ជនបរទេសខុសច្បាប់ជាង ១០០០នាក់ ត្រូវបានចាប់ខ្លួន គិតចាប់ពីថ្ងៃទី២០ ខែមករា។ Getty Image
ទីភ្នាក់ងារអនុវត្តច្បាប់អន្តោប្រវេសន៍និងគយ (ICE) សហរដ្ឋអាមេរិក បានចាប់ខ្លួនមនុស្សជាង ១០០០នាក់ ដែលជាចំនួនមួយច្រើនមិនធ្លាប់មានក្នុងប្រវត្តិសាស្ត្ររបស់ ICE ក្នុងរយៈពេលជិត ៣ ខែ គិតចាប់ពីថ្ងៃទី២០ ខែមករា ដែលជាថ្ងៃលោក ដូណាល់ ត្រាំ ឡើងកាន់អំណាចជាប្រធានាធិបតីសហរដ្ឋអាមេរិក។
ICE បញ្ជាក់នៅក្នុងសេចក្ដីប្រកាសព័ត៌មាននៅថ្ងៃទី១៥ ខែមេសាកន្លងទៅថា ការចាប់ខ្លួនជនបរទេសទាំងនោះដោយសារតែពួកគេធ្វើការនៅសហរដ្ឋអាមេរិកដោយខុសច្បាប់។ បន្ថែមពីលើនេះ អគ្គនាយកដ្ឋានសន្តិសុខមាតុភូមិ (HIS) ដែលស្ថិតក្រោមការគ្រប់គ្រងរបស់ ICE ក៏បានដាក់ឲ្យក្រុមហ៊ុនដែលជួលពួកគេឲ្យទទួលខុសត្រូវផងដែរ។
លោក Robert Hammer អគ្គនាយករងនៃអគ្គយកដ្ឋានសន្តិសុខមាតុភូមិ បានថ្លែងថា៖ «នេះជាតួលេខនៃការចាប់ខ្លួនខ្ពស់មិនធ្លាប់មាននៅក្នុងប្រវត្តិសាស្ត្ររបស់ HSI។ យើងបានកោះហៅក្រុមហ៊ុនអាជីវកម្មរហូតដល់ទៅ ១២០០កក្រុមហ៊ុន ដែលជាផ្នែកមួយនៃការត្រួតពិនិត្យរបស់យើង ហើយយើងបានស្នើដាក់ពិន័យពួកគេជិត ១លានដុល្លារ»។
ការចាប់ខ្លួននិងផាកពិន័យនេះធ្វើឡើងស្របតាមបទបញ្ជារបស់លោក ត្រាំ ក្នុងការអនុវត្តច្បាប់ពាក់ព័ន្ធនឹងបញ្ហាអន្តោប្រវេសន៍ខុសច្បាប់ជាង ៤០០ច្បាប់ សម្រាប់ជនប្រទេសដែលចូលទៅសហរដ្ឋអាមេរិក។ នេះបើតាមការលើកឡើងរបស់ ICE។
ICE បានអះអាងផងដែរថា ខ្លួនបានដាក់ពាក្យបណ្ដឹងទៅលើក្រុមហ៊ុនចិនមួយដែលខ្លួនចោទថា មានជាប់ពាក់ព័ន្ធនឹងអំពើលាងលុយ និងស្នើឲ្យរឹបអូសគម្រោងចំនួន ១៤ ដែលមានទឹកប្រាប់រាប់លានដុល្លារ គណនីធនាគារចំនួន ៧ និង រថយន្តចំនួន ១៥ គ្រឿង។ ក្រុមហ៊ុននេះរងការចោទប្រកាន់ថា បានផ្គត់ផ្គង់កម្មករខុសច្បាប់សម្រាប់ធ្វើការនៅរោងចក្រមួយនៅរដ្ឋ Ohio៕
