យ៉ាងហោចណាស់អ្នកទេសចរ ២៨ នាក់ត្រូវបានបាញ់សម្លាប់ និងច្រើននាក់ផ្សេងទៀតបានរងរបួសនៅក្នុងការវាយប្រហារភេរវកម្មមួយដែលបានកើតឡើងនៅក្នុងតំបន់ទេសចរណ៍ដ៏ល្បីគឺតំបន់ Pahalgam នៃស្រុក Anantnag ភាគខាងត្បូងនៃតំបន់ Kashmir កាលពីថ្ងៃអង្គារ ទី២២ ខែមេសានេះ។
របាយការណ៍ក្រៅផ្លូវការបានកំណត់ចំនួនអ្នកស្លាប់នៅត្រឹម ២៨ នាក់ ប៉ុន្តែមន្ត្រីមិនទាន់បានបញ្ជាក់ពីចំនួនអ្នកស្លាប់ ឬរបួសក្នុងចំនួនជាក់លាក់ណាមួយនៅឡើយទេ ដោយសារតែការបញ្ចេញតួលេខកំពុងមានភាពមិនច្បាស់លាស់។
តាមរបាយការណ៍បង្ហាញថា ជនបរទេសពីរនាក់ស្ថិតក្នុងចំណោមអ្នកទេសចរដែលបានស្លាប់ក្នុងការវាយប្រហារនេះផងដែរ ដែលបានកើតឡើងក្នុងអំឡុងពេលដំណើរទស្សនកិច្ចរបស់អនុប្រធានាធិបតីអាមេរិក JD Vance នៅប្រទេសឥណ្ឌា ។
នាយករដ្ឋមន្ដ្រី Omar Abdullah ដែលជាអ្នកនយោបាយឥណ្ឌា និងជានាយករដ្ឋមន្ត្រីបច្ចុប្បន្ននៃទឹកដីសហភាព Jammu និង Kashmir បាននិយាយថា៖ «មានការវាយប្រហារដ៏គួរឱ្យរន្ធត់មួយលើអ្នកទេសចរនៅ Pahalgam ខ្ញុំមានការភ្ញាក់ផ្អើល និងមិនគួរឲ្យចង់ជឿ»។
យោងតាមសាក្សីម្នាក់ដែលរួចជីវិតពីការវាយប្រហារបាននិយាយថា មានខ្មាន់កាំភ្លើងមិនស្គាល់អត្តសញ្ញាណម្នាក់បានបាញ់ប្រហារទៅលើក្រុមអ្នកទេសចរស្តែងៗតែម្តង ដែលធ្វើឲ្យមានភាពចលាចលភ្លាមៗ ហើយម្នាក់ៗនាំគ្នារត់គេចខ្លួន និងស្រែកយំ។
អ្នកស្រុកបានរាយការណ៍ថា ពួកគេបានឮសំឡេងកាំភ្លើងនៅក្នុងជ្រលងភ្នំ Baisaran បន្ទាប់មកកងកម្លាំងសន្តិសុខបានប្រញាប់ប្រញាល់ទៅកាន់តំបន់នោះ។
គួរឲ្យដឹងផងដែរថា តំបន់ Kashmir គឺជាតំបន់ដែលមានជម្លោះ និងមានប្រវត្តិសាស្រ្តសង្រ្គាមវឹកវរជាយូរឆ្នាំមកហើយ ដោយតំបន់ Kashmir ត្រូវបានបែងចែកជាពីរក្រោយការប្រកាសឯករាជ្យរបស់ឥណ្ឌាពីចក្រភពអង់គ្លេស និងការបង្កើតប្រទេសប៉ាគីស្ថាន នៅឆ្នាំ១៩៤៧។
ទោះជាយ៉ាងណាក៏ដោយ ប្រទេសទាំងពីរនេះ សុទ្ធតែទាមទារការគ្រប់គ្រងតំបន់នោះទាំងមូលផ្តាច់មុខ ហើយក៏ធ្លាប់ប្រយុទ្ធគ្នាក្នុងសង្គ្រាមធំៗជាច្រើនលើករួចមកហើយដែរ។
ក្រុមភេរវករ The Resistance Front (TRF) ដែលជាពន្លករបស់ Lashkar-e-Taiba (LeT) បានប្រកាសទទួលខុសត្រូវចំពោះការវាយប្រហារនេះ៕
