អតីតប្រធានាធិបតីហ្វីលីពីន Rodrigo Duterte។ FB
អតីតប្រធានាធិបតីហ្វីលីពីន Rodrigo Duterte នឹងឡើងសវនាការឧក្រិដ្ឋកម្មអន្តរជាតិ ICC នៅថ្ងៃសុក្រ ទី១៤ ខែមីនានេះ វេលាម៉ោង ២ រសៀលម៉ោងនៅទីក្រុងឡាអេ ប្រទេសហូឡង់ ពាក់ព័ន្ធនឹងបទចោទ ឧក្រិដ្ឋកម្មប្រឆាំងមនុស្សជាតិ។ នេះបើតាម ICC។
លោកត្រូវបានចាប់ខ្លួន ហើយបញ្ជូនទៅពន្ធនាគារកាលពីថ្ងៃទី១២ ខែមីនា។
លោក Duterte ត្រូវបាន ICC ចាត់ទុកជាជនសង្ស័យក្នុងអំពើឃាតកម្មដែលមានកម្រិតស្មើនឹងឧក្រិដ្ឋកម្មប្រឆាំងមនុស្សជាតិ ប្រព្រឹត្តនៅប្រទេសហ្វីលីពីន ចន្លោះពីថ្ងៃទី១ ខែវិច្ឆិកា ឆ្នាំ២០១១ ដល់ថ្ងៃទី១៦ ខែមីនា ឆ្នាំ២០១៩ ពាក់ព័ន្ធនឹងការបង្ក្រាបគ្រឿងញៀនដែលបណ្ដាលឲ្យមានមនុស្សស្លាប់រាប់ពាន់នាក់។
តុលាការ ICC ថ្លែងនៅក្នុងសេចក្ដីថ្លែងការណ៍ថ្ងៃទី១៣ មីនាថា ក្នុងពេលបង្ហាញខ្លួនលើកដំបូងនៅតុលាការ ចៅក្រមនឹងផ្ទៀងផ្ទាត់អត្តសញ្ញាណជនសង្ស័យ និងភាសាដែលដែលលោកអាចឆ្លើយតបនៅក្នុងនីតិវិធីកាត់ក្ដី។ លោកនឹងត្រូវប្រាប់ពីបទចោទ និងសិទ្ធិឆ្លើយតបស្របតាមលក្ខន្តិកៈរ៉ូម។
ចៅក្រមនៅតុលាការសាលាដំបូងនេះរួមមានលោកស្រី Iulia Antoanella Motoc ដែលជាប្រធានអង្គជំនុំជម្រះ និង ចៅក្រម Reine Adélaïde Sophie Alapini-Gansou និងចៅក្រម María del Socorro Flores Liera៕
