កែតជាច្រើន»។
លោក ពូទីន បាននិយាយថា F-16 ក៏អាចផ្ទុកអាវុធនុយក្លេអ៊ែរផងដែរ។
លោក ពូទីន បាននិយាយថា៖ «ជាការពិត ប្រសិនបើពួកវានឹងត្រូវបានប្រើពីអាកាសយានដ្ឋាននៅក្នុងប្រទេសទីបី ពួកគេក្លាយជាគោលដៅស្របច្បាប់សម្រាប់យើង គ្រប់ទីកន្លែងដែលពួកគេអាចនឹងស្ថិតនៅ»។
កន្លងមក ប្រទេសបែលហ្ស៊ិក ដាណឺម៉ាក ន័រវេស និងហូឡង់ ស្ថិតក្នុងចំណោមប្រទេសដែលបានសន្យាបរិច្ចាគយន្តហោះ F-16 ។ សម្ព័ន្ធនៃបណ្តាប្រទេសបានសន្យាថានឹងជួយបណ្តុះបណ្តាលអ្នកបើកយន្តហោះអ៊ុយក្រែនក្នុងការប្រើប្រាស់របស់ពួកគេ៕
