ម៉ានីល៖ គ្រួសាររាប់ពាន់នាក់ដែលបានបាត់បង់មនុស្សជាទីស្រលាញ់នៅក្នុងសង្គ្រាមគ្រឿងញៀនរបស់អតីតប្រធានាធិបតី Rodrigo Duterte កំពុងរង់ចាំមើលដំណើរការកាត់ទោស លើរូបលោកដោយតុលាការឧក្រិដ្ឋកម្មអន្តរជាតិ (ICC) បន្ទាប់ពីយន្តហោះបានដឹកលោកចេញពីទីក្រុងម៉ានីលឆ្ពោះទៅទីក្រុងឡាអេ កាលពីថ្ងៃអង្គារ។
អតីតប្រធានាធិបតីរូបនេះត្រូវបានចាប់ខ្លួនភ្លាមៗបន្ទាប់ពីជើងហោះហើរ Cathay Pacific របស់លោកដែលធ្វើដំណើរពីហុងកុងបានចុះចតនៅអាកាសយានដ្ឋានអន្តរជាតិ Ninoy Aquino (Naia) ក្នុងទីក្រុងម៉ានីល នៅព្រឹកថ្ងៃអង្គារ ទី១១ ម៉ោង ៩:៣០នាទីព្រឹក។
លោកត្រូវបានគេដឹកតាមយន្តហោះចាកចេញពីទីក្រុងម៉ានីល ទៅតុលាការឧក្រិដ្ឋកម្មអន្តរជាតិនៅទីក្រុងឡាអេ ប្រទេសហូឡង់នៅយប់ថ្ងៃអង្គារដដែល ហើយការបញ្ចូនខ្លួនឡើងយន្តហោះនេះដែរក៏មានការប៉ះទង្គិចគ្នារវាងមេធាវីរបស់លោក និងអាជ្ញាធរផងដែរ។
យន្តហោះចម្បាំង Gulfstream G550 ដែលមានកន្ទុយលេខ RPC5219 បានហោះឡើងនៅម៉ោង ១១:០៣ យប់ ជាមួយនឹងអតីតប្រមុខរដ្ឋអាស៊ីដំបូងគេដែលប្រឈមមុខនឹងការកាត់ក្តីនៅក្នុងតុលាការអន្តរជាតិបន្ទាប់ពីការចាប់ខ្លួនលោកដោយ Interpol ក្រោមបទចោតប្រកាន់ឧក្រិដ្ឋកម្មប្រឆាំងមនុស្សជាតិ។
ប្រភពអាកាសចរណ៍រដ្ឋាភិបាលបាននិយាយថា យន្តហោះនេះនឹងឈប់ចាក់សាំងនៅឌូបៃ មុនពេលបន្តទៅទីក្រុងឡាអេ។
ភ្លាមៗបន្ទាប់ពីយន្តហោះបានហោះឡើង លោកប្រធានាធិបតី Ferdinand Marcos Jr. បាននិយាយនៅក្នុងសន្និសីទសារព័ត៌មានថា ការនាំខ្លួនគាត់ទៅទីក្រុងឡាអេនឹងអនុញ្ញាតឱ្យ «អតីតប្រធានាធិបតីរូបនេះប្រឈមមុខនឹងការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិទាក់ទងនឹងសង្គ្រាមបង្ហូរឈាមរបស់លើលើគ្រឿងញៀន»។
លោកបាននិយាយថា៖ «ការចាប់ខ្លួននេះគឺជាការអនុលោមតាមការប្ដេជ្ញាចិត្តរបស់ប្រទេសនេះចំពោះ ប៉ូលិស Interpol»។
លោកបន្តថា៖ «ប៉ូលិល Interpol បានស្នើសុំជំនួយ ហើយយើងមានកាតព្វកិច្ច ពីព្រោះយើងមានការប្តេជ្ញាចិត្តចំពោះ Interpol ដែលយើងត្រូវបំពេញ បើយើងមិនធ្វើបែបនោះទេ ពួកគេនឹងលែងជួយយើងក្នុងករណីផ្សេងទៀតដែលពាក់ព័ន្ធនឹងជនភៀសខ្លួនហ្វីលីពីននៅបរទេស»។
លោក Duterte ត្រូវបានគេរាយការណ៍ថាបានស្នើសុំមើលដីកាចាប់ខ្លួន ICC បន្ទាប់ពីត្រូវបានប្រាប់ដោយរដ្ឋអាជ្ញារដ្ឋាភិបាលដែលបានជួបគាត់នៅខាងក្នុងយន្តហោះថា មានការជូនដំណឹងសម្រាប់ការចាប់ខ្លួនគាត់។
ដោយផ្អែកលើវីដេអូដែលបានចែករំលែកជាមួយប្រព័ន្ធផ្សព្វផ្សាយ អតីតប្រធានាធិបតីរូបនេះបានប្រាប់ទៅមន្រ្តីដែលមកចាប់ខ្លួនគាត់ថា «អ្នកនឹងត្រូវសម្លាប់ខ្ញុំប្រសិនបើខ្ញុំមិនយល់ព្រម»៕
