នាយករដ្ឋមន្ត្រីថៃ Paetongtarn Shinawatra បាននិយាយថា ប្រទេសថៃ បានត្រៀមខ្លួន រួចជាស្រេចដើម្បីគាំទ្រវិធីសាស្រ្តរួបរួមរបស់អាស៊ាន ក្នុងការចរចាជាមួយសហរដ្ឋអាមេរិក ជុំវិញការយកពន្ធទៅវិញទៅមកលើការនាំចូលទំនិញពីប្រទេសក្នុងតំបន់ បន្ទាប់ពីលោកស្រី បានជួបពិភាក្សាជាមួយនាយករដ្ឋមន្ត្រីម៉ាឡេស៊ី លោក Anwar Ibrahim នៅវិមានរដ្ឋាភិបាលកាលពីថ្ងៃព្រហស្បតិ៍ ទី១៧ ខែ មេសានេះ។
លោក Anwar Ibrahim កំពុងបំពេញទស្សនកិច្ចការងាររយៈពេលពីរថ្ងៃ ចាប់ពីថ្ងៃទី ១៧ ដល់ ១៨ ខែមេសា នៅប្រទេសថៃ តាមការអញ្ជើញរបស់លោកស្រី Paetongtarn។
សូមរំឭកថា មេដឹកនាំទាំងពីរ បានជួបពិភាក្សាការងារជាលើកដំបូងនៅពេលដែលលោកស្រី Paetongtarn បំពេញទស្សនកិច្ចនៅប្រទេសម៉ាឡេស៊ីកាលពីថ្ងៃទី ១៦ ខែធ្នូ ហើយមេដឹកនាំ ទាំងពីរនៅតែបន្តសន្ទនាពិភាក្សាការងារតាមទូរស័ព្ទជាបន្តបន្ទាប់នៅថ្ងៃទី ៥ ខែមេសា។
លោកស្រី Paetongtarn បាននិយាយថា ពួកគេបានពិភាក្សាអំពីរបៀបដែលអាស៊ាន អាចចូលរួមកម្លាំងដើម្បីដោះស្រាយជាមួយនឹងការដំឡើងពន្ធរបស់សហរដ្ឋអាមេរិក ដោយបន្ថែមថា ចំនួនប្រជាជនរួមបញ្ចូលគ្នានៃប្រទេសសមាជិកអាស៊ានប្រហែល ៦៧០ លាននាក់ ដែលធ្វើឱ្យប្លុកអាស៊ានក្លាយជាទីផ្សារដ៏ធំ និងជាកម្លាំងដែលត្រូវគិតគូរ។
លោកស្រីបន្តថា បញ្ហានេះនឹងត្រូវលើកយកមកពិភាក្សានៅក្នុងកិច្ចប្រជុំអាស៊ានលើកក្រោយ ហើយប្រទេសថៃបានត្រៀមខ្លួនជាស្រេចក្នុងការគាំទ្រគំនិតនៃការរួមកម្លាំងរបស់អាស៊ាន ដើម្បីជាប្រយោជន៍ដល់ប្រទេសជាសមាជិកទាំងអស់។
លោកស្រី Paetongtarn «យើងមានសំណុំនៃសំណើសមរម្យមួយដើម្បីបង្ហាញដល់សហរដ្ឋ អាមេរិកក្នុងអំឡុងពេលកិច្ចចរចា វានឹងក្លាយជាស្ថានភាពឈ្នះឈ្នះសម្រាប់ភាគីទាំងពីរ»។
រដ្ឋមន្ត្រីក្រសួងហិរញ្ញវត្ថុ Pichai Chunhavajira នឹងដឹកនាំគណៈប្រតិភូថៃទៅកាន់ ទីក្រុងវ៉ាស៊ីនតោន ដើម្បីពិភាក្សានៅថ្ងៃពុធសប្តាហ៍ក្រោយ។
គួរបញ្ជាក់ថា ប្រធានាធិបតី Donald Trump កាលពីថ្ងៃទី ៩ ខែមេសា បានប្រកាសពីការផ្អាក លើពន្ធទៅវិញទៅមកទាំងអស់ រួមទាំងការយកពន្ធ ៣៦% លើប្រទេសថៃ ក្នុងអំឡុងពេល ដែលបណ្តាប្រទេសផ្សេងទៀតកំពុងចាប់ផ្តើមតម្រង់ជួរដើម្បីស្វែងរកការចរចា។ ទោះជាយ៉ាងណាក៏ដោយ ពន្ធមូលដ្ឋាន ១០% លើទំនិញទាំងអស់ នៅតែអនុវត្តចំពោះ ដៃគូពាណិជ្ជកម្មស្ទើរតែទាំងអស់របស់សហរដ្ឋអាមេរិក។
ពាណិជ្ជកម្មដ៏ច្រើនលើសលប់របស់ប្រទេសថៃជាមួយសហរដ្ឋអាមេរិក មានចំនួន ៤៥.៦ ពាន់លានដុល្លារកាលពីឆ្នាំមុន ដែលជាចំនួនធំបំផុតទី ១១ ក្នុងចំណោមដៃគូពាណិជ្ជកម្ម ទាំងអស់របស់អាមេរិក៕
ប្រភព៖ https://www.bangkokpost.com/thailand/general/3005307/thai-pm-backs-asean-united-front-on-tariffs
