អគ្គារបាក់បែកដោយសារគ្រោះរញ្ជួយដី នៅទីក្រុង Mandalay ប្រទេសមីយ៉ាន់ម៉ា។ AP
ក្លិនសាកសពមនុស្សដែលបានស្លាប់ដោយគ្រោះរញ្ជួយដីនៅមីយ៉ាន់ម៉ា បានសាយភាយពេញទីក្រុង Mandalay ក្រោយគ្រោះធម្មជាតិនេះបានសម្លាប់មនុស្សប្រមាណ ១៧០០ នាក់ និងច្រើនរយនាក់ផ្សេងទៀតកប់ក្នុងគំនរបែកបាក់ ខណៈកិច្ចប្រឹងប្រែងសង្គ្រោះនិងរុករកកំពុងបន្ត។
ក្លិននៃសាកសពរលួយបានសាយភាយតាមដងផ្លូវនៃទីក្រុងធំទីពីររបស់មីយ៉ាន់ម៉ាកាលពីថ្ងៃអាទិត្យ ខណៈមនុស្សជាច្រើនបានកំពុងធ្វើការដោយដៃយ៉ាងមមាញឹកដើម្បីសម្អាតគំនរបាក់បែកដោយក្តីសង្ឃឹមថានឹងរកឃើញមនុស្សនៅមានជីវិត។
ការរញ្ជួយដីកម្រិត ៧,៧ រ៉ិចទ័របានវាយប្រហារប្រទេសមីយ៉ាន់ម៉ា កាលពីថ្ងៃសុក្រ ជាមួយនឹងចំណុចកណ្តាលនៅជិតទីក្រុង Mandalay ដោយបានធ្វើឱ្យអគារជាច្រើនដួលរលំ និងបំផ្លាញហេដ្ឋារចនាសម្ព័ន្ធផ្សេងទៀតជាច្រើន។
កិច្ចខិតខំប្រឹងប្រែងសង្គ្រោះត្រូវបានរារាំងដោយបញ្ហាជាច្រើន ដូចជា ផ្លូវថ្នល់មានការខូចខាត ស្ពានបែកបាក់ ប៉ះពាល់ដល់សេវាទំនាក់ទំនង និងបញ្ហាប្រឈមនៃវិបត្តិចំពេលមានសង្រ្គាមស៊ីវិល។
ការស្វែងរកអ្នកនៅរស់រានមានជីវិតត្រូវបានធ្វើឡើងជាចម្បងដោយអ្នកស្រុកដោយគ្មានជំនួយពីឧបករណ៍ធុនធ្ងន់ ដោយការរំកិលកម្ទេចថ្មដោយដៃ ជាមួយប៉ែល ហើយគេឃើញមានអេស្កាវ៉ាទ័រតិចតួចបំផុតក្នុងការជួយកាយ។
នៅរសៀលថ្ងៃអាទិត្យ ការរញ្ជួយដីកម្រិត ៥,១ បានកើតឡើងម្តងទៀតដែលធ្វើឲ្យមនុស្សម្នាមានការផ្អើលឆោឡោ បន្ទាប់ពីស្ងប់ស្ងាត់ ប៉ុន្តែសកម្មភាពជួយជនរងគ្រោះពីគំនរបាក់បែកនៅតែបន្ត។
ប្រជាជន ១,៥លាននាក់នៅក្នុងទីក្រុង Mandalay បានដេកនៅលើដងផ្លូវ ទាំងគ្មានផ្ទះសម្បែង ជាមួយនឹងការព្រួយបារម្ភថា ការរញ្ជួយដីអាចនឹងកើតឡើងបន្តបន្ទាប់ទៀត ដែលធ្វើឲ្យប៉ះពាល់សំណង់ដែលនៅសេសសល់ពីការដួលរលំ។
មកទល់នឹងពេលនេះ មនុស្សប្រមាន ១៧០០នាក់ ត្រូវបានរាយការណ៍ថាបានស្លាប់នៅក្នុងប្រទេសមីយ៉ាន់ម៉ា និង ជាង ៣៤០០នាក់បានរងរបួស ក្នុងនោះដែរ តំបន់ជាច្រើនមិនទាន់បានទទួលរបាយការណ៍នៅឡើយទេដោយសារតែមិនទាន់អាចធ្វើដំណើរទៅដល់ ហើយការខិតខំប្រឹងប្រែងជួយសង្គ្រោះ ត្រូវបានធ្វើឡើងដោយមនុស្សដែលធ្វើការដោយដៃដើម្បីព្យាយាមកាយសម្អាតកម្ទេចកម្ទី។
ភាគច្រើនអ្នកជួយសង្រ្គោះគឺជាអ្នកស្ម័គ្រចិត្តក្នុងស្រុក ដែលព្យាយាមស្វែងរកមនុស្សជាទីស្រលាញ់របស់ពួកគេដែលកប់ក្នុងគំនរបាក់បែក។
ប្រទេសមួយចំនួនបានបញ្ជូនកម្លាំងទៅជួយសង្គ្រោះ និងរុករក។ កម្ពុជាក៏បានបញ្ជូនកម្លាំងចំនួន ២នាក់ និងប្រកាសផ្ដល់ជំនួយដំណាក់កាលដំបូងក្នុងទឹកប្រាក់ ១០ម៉ឺនដុល្លារ៕
